اخبار جديدة مهمه عن نظام القبول في الطب للسنه دي

[Beeshoob]

السلام عليكم ورحمة الله وبركاته
لب الموضوع
طبعا بعد ماطفشت انا وصحبتي من الكلام اللي يقوله عن المقابله والقبول والنسبه وعدد الكراسي
والكليه اخدت الاعتماد الاكاديمي وكلام كتير يوجع الراس
دقينا على الشؤون التعليميه في الطب حددنا موعد لاستفساراتنا ورحنا لها اليوم بعد اختبار الفيزياء << بعد مالفينا ام الجامعه
طلع في النهايه المكان جوا كلية الطب حقت البنات
المهم مره اكتشفنا معلومات كتيره ومهمه جدا جدا جدا
اول ما ادخلنا على الاستاذه خلود وسميره
مررره ناس عسل وذوق واخلاق يتحبوا
حطينا كل الاسئله اللي في قلبنا
اولا : المقابله الشخصيه موجوده يا اعزائي وموضوعها اكيد وراح تكون يوم 7 و8 و9 من شهر 10 الغرض منها بس يبغو يعرفو انتي ليه اخترتي الطب بالذات لانها مهنه ماهي سهله ابدا وكمان القائمين عليها دكاتره عندهم خبره في التعامل مع ناس زينا هع وللاسف طلع مو شي شكلي زي ما اعتقدت ايدا
ثانيا : في اختبار اون لاين انجليش ومعلومات عامه دا الشي اللي صدمني بس حسيتو سهل من كلامها ما قالت عن الشي الكتير
ثالثا : في حالة عدم اجتياز المقابله ممكن ينزلونا للرغبه الثانيه وقالت انو المقابله نظام راح يطبق علينا بس هوا كان موجود قبل كدا ولاسباب شالوه ودحين رجعوه
رابعا : التسكين يتم عن طريق الشروط اللي تحطها عمادة القبول هما مره مالها شغل الموضوع مايخصهم حتى لما سالتها عن عدد المقاعد قالت دا نظام مسؤول عنو عميد القبول والتسجيل بنفسو
خامسا : ايش كمان يب قالت لها صاحبتي لو مثلا انسانه ما اتقبلت عشانها ما اجتازت المقابله هل يضل مكانها شاغرا كدا للهوا يعني ردت عليها وقالت يمكن يضل شاغر ويمكن الناس اللي يحولو يقبلوهم
سادسا : كلية العلوم الطبيه الاساسيه تقول انها جدا كليه يحتاجو للناس اللي يتخرجو منها لانهم يحتاجو مدرسين ومعيدين في الكليه نفسها وقالت انها من السنه الرابعه تبداي تتخصصي في وظائف الاعضاء علم الامراض او الفسيولوجي بس قالت وظائف الاعضاء راح يفتحوه بعد 3 سنين قدام وسالتها عن اهم نقطه هل اقدر احول من برنامج العلوم الطبيه الاساسيه للطب قالت لي يب بعد سنه بس حسيت من كلامها انو مافي احد قد سواها ما ادري الادميه مو عاجبتها فكرة تدخلي تخصص بس عشان تحولي منو ابدا
سابعا : التحويل من والى الكليات الصحيه يكون فيما بينها
واخيرا قالت لنا اهم شي الاستخاره ياجماعه
بس قعدتنا معاهم طولت شويتين وادا افتكرت أي شي راح اجي جري احطو هع
واتوقع الشباب نفس الطريقه

[دلوعة الملك عبدالعزيز]

الله يوفقك يامنووووووووووو بالطب

مقابله ) ياللطيف

[OooO JEJE OooO]

مــــــــــــــررررة شكرا على دي المعلومات المفيدة احس اني كنت زي
طيب عندي سؤال الحين المقابلة دي بس للي يبوا كلية الطب؟
يعني اللي حيدخل صيدلة او علوم طبية تطبيقية ماحيكون فيه مقابلة؟

وشكرا مرة تانية

[shahoooda]

طيب انا عندي سؤال مرررة محيرني وبليز ابغا جواب عليه قبل ما يقفل التسكين ... دحين في التسكين مكتوب جنب تقنية المختبرات والتمريض ( علوم طبية تطبيقية ) .. طيب مو الاتنين في نفس الكلية ؟؟ ليش فصلوها عن بعض ؟؟ مو الدراسة في الاتنين نفس المواد ..؟؟ وهل ينفع احول بعد سنة للطب او طب اسنان ...؟؟؟ :(:( بليييييز جاوبوني

[الأمير المدريدي]

متى موعد المقابلة في شوال ولا بعد نتائج التسكين ؟

[OooO JEJE OooO]

المشاركة الأصلية كتبت بواسطة shahoooda طيب انا عندي سؤال مرررة محيرني وبليز ابغا جواب عليه قبل ما يقفل التسكين ... دحين في التسكين مكتوب جنب تقنية المختبرات والتمريض ( علوم طبية تطبيقية ) .. طيب مو الاتنين في نفس الكلية ؟؟ ليش فصلوها عن بعض ؟؟ مو الدراسة في الاتنين نفس المواد ..؟؟ وهل ينفع احول بعد سنة للطب او طب اسنان ...؟؟؟ :(:( بليييييز جاوبوني

العلوم الطبية التطبيقية اللي مكتوب جنبها تقنية مختبرات دي تشمل
1 - المختبرات 2-الأشعة 3-العلاج الطبيعي 4-التغذية الإكلينيكية
ولو اخترتي دي بعد ماتنقبلي يخيروك اي تخصص تبي من دي الأربعة

لكن اللي مكتوب جنبها تمريض دي لو اخترتيها حيحطوك تمريض

اما بالنسبة للتحويل ما أقدر افيدك ............ادعيلي اجيب درجة حلوة في الأحياء بكرة

[No_0ne]

ثانيا : في اختبار اون لاين انجليش ومعلومات عامه دا الشي اللي صدمني بس حسيتو سهل من كلامها ما قالت عن الشي الكتير

لا تعليق ... دليل ان ما عندهم ثقا في المناهج الي هوما حاطينها بنفسهم ...
الله يسهلها للجميع يارب :)
حلو انكم روحتو وسالتو و دا المفروض...
لكن اختبار اول مرا اسمع بيه و هل بيكون اجتياز المقابله معتمد على دا الاختبار و الا هوا الي بيئاهل للمقابله ؟؟؟؟؟
.......... يا ذا الطب الي كل مالهم بيعقدوها زيادا...
و عندي ملاحظه... في احد الطلاب هنا راح و سئال عميد او شي زي كذا مني فاكرا في كليه الطب ...
وقال ان المقابلات هتكون في 19-20 \7 لإي دي الايام يعني .؟؟؟؟
من جد ما ينعرف لهم ...........

[Doux Rash]

ايش دا كل شويا يطلعو بكلام !!
وكلو تناقض كمان :s
كيف اختبار انقلش يعني ايش العبط دا ؟ انا ادرس سنة تحضيرية ودوام ستمية ألف ساعة ومواد هما طالبينها
وفي النهاية كمان اختبار ؟!!!!
ودا غير المقابلة ؟
حسبي الله بس ، الله يكون في عوننا ..

[haay]

^_^ الله يسهل للجميع

[No0o0oN]

إنا لله وإنا إليه راجعون
ما نقول غير كذا بس والله يعيننا ويساعدنا يارب .
الناس كلها ما شاء الله خلاص رح يبدأوا يدرسوا واحنا بنصير معلقين
الى شهر 10 يعني حتى اذا ظهرت نتائج القبول لسى ما يعتبر قبول ...استغفر الله .
الله يسهل علينا ولا يضيع علينا تعبنا :( .
بس عندي سؤال لو سمحتي انا ماني فاهمه هما رح يقبلوا عدد اكبر من المعتاد ويخلو ناس انتظار ام لا ؟؟
وكمان سؤال تاني كيف قدرتي تدخلي كليه الطب ؟؟عشان انا بكره ان شاء الله رايحه .
والله يعطيك العافيه وشكرا مره كثير انك رحت وسألت وموفقه .