يا كرام .. أرجوكم انظروا في أمري ..

[مطلع الفجر]

وعليكم السلام ورحمة الله وبركاته

ماعمري سمعت ولا شفت نظام يمنع قبول خريجات كليات التربية للأقسام العلمية او غيره بوظيفة عضو هيئة تدريس بالجامعة أو العكس !! وكثير من اللي درس ماجستير بالجامعة وهو متخرج من كلية التربية عارف وشايف هذا الشيء والدليل إنه عند التقديم للوظائف بيكون من المرشحات لدخول المقابلة الشخصية أو الإختبار إن وجد خريجات من كلية التربية ومن مناطق مختلفة أيضا ً بالإضافة إلى خريجات الجامعة نفسها وغيرها من الجامعات .

وأنا لي زميلات من قسم الكيمياء والرياضيات خريجات من كلية التربية معيدات ومحاضرات حاليا بنفس الأقسام بكلية العلوم بجامعة الملك عبدالعزيز هذا الكلام قبل أيضا ماتنضم كلية التربية للجامعة ، وكذلك العكس لي زميلة خريجة من قسم الكيمياء الحيوي من كلية العلوم بجامعة الملك عبدالعزيز معيدة بقسم الكيمياء بكلية التربية ( كلية العلوم للبنات حالياً ) .

والمعدل العالي مو كل شيء في القبول لكن سبب من ضمن أسباب كثيرة عند المفاضلة عند انطباق الشروط وقبلها التوفيق من الله ومثل ماهو فيه مسؤليين مايخافون الله فيه أيضاً مسؤليين يخافون الله والشر والخير في كل مكان ماحد ينكر هذا وأرادة ربي فوق إرادة كل مخلوق و كل مايقدره الله للانسان عاجل أو آجل هو خير له .

وأي مسؤول قسم يقولكم إنه مايقبلوا إلا خريجات الكلية نفسها ناقشوه بالدليل إذا في تعميم رسمي بهذا الشيء ، طالما ماهو موجود هذا الشرط عند الإعلان عن الوظيفة وبيقبلوا أوراقكم عند التقديم وبتدخلوا في الترشيح والمقابلة الشخصية ، ولا ليه من الأصل يقبلوا أوراقكم عند التقديم إذا فعلاً هذا نظامهم الرسمي في القبول ؟؟!! أو ناقشوا وكيل الكلية أو وكيل الجامعة بخصوص هذا الموضوع طالما ماهو موجود في الاعلان الرسمي للوظيفة ولا يوجد تعميم رسمي نازل فيه ..

وابغى اقولكم طبعاً أكيد اذا تساوت كفاءة خريجة علوم من كلية تربية مع كفاءة خريجة علوم من نفس الجامعة والوظيفة بكلية العلوم في الجامعة انه راح تكون الاولوية طبعا حسب نظام الجامعة خاصة اذا كانت حديثة التخرج لخريجة الجامعة ومعروف الوظائف اللي بتنزل حسب الاحتياج شحيحة جدا وياكثر المتقدمين من مختلف الجهات واذا انقبلت اللي من نفس الجامعة قلتوا لاننا من كلية التربية ماقبلونا !! وكل وحدة طبعا شايفة نفسها احسن وحدة لما تقدم خاصة اذا كانت بمعدل جدا عالي أو الأولى على دفعتها :)) .

عموماً.. نصيحتي لصاحبة الموضوع مثل ما ذكر الأخ غيم تايه انه تعرضي موضوعك في منتدى الجامعة الرسمي في القسم المناسب ، وأيضاً بالنسبة لدراسة الماجستير في تخصصك إنه تحاولي تقدمي على المدن القريبة من مدينتك مثل الطائف أو أبها أو ..أو بنفس جامعتك اللي تخرجتي منها إذا كان متاح حالياً أو فيما بعد ، لأنه مافي انتساب حاليا بالنسبة للعلوم في أي جامعة وبالنسبة للتعليم عن بعد يوجد تخصصات غير العلوم ، حسب مارأيت في الموقع تخصص توجيه وإرشاد نفسي وللطلاب فقط .

كلٍ ميسر لما خلق له ..والله ييسر لنا جميعا الخير حيث كان .