جامعة الملك عبد العزيز و تخصص الطب

[روعة المزن]

هذه اول مشاركة لي بالمنتدى بس كنت طول العام متواجدة اقراء مواضيعكم وتعليقاتكم واشوف معانتكم
فحبيت الحين اشارك واقولكم تجربتي او قصتي وإن شاء الله بعدها اكون عضوة مميزة معكم بالمنتدى

طبعا البداية كانت لما انقبلت سنة تحضيرية بجامعة الملك عبد العزيز كنت مرة فرحانة ومتحمسة وماكنت اعرف ايش يعني تحضيري ولا حاجة بس المهم اني انقبلت جامعة .
بس ماما كانت مرة متخوفة من التحضيري عشان كانت تبغاني طب وكانت تقولي المواد صعبة وكله بالانجليزي وحاتقدري تجيبي معدل وهما طالبين 150 طالب وطالبة للطب وانت ايش بينهم ومن الكلام هادا .
المهم وصلتني رسالة من جامعة الملك عبد العزيز على الجوال اللي يبغى يقدم في جامعة الحدود الشمالية وهي جامعة تابعة لجامعة الملك عبد العزيز يعني اللي يتخرج منها كأنه اتخرج من جامعة الملك عبد العزيز وفي الرسالة موجود الويب سايت حق جامعة الحدود الشمالية
فأنا يومها كنت مرة طفشانة فقلت خلني ادخل كذا اشوف كيف شكل الجامعة وايش فيها لما دخلت لقيت من بين التخصصات انهم اول سنة يفتحوا طب فيها و 30 مقعد للطالبات و 30 مقعد للطلاب عشانها اول سنة وماكانوا طالبين درجات القدرات ولا التحصيلي يعني انك تدخل الطب بمعدل المدرسة فا أنا هنا طنشت وماخذت اعتبار للموضوع فكنت جالسة اتكلم مع ماما عادي واتكلم معها عن الطب وعن التخصصات فقتلها انه في جامعة كذا وكذا فماما مرة اتشجعت وقامت تترجاني انه اقدم على جامعة الحدود الشمالية وانا كنت رافضة الفكرة نهائيا كيف انه انا ادرس بالحدود الشمالية وهي تترجاني ولما عرفوا اخواني الكبار بالموضوع قعدوا يشجعوني ويقولون لي احسن لك وهناك على الاقل انك ضامنة الطب احسن من انك تدرسي سنة كاملة وماتعرفي مصيريك فين
فتوكلت على الله وقدمت على معدلي بالثانوية وطبعا قبلوني طب .
وانا الحين ادرس سنة اولى طب بجامعة الحدود الشمالية اللي هي تابعة لجامعة الملك عبد العزيز وعشان مافي سنة اولى طب دحين بجامعة الملك عبد العزيز فقالوا لازم ندرس زي موادكم سنة اولى اللي هي خطة أ عندكم والسمستر التاني مواد خطة ب بس الفرق انه هنا مايحتاج معدل بس اهم شي النجاح لان خلاص انا ضامنة حالي انه طب لما قدمت قدمت على طب فا أهم شي النجاح بس احنا ندرسهم كلغة وعشان مافي عندكم طب
الحمد الله لقيت المواد مرررة سهلة والدكاترة عندنا كلهم حلوين وطيبين ومتساهلين معنا بالاسئلة لدرجة انه كلنا بالاختبارات الدورية ناخذ الفل مارك و كان اختبار الفاينل تبعنا من شابتر 1 الى شابتر 4 فقط لكل المواد .
و جدول الاختبارات كان عندنا اسبوعين سبت واربعاء من كل اسبوع وخلصنا الاختبارات يوم الاربعاء من الاسبوع هاذا والحمد الله كانت الاختبارات مررررررة سهلة
وإن شاء الله الحين بعد ماكتبت قصتي اصير صاحبتكم عشان افيكم وتفيدوني
اختكم روعة المزن