رحلتـــي باختصار!!

[بريد الاحساس]

عندي سؤال ..
أنا خواافه مرة .. ولما أشوف الدم يغمى علي ..؟؟
ينفع أدخل طب ؟؟
وش تنصحيني ؟؟

الله يوفقك يالغلا

[لقيت روحي]

المشاركة الأصلية كتبت بواسطة بريد الاحساس عندي سؤال .. أنا خواافه مرة .. ولما أشوف الدم يغمى علي ..؟؟ ينفع أدخل طب ؟؟ وش تنصحيني ؟؟ الله يوفقك يالغلا

اجــل لو شفتي اعضاء الجسم الداخليــة .. ايش بتسوي ..؟؟

[dr.CILIA]

المشاركة الأصلية كتبت بواسطة بريد الاحساس عندي سؤال .. أنا خواافه مرة .. ولما أشوف الدم يغمى علي ..؟؟ ينفع أدخل طب ؟؟ وش تنصحيني ؟؟ الله يوفقك يالغلا

ويوفقك امييين
انا كنت اخاااف من الدم لدرجه مرره زرت قريبه لي في المستشفى حصل لها حادث-ذيك الايام كنت مقدمه على الطب بس ماطلع القبول - وانا ماشيه الدنيا حولي كلها دم ماوصلت الغرفه عندها الا انا طاااااااايحه عند الباب مااحب اشوف ولا اشم ريحة الدم كانت فشللللله وفرحانه عند اهلى قال مقدمه طب بس دحين عااادي ندخل العمليات ونلعب في الدم على كيفنا الشغله يبغالها تجمدي قلبك شوي يعني لما احد يتعور اقعدي لاتشردي ومع الايام حتتعودي

meary:أنت الاروع اشكر مرورك

بنت ابوها: شكرا على مرورك وانا في الخدمه أي استفسار او خدمه انا جاااهزه نخليها مايطلبه المشاهدون ولا المستمعون^_^ موفقة ان شاءالله في دراستك الله يختار لك الأفضل

[dr.CILIA]

نتابع

- هل هناك متسع من الوقت للتسلية والمرح ؟

بالتأكييييييد في أحيان وسط الدوام وزحمته نلاقي أوقات للتسليه أيام ماكنا في الجامعه كان عندنا النادي الرياضي وكنت احب العب سله والعب بالدراجات وكنا نحضر المباريات اللي في النادي نروح نلعب عالاجهزه يمكن بشكل يومي وكمان في النت صح كل وحده عندها نت في بيتها بس مع الجماعه له طعم غيير
وفي المستشفى مافي اماكن للعب طبعا بس نسلي نفسنا بنفسنا وكمان في غرفه في قسم الاطفال حقت انتظار وفيها العاب طبعا ماقصرنا معاها نلعب ونستانس احلى شي الواحد يستمتع بحياته هذا غير الحفلات اللي لازم تقريبا كل اسبوعين نحتفل مع نفسنا وفي اي مناسبه مانقصر واحلى شي بعد الامتحانات لازم عندنا حفلات محترمه غير النشاطات اللي خارج الجامعه
الخلاصه في وقت محترم للتسليه للي يحب يتسلى طبعا بس برضه تفضل محدودة الزمان والمكان (نعمه الحمدلله)

[dr.CILIA]

- ما هو تخيلك لمستقبلك مع الطب ؟ وماذا تحبين أن تتخصصي ؟

والله انا انسانه احب التفاؤل ومن هذا المنطلق أتخيل أنه ان شاءالله حيكون ابداااع ان شاءالله ربي ماحيضيع تعبي وحيكرمني أتوقع اكون دكتوره مو ممتازه مرره بس يعتمد عليها وأنا دايما أطلب من ربي يجري على يدي فتح في الطب لم يشهده من قبل وانا واثقه من كرمه
بالنسبه للتخصص !!
زمان كنت كل سنه أفكر في تخصص جديد
يعني قبل ماادخل طب كنت ابغى ياأمراض خبيثه او عيون
بعدين فكرت في التشريح وبعده فكرت في علم الامراض بعدين جاء على بالي الطب الشرعي وكمان فكرت ولازلت في المفاصل والروماتيزم
ولسه محتاره الى الآن بس في بالي ثلاث اشياء اساسيه وقابلة للتغيير

نساء وولاده> تخصص عقم واطفال انابيب
جراحه>تخصص جراحة مناظير
شي اسمهoncologyيدرس الامراض الخبيثه وطرق علاجها

لا تنسوني من دعواتكم لأني لسه محتاره ^_^

.
.
.
يتبع

[Heba EB]

المشاركة الأصلية كتبت بواسطة dr.CILIA أطلب من ربي يجري على يدي فتح في الطب لم يشهده من قبل وانا واثقه من كرمه

الله يوفقك ، ونشوفك من أفضـل الدكاترة

بما انك اتكلمتي عن التخصصات / فأبغى أتفلسف

لما فتحت صفحة كلية الطب هُنـا < الأقسام العلمية ( التخصصات )
مالقيت تخصص طب نفسي ..

فـ تعرفي إذا في تخصص نفسي هنا في الجامعة ؟
وإذا في .. فـ كم سنـة دراسته بعد البكالوريوس ؟


:


مشكورة يـ دكتـورة
نُتابـع ^_^

[JuStice]

المشاركة الأصلية كتبت بواسطة dr.cilia نتابع - هل هناك متسع من الوقت للتسلية والمرح ؟ بالتأكييييييد في أحيان وسط الدوام وزحمته نلاقي أوقات للتسليه أيام ماكنا في الجامعه كان عندنا النادي الرياضي وكنت احب العب سله والعب بالدراجات وكنا نحضر المباريات اللي في النادي نروح نلعب عالاجهزه يمكن بشكل يومي وكمان في النت صح كل وحده عندها نت في بيتها بس مع الجماعه له طعم غيير وفي المستشفى مافي اماكن للعب طبعا بس نسلي نفسنا بنفسنا وكمان في غرفه في قسم الاطفال حقت انتظار وفيها العاب طبعا ماقصرنا معاها نلعب ونستانس احلى شي الواحد يستمتع بحياته هذا غير الحفلات اللي لازم تقريبا كل اسبوعين نحتفل مع نفسنا وفي اي مناسبه مانقصر واحلى شي بعد الامتحانات لازم عندنا حفلات محترمه غير النشاطات اللي خارج الجامعه الخلاصه في وقت محترم للتسليه للي يحب يتسلى طبعا بس برضه تفضل محدودة الزمان والمكان (نعمه الحمدلله)

.

ما شاااء الله عليكم آخدين حقكم في التسلية والإنبساط تالت ومتلت !

كنت متوقع إن اللي يدخل طب يكون وقته للتسلية والفلّة جدًا جدًا محدود لدرجة إني قرأت عن بعض طلاب الطب في مدونة

إن تسليتهم المعتادة كانت إنهم يتغدوا أو يتعشوا في مطعم مرة وحدة بالأسبوع من باب التغيير بدل أكل البيت ومطعم الكلية !! ههههه والله مرة ضحكت وأحلى شي كاتبين :

"وقت التسلية لدينا مدروس ومحسوب جيدًا... " (:

الله يوفقك وكل طلاب وطالبات الطب في البلاد الإسلامية ويفتح عليهم يااا رب

.

[dr.CILIA]

نتابع..

- كيف يعيش طالب أو طالبة الطب وكيف هي حياتهم ؟ هل هي جحيم وانطوائية كما نسمع دائمًا ؟

زينا زي الناس العاديين اكلين شاربين نايمين بس اغلب الوقت مداومين بس بصرحه انا اغبط الناس الثانين على راحه بالهم ولا يمكن انا عشان طبعي اشيل هم مااعرف بس احس كل ماقربنا من نهاية الدراسه يزداد الهم رغم ان الناس شايفين انه مين قدنا كوننا في الطب وانه احنا دكاتره -صحيح كل شي من ربنا حلو واحنا في نعمه وفضل كبير الحمدلله بس كمان كل شي له ثمن- نمارس حياتنا بشكل طبيعي بس يمكن بشكل أضيق من الناس الباقين يعني لمن يجي نهاية الاسبوع صح بعض الاحيان ماعندنا امتحانات يعني فاضيين بس يكون الواحد مهلوك طوول الاسبوع فنبغى نقعد في البيت على قولتهم نستكن وكمان لما يكون عندنا امتحان ونظرا انه المناهج ماشاءالله مرره دسمه فلازم نبدأ نذاكر من قبلها بأسبوعين واحيانا ثلاث وتقريبا اوقات المذاكره نكون شبه معزولين عل العالم الخارجي -عشان احنا شطار ماكنا نذاكر اول بأول- من هنا طلع علينا انه احنا انطوائيين بس حقيقة احنا ابدا مو انطوائيين لو احنا كدا كان ماجانا ولا مريض ولا اتكلمنا مع احد بالمره
اما حكاية جحيم ماتجي مو لهذي الدرجه

[dr.CILIA]

بما أنكِ على مشارف سنة الامتياز والتخرج فما هي نصائحك للطلبة المستجدين من واقع ما عايشتِه خلال سنوات دراستك ؟

والله احس مو انا اللي ممكن اعطي نصايح لكن عندي كم كلمه ان شاءالله تكون مفيده
1-اول حاجه وياريت دايما تخلوها في بالكم في كل عمل مو بس في الدراسه النيه اخلصوا النيه كل يوم لمن تكونوا في السياره وانتو رايحين ع الجامعه و حتى قبل ماتبدأو مذاكره حطوا في بالكم انا ليش بذاكر ؟ انا ليش بأداوم ؟ وانووا بيها اللي تبغوا وخليكم دايما قريبين من ربنا عزوجل عشان (اعرف ربك في الرخاء يعرفك في الشده)
وترى دعوات الوالدين ورضاهم تفتح الخير الكثير..

2-تذكروا دايما أنكم تحملوا امانه كبيره ومسؤليه ولا تتكاسلوا ابدا او تستحوا انكم تتعلموا من اي احد ولا يقتصر علمكم على الكتب والجامعه في طرق كثير ممكن تتعلموا بيها حتى الناس ممكن يعلموكم ترى ماحنفهم الامراض مزبوط إلا من اللي عانوا منها ودايما الدكاتره يقولولنا:كل مريض كتاب مفتوح لطبيبه.

3-حاولوا قد ماتقدروا تديروا وقتكم بشكل سليم عشان تكسبوا الطب وماتفوتوا أي لحظه في حياتكم

4- دايما الناس حتى من أيام المدرسه يقولوا ذاكروا أول بأول هنا ماحنقول ذاكروا بس حاولوا كل يوم تقرأو شي لو بسيط عشان هنا المذاكره ماتفيد قد ماتفيد معلوماتك اللي بتستخدمها يوميا يعني انت لو قرأت بعدين تاني يوم رحت طبقت بشكل عملي خلاص مايحتاج مذاكره بعد كدا ابدا وهذي مو بس مجربه الا بنتبعا في حياتنا الطبيه.

5-في الطب وحسب ماعلمونا دكاترتنا الافاضل كل معلومه تحصل عليها لازم تكون عارف مع المعلومه مصدرها من فين ولازم يكون المصدر موثوق عشان كثير تحصل حكايات اختلاف وجهات النظر والآراء واحنا نكون مغلوبين في الاخر لأنه ما باليد حيله واحنا الصغار. وكمان لازم زي مايقولوا الكبار احنا نقول سمعنا واطعنا ولانحاول نتفلسف عشان حتجي على راسنا بعدين.

6-بما اننا لسه في المعلومات لازم تكون المعلومات في دماغنا مرتبه زي الكومبيوتر يعني اغلب الدكاتره يحبوا الترتيب في الاجابات سواءا في العملي او النظري وبيني وبينكم اصلا لمن يكون الواحد مرتب عمره ماينسى اغراضه كذلك في المعلومات اللي مرتب عمره ماينسى معلوماته.

7-انصح وبشده في التدريب فترات الصيف لأنه جدا مفيييد وتشوف اساليب غير وحالات غير وكمان فرصه للتعلم غير الكتب والاشياء التقليديه. وكمان حضور المؤتمرات والدورات.

8-في بعض الاحيان المذاكره الجماعيه او بالاصح المراجعه الجماعيه تكون مفيده بالذات اذا الناس اللي بتذاكر معاهم مستواهم افضل منك حتترسخ معلومات كثير وتكون في فرصه للإجابه على الاسئله اللي ماعرفتها في المذاكره او الاسئله اللي احترت في حلها واحنا والله استفدنا من هذي الفكره في حل الاسئلة الاختياريه نجلس مع بعض ونحل النماذج توكن في فرصه للنقاش.

واخيرا الطب جدا جميل في عيون محبيه وبرغم التعب اللي فيه الا انه حلو ومااحد يندم على دخوله ابدا

بالنسبة للأسئله اللي عندي كدا خلصت لكن رحلتي في الطب لسه مطوله فاللي عنده أي اسئله أو استفسارات انا حاااضره وفي الخدمه

أعتذر عن الإطاله وأشكر تواصلكم وتشجيعكم وشكر خاص للأخ Justiceصاحب الفكرة والأسئله.
أخلص الدعوات بالتوفيق والنجاح للجميع
ولاتنسوني من صالح دعواتكم

أختكم: د.سيليا

[Dr.AlJuhani]

المشاركة الأصلية كتبت بواسطة dr.cilia نتابع - هل هناك متسع من الوقت للتسلية والمرح ؟ بالتأكييييييد في أحيان وسط الدوام وزحمته نلاقي أوقات للتسليه أيام ماكنا في الجامعه كان عندنا النادي الرياضي وكنت احب العب سله والعب بالدراجات وكنا نحضر المباريات اللي في النادي نروح نلعب عالاجهزه يمكن بشكل يومي وكمان في النت صح كل وحده عندها نت في بيتها بس مع الجماعه له طعم غيير وفي المستشفى مافي اماكن للعب طبعا بس نسلي نفسنا بنفسنا وكمان في غرفه في قسم الاطفال حقت انتظار وفيها العاب طبعا ماقصرنا معاها نلعب ونستانس احلى شي الواحد يستمتع بحياته هذا غير الحفلات اللي لازم تقريبا كل اسبوعين نحتفل مع نفسنا وفي اي مناسبه مانقصر واحلى شي بعد الامتحانات لازم عندنا حفلات محترمه غير النشاطات اللي خارج الجامعه الخلاصه في وقت محترم للتسليه للي يحب يتسلى طبعا بس برضه تفضل محدودة الزمان والمكان (نعمه الحمدلله)

في هذي صدقتي هههههههههههههههههههههههههههههههههههههه
الحفلات لأي سبب
بعد كل سستم نخلصه"لنو أحنا النظام الجديد اللي هو ماشي بالسستمات""
نحتفل وكيكه ودنيا
هههههههههههههههههههه
وأي وقت يجينا فراغ نروح الجم ونلعب
لكن الحفلات كانت سنه ثالث كلها حفلااااااااات ههههههههههههههههههههههههههههههه
مدري كم كيكه جبنا