استشاره للجميع الاخوان-ات بدون استثناء (مسأله مصيريه)

[الملاك الأبيض]

وعليكم السلام ورحمة الله وبركاته
مرحبا اخي الفاضل عبد الله ,, طبعا هذا مستقبلك والرأي اولا واخيرا لك وللكن بما انك استشرت فاسمح لي ان اشير عليك برأيي المتواضع بالتالي :
اول شي انت الحين باقي لك سنتين وتتخرج ان شاء الله صح ؟؟ طيب لو انت حولت لقسم علم النفس مثلا هل بيعادلو لك المواد الي درستها في الانقلش ويصير باقي لك سنتين وتتخرج زي في هذا القسم ولا بتعيد من أول ؟؟ لو كان بيعادلو لك المواد يبقى اشوف انو تحول علم نفس وتاخد شهادة البكالوريس علم النفس وتتطور في شغلك وتكبر وتترقى لأنو الواحد بيدرس ليه مو ليطور نفسه ومستواه ويتعلم شي يفيده ؟؟ فانت خذ بكالوريس علم النفس واكبر في عملك وبعدين لو كنت فعلا حابب الانقلش كلغة وكعلم وحابب تكمل فخذها ساعتها كماجستير في اي جامعة غير عزوز يكون فيها اساتذة اجانب وفاهمين وتقدر تحضر معهم وتستفيد ..
اما لو كانو مايعادلو المواد الي اخذتها في هذا القسم وراح تبدأ معهم من البداية فأقول لك لا تحول ليش ؟؟ لأنو احسبها معي علم النفس كتخصص تقريبا يبغى له 4 سنوات كحد اقصى يعني بتجلس اربع سنوات وانت تدرس على بال ماتطلع لك شهادة وتترقي , فالافضل تكمل في قسمك هنا وكلها سنتين او سنة ونص وتتخرج على خير وبعدين خذ ماجستير علم نفس وكمل في عملك وراح تكون برتبة اكبر من اي شي حلمت به يوما باذن الله .. انا اعرف استاذة كذا كانت تعطينا مادة ادارة وهي معها بكالوريس علم نفس وماجستير ادارة عامة وفي الاخير صارت استاذة في الجامعة يعني خلي طموحك كبير والعلم ماله وقت ولا عمر , اسأل عن المعادلة وشوف ايش ميولك وخذ اراء باقي الاخوة والاخوات , وهم جزء استخير مرة واثنين وثلاث لأنو في النهاية مستقبلك وقرارك وربي ييسر لك الخير في كل حال واينما اتجهت يارب موفق اخي الفاضل ...