تجربة بنت في تعلم الانجليزي بنفسها

[Fufroora]

اختي الأمواج ..

شكرا على مرورك ومشاركتك معنا

الله يعينك .. خصوصا انك انتساب .. يعني مافش انجليزي كل يوم !

بس اكيد حتلاقي الفرصة انك تتكلمي انجليزي



ما اعرف طبيعة الاستاذات والدكتورات في قسم الانجليزي ..

بس اعتقد لو ضربتي صحبة مع وحدة استاذة او دكتورة حبوبة .. ماراح تمانع انك تجلسي معاها وتتكلموا في اي موضوع
يعني بالشامي .. تطقوا حنك !



وتقدري كمان تتكلمي بالانجليزي مع الباعة الاجانب .. الفلبينيين والهنود في الأسواق ..

انا لمن اروح سيتي بلازا .. ما اتكلم مع الفلبيني إلا بالانجليزي .. حتى لو كان يفهم عربي .. بس احاول استغل اي فرصة عشان استخدم اللغة الانجليزية !



ولو مرة ما لقيتي فرصة .. عليكي بكتابة مذكراتك ..
أصلاً بعد سنة لمن ترجعي تقرأيها .. حتتفاجأي بأن اللغة كان ماشي حالها ... وصرتي للأحسن .. وتكتشفي اخطاء في كتابتك !

والعكس .. لو كانت لغتك في البداية جيدة .. واهملتي استخدامها لفترة .. ورجعتي قرأتي مذكراتك .. حتقولي في نفسك .. ياسلااام .. انا كنت اكتب زي دا المستوى !!



في مقولة انجليزية تقول
use it or lose it
يعني استخدمي اللغة أو انك حتخسريها !

وفي المقابل .. لمن خفت من اني انسى اللغة .. واشتكيت لصاحبتي الامريكية ( كانت معايا في الثانوية )..
قالتلي .. على الأقل لمن ترجعيلها .. ماراح ترجعيلها من ABC !!!!

ترى كل المسألة تعتمد على الثقة بالنفس !

إذا اعطيتي نفسك ايحاء انك تعرفي تتكلمي انجليزي .. حتلاقي نفسك تعرفي تتكلمي بطلاقة وبدون تأتأة ..
ولو قلتي لنفسك انا ما استخدم اللغة .. وحأنساها .. حتلاقي نفسك تفكري كتير قبل ما تتكلمي !

فكرتيني بماما وخالتي ..
رغم ان ماما جامعية .. وخالتي معاها الثانوية وبس .. لكن خالتي تحاول تتكلم انجليزي مع الممرضات في المستشفى بأبسط واسهل الكلمات ..

مثلا قالت للممرضة :
Can she drink apple juice ?

ماما تعرف نفس الكلمات دي .. وتعرف معناها .. بس ما وثقت في نفسها .. ولا حاولت تستخدم الكلمات إلي تعرفها وكل الناس يعرفوها !


المهم..

طولت عليكم P:


الله يعينك ويوفقك !