نصائح قبل يوم السبت

[تركي4444]

المشاركة الأصلية كتبت بواسطة قادم نماذج الاختبارات السابقة فين نحصلها في المكتبة كمان ؟وكم اسعارها

ايوا في المكتبة

عادي تحصلها داخل الجامعة انت دايركت حتعرف فين

سعرها احيان 2 . 5 . 10 يعني سهالة

[قادم]

المشاركة الأصلية كتبت بواسطة تركي4444 ايوا في المكتبة عادي تحصلها داخل الجامعة انت دايركت حتعرف فين سعرها احيان 2 . 5 . 10 يعني سهالة

الف شكر ياغالي

[glass fleet]

الله يوفقكم يارب انا راح اضيف شيء واحد بس
انه فيه ناس تصعب عليهم الملخصات فا يجربوا يحضروا عند الدكاتره اللي يشرحوا كويس معليش لو تاخرت او فوت البريك عليك بس اهم شيء انك تفهم, واسألوا الدكاترة في كل شيء روحولهم في المكتب كتييير يكون تعاملهم راقي وماراح تخسروا شيء بالعكس راح تستفيدوا اكثر مما تتوقعوا.., وان شاء الله تتفوقوا وتقبلوا في الكليات اللي تتمنوها.

[Dr.Ammar]

والله كلامك يسطر بماء الذهب

جزاك الله خير يا صاحب الموضوع

واتمنى لك التوفيق

[n3omh]

ماشالله ماقصرت ..,

وأهم شى داكروا اول باول .., حركات التانوى والمدرسى ماتنفع ابدا ابدا


والله ىوفقكم ىارب :)

[تركي4444]

العفو

[hadeel a]

يعطيك العافيه البارود2007 على الموضوع الاكتر من رائع و أحلى شي أن كل اللي بيدخلو بيكتبو نصايحهم و كل اللي كتبو كلامهم مرره صح خصوصا تركي 4444من جد يا ريت موضوع نصائح قبل يوم السبت يتثبت ..
و حبيت أضيف نقطه مرره مهمه أن في أول محاضره فيزياء او كيمياء او رياضيات او احصاء حتقولكم الدكتوره على syllabus و معناه بالعربي مخطط المنهج الدراسي و تقدرو تحملو من موقع دكتورة الماده و تطبعوه أو تجيبو من مكتبة الخوارزم اللي في مبنى العلوم (مبنى 7) و حتلاقو في التمارين و الامتله اللي معاكم و لازم تداكروها فألتزمو بي و ابدا لا تتفلسفو و تحدفو شي بمزاجكم عشان الدكتوره ما شرحتو و لا ما ركزت علي لان غالبا الدكتوره اللي بتدرسكم مو هي اللي بتكون تحط أسئله الاختبار هدا الكلام مو يعني أن حضور المحاضرات مومهم بالعكس لازم تحضرو كل المحاضرات و تكتبو أو تأشرو مع الدكتوره عشان تعرفو تداكرو بس في التمارين و الامتله داكرو كل اللي معاكم في syllabus عشان لا تضيعو درجاتكم .
و أهم حاجه في المداكره أنكم تداكرو بتركيز و تفهمو كل حاجه يعني الاحياء هيا الماده الوحيده اللي مو مشكله لو ما فهمتو كل شي لان أسئلتها بتجي مباشره يعني في بنات كانو بيداكرو بس ما جابو درجات ترضيهم لان كانو بيداكرو بطريقه خطأ فأعطو نفسكم و قت كافي للمداكره و حاولو تخلصو مداكره و لو قدرتو مراجعه الجزئيه الداخله في الاختبار قبل يوم الاختبار عشان يوم الاختبار بس تراجعو و ترتبو أفكاركم و أبعدو أيام الاختبارات عن أي نوع من أنواع التوتر و دايما أفتكرو أن أنتو لازم تسو اللي عليكم و اللي كاتبو ربنا هو اللي راح يسير .
و زي ما قال البارود 2007 أن الدوام يبدأ من أول يوم مو من تاني أسبوع بس أبغا أوضح أن صح أول يوم في دوام بس غالبا الدكتورات ما يبدأو يداومو غير على يوم الاتنين من أول اسبوع فأول يوم ما يحتاج أنكم تروحو الجامعه غير ساعه أو ساعتين عشان تشوفو المباني و عرفت أن تاني يوم حيكون يوم ارشادي أنصحكم تروحو مو لازم تحضرو كلو لأن الكلام المهم يقولو في البدايه (و ضحت دي النقطه عشان البنات يقولو للي يوصلهم متيى يجي ياخدهم من الجامعه و عشان لا يضيع عليهم اليوم كلو بالجامعه ).
و أستمتعو بالسنه التحضريه لانها من جد حلوه بس لاتهملو مداكرتكم يعني لو رتبتو جدولكم حتدكرو و تنبسطو و تعملو كل حاجه تبغوها .
معلي طولت بالكلام بس يارب تستفيدو منو .

[clood]

اخواني

هل الملخصات بي اللغه الانجليزي ولا العربيه


من ناحيه الاسئله الاختبارات


هل حتى النصفيه <<ما اعرف اسمها في الجامعه

نذاكر من ملخصات


وهل تخرج الاسئله منها

مو قصدي تكون زيها يعني مثلن يجي سؤال حلو او طريقه حل مي موجوده في الملخص حق الماده او الدرس

غير موجود

[تركي4444]

المشاركة الأصلية كتبت بواسطة clood اخواني هل الملخصات بي اللغه الانجليزي ولا العربيه طبعا الامثلة بتكون بالانجليزي والمصطلحات غالبا تجي مترجمة من ناحيه الاسئله الاختبارات هل حتى النصفيه <<ما اعرف اسمها في الجامعه نذاكر من ملخصات على حسب اللي يريحك وهل تخرج الاسئله منها خذها مني مافي ولا ملخص يقدر يعطيك نفس اسئلة الاختبار مو زي الثانوية يعني انت لازم تفهم الافكار لك باب او درس وتحل اكبر عدد ممكن مالا الامثلة مو قصدي تكون زيها يعني مثلن يجي سؤال حلو او طريقه حل مي موجوده في الملخص حق الماده او الدرس غير موجود

مافهمت ايش قصدك في اخر نقطة

[hadeel a]

المشاركة الأصلية كتبت بواسطة clood هل حتى النصفيه <<ما اعرف اسمها في الجامعه نذاكر من ملخصات في الجامعه في كل المواد في اختبار دروي اول (30درجه) اختبار دوري ثاني (30درجه ) و النهائي (40درجه) .. ما عدا الحاسب توزيعه غير و الانجلش يكون قي اختبار نصفي و نهائي بس لكل level. وهل تخرج الاسئله منها مو قصدي تكون زيها يعني مثلن يجي سؤال حلو او طريقه حل مي موجوده في الملخص حق الماده او الدرس غير موجود

نصيحه مني لا تعتمد على الملخصات يعني داكر من الكتاب و خلي الملخص انك تراجع منو أو ادا ما فهمت شي ترجعلو أنا عن نفسي كنت بس بأداكر من الكتاب و احل نمادج كتيره و ادا ما فهمت شي أروح لمدرسه تفهمني بس في الاحصاء جبت ملخص أ.جمال السعدي و كان مرره حلو بس ما حسيتو يغني عن الكتاب .