حصريا / كل ماتريد معرفته من معلومات حول دكاترة الإدارة العامة تجده هنا

[براءة الطفولة]

ممكن شباب تقولولي من من اساتذتكم يدرس تخطيط استراتيجي
لان حضي هذا الترم عند دكتور وانا اخاااااااف من الدكاتره ما احبهم احب الاستاذات عشان اعرف اتعامل معاهم
يلا قولولي من اللي يدرس تخطيط استراتيجي وكيف اسلوبه
الله يوفقكم دنيا واخره
شكرا احساس ناجح على الموضوع الرائع
لكم ودي : براءة الطفولة

[حده غيرقت]

يا اخوان احد يعرف الدكتور محمد أحمد أسعد أسعد ؟؟؟
مادة قراءات إدارية بالإنقلش

[حده غيرقت]

الدكتور محمد الروابده يسااااعد البناااات كتييييييييير

يديهم ملخصات و بالعربي يضبطهم و احنا ( التماسيح ناكل هوا :) )

[ابوخليل99]

يعطيكم العافيه

[إحساس ناجح]

المشاركة الأصلية كتبت بواسطة براءة الطفولة ممكن شباب تقولولي من من اساتذتكم يدرس تخطيط استراتيجي لان حضي هذا الترم عند دكتور وانا اخاااااااف من الدكاتره ما احبهم احب الاستاذات عشان اعرف اتعامل معاهم يلا قولولي من اللي يدرس تخطيط استراتيجي وكيف اسلوبه الله يوفقكم دنيا واخره شكرا احساس ناجح على الموضوع الرائع لكم ودي : براءة الطفولة

هلا براءة شوفي أنا ماعندي دي المادة واللي يدرسها واحد غامدي أتوقع اسمو محمد الغامدي
الكل يمدح فيه وأنا قابلته العام الماضي وجلست معاه دكتور طيب ومتواضع ووناسة مع الطلاب
إن شاء الله أكون أفدتك

[إحساس ناجح]

أخوي اللي يسأل عن قراءات بالإنجليزي للدكتور محمد أسعد مادرسني بس طلاب الإنتظام يقولون تمام
وشوف أتوقع فهد الحركان يدرس نفس المادة الكل يمدح فيه وفي أسئلته شاكر لك تفاعلك

[ابو شوقي]

إنتبهوا من طلق سواط

[سديم*]

مساء الخير
كيفكم يااحلى اعضاء
ليه ماحد يرد من البنات
نبغى نعرف اسماء الدكتورات
الي تعرف ترد علينا الله يوفق الجميع

[براءة الطفولة]

المشاركة الأصلية كتبت بواسطة سديم* مساء الخير كيفكم يااحلى اعضاء ليه ماحد يرد من البنات نبغى نعرف اسماء الدكتورات الي تعرف ترد علينا الله يوفق الجميع

لخاطر عيونك انا برد بس اول شي اشكرك احساس ناجح وان شاء الله يكون نفس الدكتور اللي قلت عنو هوه اللي يدرسني

اما سديم يا عسوله بقولك اسماء الاستاذات اللي درسوني بس تعرفي وجهات النظر تختلف من بنت لبنت انا بحكيك عني وانطباعي عن الاستاذة وبالله التوفيق

عندك الاستاذة بدرية الجهني استاذة رائعة جداً راقية في التعامل مع الطالبات اخذت معاها السلوك التنظيمي وموازنة ومالية عامة وهيه بتعطي كمان مواد اسئلي عنها
الاستاذة خديجة الحربي استاذة في الشرح كويسه اخذت معاها ادارة عامة وسياسة عامة وصناعة القرار طبعاً الاستاذة بدرية الجهني والاستاذة خديجة الحربي اسئلتهم صح وخطا واختياري صحبات في مكتب واحد (( الله يحفظهم))

عندك الاستاذة حياة راجخان اخذت معاها تطوير تنظيمي ونظم معلومات ادارية استاذة غامضة في الدرجات ما تعطي درجات بس اسئلتها حلوه شرحها ثقيل بس انتي عرفيها بنفسك وكوني معاها على طول لان مافي مفر منها لان بعض المواد هيه بس اللي تدرسها

الاستاذة سناء باناجه خفيفة دم في المحاضرة وعسوله بس اسئلتها يعني فيها شويه يبغالها تركيز اخذت معاها اساليب وطرق العمل

الاستاذة هيفاء عبد الفتاح اخذت معاها تنمية موارد بشرية استاذة شرحها حلو وكل اللي تقولو يجي في الاختبار يعني اياك تفوتي كلمة ما تحب تحضري في غير شعبتك كويسه

الاستاذة مي الثنياني اخذت معاها محاسبة حكومية كويسه تراعي متفهمه

الاستاذة ابتسام حلواني كويسه اخذت معاها اخلاقيات عمل
الاستاذة لمياء شاشاه اذا ما غلطت في الاسم اخذت معاها اقتصاد جزئي كويس شرحها

امممممم مدري اذا نسيت احد

صح تذكرت الاستاذة مها البرادعي هادية مره وصوتها منخفض بس كويسه يعني البنات ما بيحبو طريقتها في انو الواجب تلخيص كل فصل اخذت معاها نظرية تنظيم

مين كماااااان؟؟؟؟؟

الدكتورة خالدة مره تعجبني الله يحفظها اخذت معاها علوم سياسية رغم ان البنات يخافو منها بس تراعي اهم شي مع كل الاستاذات اجبريهم يعرفوك عشان تاخذي حقك صح مو تكوني نايمه على نفسك

الدكتورة ماجده اخذت معاها مبادئ سياسة اظن مدري نسيت اسم المادة بس الاستاذة تشرح من الكتاب اللي معاها وعادي يعني ما تحسي بحماس معاها


اللهم صلي على محمد
تقريباً خلصت كذا

سبحانك اللهم وبحمدك اشهد ان لا اله الا انت استغفرك واتوب اليك
اتمنى اكون افدتك

[@أنين الصمت@]

مشكوور احساس ناجح على الموضوع وان شاء الله الكل يستفيد منو

ماراح اضيف كثير على كلام براءة الطفوله كفت ووفت

بس بصحح معلومه ماجده تعطي مبادئ قانون اسئلتها حلوه

اكرام مرره كويسه ذاكري بس من العرض تعطي قانون اداري

عنود السبعان الله يسعدها ووفقها مررره جيييد تساعد وتراعي كثير وبونساتها تحطها بختباراتها تعطي اداره محليه وتخطيط استراتيجي

ريم صقر مررره تعرف تشرح ودخل المعلومه على طول اخذت معاها مبادى محاسبه

سوزان ابوالعينين تعطي اقتصاد كلي او تحليل كلي وتمويل صحي مرره شرحها حلو بس اسالتها مقال بس مو صعبه

اتمنى الي تعرف استاذات غيرهم يذكروهم عشان الكل يستفيد
وموفقين يارب