هنا تجمع احلى صيادلة دفعه 11 ,,الكل يدخل

[rarba]

المشاركة الأصلية كتبت بواسطة مظلومة التحضيري هاي ياحلوين أحترت أكتب ولا لا بس صدقوني من الضيقه مالقيت غيركم تدرو دحين أنقبلت صيدلة والحمدلله على كل شي بس والله الوالدة جدا مهي راضيه وإله تبغاني أروح العمادة والأهل كلهم أول ماأقول صيدله يتريقو ويفكرو البياع والله تعبت ومرضت وربي ماسرت أنام ومدري اش الحل صح كنت أبي طب بس خلاص ربي ماأراد وكمان ودي أسال عن زمرد وينهاوحشتني وجزاكم الله خير لو بس تريحوني بكلامكم وهل ٢ صعبه ولا لا

ابغى اقولك شي-معليش لا تزعلي مني- انتي تبغي اللي حولينك يريحوكي,واحنا كلنا حاضرين ومعاكي, بس ايش رايك انتي تبدئي من نفسك؟ سؤال محير, ايش النك نيم اللي انتي حاطته؟ مظلومة التحضيري؟ انتي شايفة انو دا الاسم يدل على رضى؟ او على طموح؟ انا برأيي انو يدل على استسلام, مهما كان السبب...

شوفي يا اختي, اولا, في كتير غيرك يمروا بنفس الموقف اللي انتي بتمري بيه بالضبط.

ثانيا,انتي لازم تتغيري من نفسك, لازم انتي ترضي باللي ربك قضاه ليكي. ثالثا, لازم تتحاوري مع امك, روحي قوليلها: يا ماما ابغى اكلمك لو سمحتي بجد. اسأليها أسئلة: ماما حبيبتي, انتي على عيني وعلى راسي, ماما, انتي اللي حتدرسي ولا أنا؟ مين اللي بيمشي في حياتي, مو رجولي؟ مو انا اللي حانجح او افشل؟ مو انا اللي مفروض اختار الطريق اللي امشي فيه؟ يا ماما, ربي كاتبلي هذا التخصص, مو عشان اني اقل ذكاء من بنات الطب, لكن امكن ربنا نزل نسبتي عشان ادخل الصيدلة لانه يعلم انه في خير لية, يا ماما امكن لو خشيت طب, امكن كنت حأموت احد. يا ماما, امكن ربنا حطني في الصيدلة لانه امكن حأكون انسانة ناجحة في الحياة, امكن اكتشف دواء, او اسوي عمل كبير,. يا ماما انا ما ابغى اعترض على اللي ربي كاتبلي هوة, ليش ما بتساعديني؟ ليش ما توقفي معايا؟... رابعا, الاهل دولا, همة والمجتمع, ليهم نفس الافكار القديمة اللي حالتها جدا صعبة, اللي المفروض احنا نغيرها, احنا اللي نوعي, احنا نوريهم بأفعالنا, هذي مو بس مشكلتك, لازم تعرفي انو الكل يعاني منها, خلي عندك شوية تبلد احساس. خامسا, لو ابغى اضربلك امثلة ناس نجحوا رغم انو الناس كانو يحبطوهم, محا اخلص.(ابتداء بحياة سندي) سادسا, انا اعتبرك مثل اختي وانا جدا آسفة اذا كان كلامي قاسي شوية, لكني من جد اتمنالك الخير واتمنى انك تكوني اقوى وتكوني انتي اللي تأثري في الناس مو انتي اللي تتاثري بالناس. سابعا, انا مستعدة اقابلك واجلس معاكي ونتكلم وأحاول اساعدك اذا تبغي مني اي مساعدة :)

ثامنا, اتمنى كل واحد قرأ اللي كتبته, يقول كم كلمة مشجعة لاختنا, او يحط جملة تحفيز ليها, كلنا يد واحدة, كلنا لبعض:) وانا حابدأ:

السمكة القوية هي التي تستطيع العوم ضد التيار, في حين يستطيع حتى السمك الميت أن يعوم مع التيار.

Together....We make a change