انتبهو يا بنات ..... الحاضر يعلم الغائب >>> مهم جدا <<<

[نضال]

بايوك

انت بتتكلم عن عادات و تقاليد مناطق بكاملها !!


يا حبيبي لما تقول لي ان دي العادات عند اهل الجنوب و الشمال بس فـ ترى انت قاعد تتكلم عن 70% من سكان المملكة تقريبا ...


قبايل اهل الجنوب بشكل عام يشكلوا نسبة كبيرة من سكان المملكة ...

"اتمنى ان ما يفهم احد اني انبذ عادات دي القبايل ,, بالعكس , دي القبايل عندها عادات افتخر انها موجودة فينا كسعودين ... "

[x_bioc]

طيب ايش رايك يا نضال لا تنزل تحت ولا تطلع فوق


خلي الناس في حالها


يمكن هما يستخدمو البلوتوث بالطريقة الصحيحة



خلينا في الاقليم الي احنا عايشين فيه


الحجاز


اوكي



ياللله اترك المكريفون لا إلك

[نضال]

و الحجاز يمتد من فين لفين ؟؟؟


الحجاز يشكل الجهة الغربية من المملكة بكاملها


عاد انت افتح الخريطة و شوف بنفسك


لكن خلينا نتكلم عن جدة على وجه الخصوص ...


لو جيت و انت طالب في الجامعه . لساعك ما اتخرجت و طلبت يد بنت جاركم مثلا ...


تتوقع يوافقوا ؟؟


اول شي حيقولوا لك امسك الباب , و لما تمسك وظيفتك تعال تاني مرة ,,

مع ان الدين و الشرع يقول


اذا اتاكم من ترضون دينه و خلقه فزوجوه


لكن ايش اللي يمنع ؟؟ التقاليد و العادات


برضك منت مقتنع ان عاداتنا بدات تاخد مسار تاني غير الدين ؟

[x_bioc]

نضال





يا حبيبي مو شرط الكلام الي تقوله صح



اهم شي انت تقدر تتحمل مسؤولية اسرة او لا ... تقدر تفتح بيت او لاء



هذي هيا القضية



طب افرض انك طالب و ربنا فاتح عليك فيلا و سيارة و خدم و مصروف ولا راتب مدير الجامعة


حيرفضوووك ؟


مستحيل و خاصة انك دين و خلق على قولك


خلينا واقعيين شوية لو جا واحد خطب بنتك

على دين و خلق


بس قالك ما نبغى فرح و لا يحزنون


كلها نستأجر استراحة و نعزم حبايبك و حبايبي و العروسة تنزف من باب السطووح لباب السيارة





و السكن

كثر الله من الغرف الي في البيت


او في الملحق الي في السطوووح


و الرزق من عند الله


مكافئتي على مكافئتها و الوالد إن شاء الله ما يقصر في مصاريف االبيت




توافق؟!!!

[نضال]

بايوك ,, لا تحاول تلف حول الموضوع

العادات صارت شي , و الدين صار شي

الدين يقول اذا اتاكم من ترضون دينه و خلقه فزوجوه ...

عاداتنا تقول اذا اتاكم من ترضون وظيفته و فلوسه فزوجوه ...


شايف انه فيه اي تطابق بين اللي يقوله الدين و اللي تقوله العادات؟؟؟


دا الشي اخر سن الزواج عندنا , مع ان الدين يامر بالزواج المبكر

يعني في الاخير

السبب هيا العادات اللي كنت اقول انها بدات تتخذ مسار مختلف عن مسار الدين


اما بالنسبة لسؤالك في الأخير ...

اذا اتقدم واحد لاختي بنفس دي المواصفات ..

و كان رجال بكل ما تحمله الكلمة من معنى ,,

و كان طالب جامعه و تخصصه ممتاز


بالتاكيد راح اوافق ,, خصوصا اذا كانت اختي نفسها موافقه

[x_bioc]

اهوه مشالله عليك يا نضال


لا فكرت في عادات ولا تقاليد


و اكيد في امثالك كثير


و اعرف ناس يملكو لبناتهم طلبة جامعة


على اساس بعد التخرج يتم الزواج




على فكرة يا نضال هذا مو موضوعنا




تفتكر الزواج لحالة حيكون حل للقضية ؟


انا ما اعتقد


لو خلصنا من حكاية الزواج حتطلعلنا حكاية الخيانة الزوجية والمنكرات و التربية الفاشلة و هلما جرا ...



انا شايف ان محا نقدر نصلح دولة الا اذا اصلحنا شعبها و محا نصلح الشعب الا اذا اصلحنا المناطق

و حا نقدر نصلح المناطق الا اذا اصلحنا المدن و محا نقدر نصلح المدن الا اذا اصلحنا الاحياء

و محا نقدرن نصلح الاحياء الا اذا اصلحنا الجيران و محا نقدر نصلح الجيران الا اذا اصلحنا الاسرة



الاسرة هيا اساس المصايب كلها

[نضال]

بايوك

المشاكل اللي يعاني منها مجتمعنا تتمثل دائما في فئة الشباب ...


و معظم المشاكل تنصب في فئة الفراغ العاطفي و ما يخلفه


الزواج هو الحل لسد الثغره الحاصلة


اما بالنسبة للمشاكل التانيه فهي على اي حال بتكون بنسبة بسيطة .. اهون بكتير من اللي بيحصل في اسواقنا و شوارعنا


و سواء كنت انا بافكر بطريقة مختلفه او كنت انت بتفكر بنفس الطريقة , يبقى السواد الاعظم من المجتمع يفكر بالاسلوب العقيم


و يتجاهل كتير من الاسر القاعدة اللي تقول ان العريس اذا ما جا من الباب بيجيك مع الشباك ..

قفل الشباك , و راح يجيك من الجوال

قفل الجوال و راح يجيك من الانترنت

قفل الانترنت و راح يجيك من الشارع

قفل باب الشارع و راح يجيك من الجامعه ,,,, الخ


طيب انا عندي سؤال

ليه ما كانت المصايب اللي بنشوفها في جيل ابائنا ؟؟

[x_bioc]

الزمان اول يختلف عن دحين بجميع المقايس


كانت عندهم مصايب ،يمكن احنا في زمننا نشوفها عايدي



مافي زمن ما يخلى من المصايب


و مصايبنا في زمن اولادنا حتكون عايدي



حيستمر الوضع الين اخر الزمان ، الى ان تكثر الفتن و المصايب و يغطي الشر الكرة الارضية

الزواج هو الحل لسد الثغره الحاصلة

انا شايف ان الناس بتتزوج و بتخلف و المصايب بتزيد



تقريبا نسبة البنات الى الاولاد مرتفعة قد تصل الى الضعف


عشان كذا بنشعر ان البنات حيعنسو و نسبة الزواجات بتقل

[NooDy]

الله يستر علينا . مايعمل كده الا الي بلا ضمير وبلا مبادئ..
وحيجيله يوم لايستعجل ربنا موجود, اذا بنت صورت فحيجي من يصورها وتنفضح فضيحه اكبر من الي عملتها لغيرها, واذا ولد فحيجي من يصور اخته ولا مرته .. ربنا مايسيب حق احد ضايع..

هوا صح المفروض يمنعوا جوالات الكاميرا , بس مو عليا انا p: ( انا نودي انا ) , قصدي انا بدخله الجامعه بالدس , والله انا عندي مبادئ ومستحيل لو ايش ماسار اأزي لو عدوتي.. يعني بصراحه مرات يزودوها

بس بجد شكرا جزاك الله الف خير بايوك.. كلامك صح

[NooDy]

ممكن مداخلة بسيطه بين الاخ بايوك والاخ نضال؟؟ الو الو D:

بجد. بايوك كتير كتير كتير ياخدوا من الدين الي يبغوه ويمشوا على عادات غلط وعايشين كانهم فاصلين دينهم عن دنيتهم كتير اهالي مايعرفوا في الدين غير الصلاة والصوم وغطي وجهك يابنت . الدين اكبر وارقى من انه نجزءه . يعني من جد ماشيين على تقاليد غبية غلط .. اقولك حكاية تضحك : في ادميه خبلة زوجها عمره ماشاف وجهها تلبس ده البرقع الحديدي الي كده شكله غريب في بيتها اتخيل , انته بتتخيل معايا ؟في البيت لابساه ويوم ماشاف زوجها المسكين وجهها بالغلط ياحرام فضحت اهله ليه عشان تقاليدهم كده .

هيا بالله ايش تقول فناس زي كده دحين ده مو حرام, يحرموا حاجه حللها ربنا ويخترعوا دين على كيفهم؟؟ هدا مثال حي للعادات وبعدها عن الدين..

ويااخ نضال ترى دحين موضه الولد يخطب وهوا لسه مو متوظف . بردو كتير ناس يعملوها ويرضوا بيها على بناتهم بالذات اذا البنوته تبغاه.. سار مره عادي وشي مقبول. حتى بينخطبوا وهما بيدرسوا ويستنوا بعض سنيين زي الافلام المصريه :)..

وفي النهايه احترم نقاشكم لانه كل واحد فيكم ليه وجهة نظر وقد يكون فيها بعض الصحة., ودي وجهة نظري

معليش طولت عليكم بس ماقدر امسك نفسي في الفلسفه _دوود_ فلسفة العزراء ..

باي