احمد الشقيري يقول 70% من فتيات المملكة لديهن علاقات غرامية غير شرعية .. وانا اقمت علا

[نسووومة]

اهلا اخويا :)

واللهي انا متأكده من اللي قاعده أشوفه لأن احنا البنات اللي جوه المجتمع وشايفين بعيوننا ماقالنا الشقيري حاجه جديدة ..

اصلا دحين سارت الوحدة تستغرب من التانيه لو انها مالها علاقة بأحد "سواء بنت أو ولد" يعني تحس انها معقده وحالتها صعبة وكده ... وسار الطبيعي انو الوحدة يكون لها بوي فريند ... على اقل تقدير واقرب مثال وانا راجعه من الجامعة في الباص كل الهرج اللي أسمعو يا إما وحدة تحكي التانيه على صاحبها .. يااما وحده قاعدة وعايشه جو الأخت مع الجوال .. وكم وحدة اللي قاعدين ساكتين "دا حكمي في الباص بس" امكنهم مايبو يتكلمو ماادري ..تخيل دا اقولك في الباص اللي مافيه الا كم بنت يتعدو على الأصابيع فما بالك بمجتمع كامل ...

ازا زعلانين على 70% فمستحيل انها تنزل عن 50% بأي حال من الأحوال ... وانا ان شاءالله ناوية أعمل استبيان بس المشكلة انو مو كل الناس يقولوا الصراحة والحقيقة ... وياكثر اللي ظاهرهن التقى والعفاف وهم في الحقيقه الله يستر منهم ...زي ماقالت سوار ... سار الواحد ماهو عارف مين الطيبه من البطاله .. والله يرد كل وحدة كده ضايعه لدينها وحياتها واهلها أهم شي .. مو عيب ان الواحد يغلط بس اللي يستمر في الغلط الى نتائج فظيعة ... هادي المشكلة ..

وانا افكر اعمل بحث تخرجي عن دا الموضوع وأدرس الموضوع من الناحية النفسية أكثر ... والله يعين ان شاءالله ..

واتمنى ماحد يزعل من كلامي .. بس اللي نشوفه ونسمعه مو قليل .. وعالنقيض فيه بنات قمم ماشاءالله في الذوق والاخلاق وكثير منهم عرفتهم بالمنتدى .. والله يحفظنا واياكم ويرزقنا بالصحبة الصالحة ... ودعواتكم ... وسوري عالاطاله :)