<<<<<<شخصيات معاصرة بيننا>>>>>>

[Da_JokEr]

الناس معادن في منهم زي الالماس ناس غاليين وفيه زي النحاس ناس رخيصين

طبعا الناس كأمشاط المشط واصابيع رجولك(المفروض يدك بس مشي حالك) مو زي بعض

ولمن تختلط وتخالط وتجلس مع فلان وعلان تكتشف المزيد والمزيد من المعادن و الاصابيع كلهم

على بعضهم يكونوا شخصيات ويتكون منها المجتمع

ففيه ناس (اوادم) لمن تجلس معاهم تتنكد وتنغم ويجيبولك السكر والضغط وتكره نفسك وحياتك

وتلعن الساعة التي اتولدت فيها واالحيوان المنوي اللي جيت منه

نظرته للحياة سوداوية قاتمة لا ترى فيها للنور والنجاح ابدا

يعكر عليك عيشتك بمعنى الكلمة ومايسيب احد الا انتقده وحشه وقطعه.....

الحكومه يقطع فيها والبلدية يلعن فيها اليهود والنصارى مايسيبهم في حالهم اهله واصحابه(لوكان

عنده اصلا) ووزارة التجارة المالية والبترول والمستشفيات والشرطة وكل شي الله يصبر اللي معاه

هذا النوع من الشخصيات هي

الشخصية النكدية المنكدة الشؤومة

فيه شخصية نماكية خراشية ركبنجية

اللي يقول انا سويت وفعلت وهو لا سوا ولا فقص بيض بالعربي بياع كلام لمن تجلس معاه تحس

نفسك مالك داعي يطلع عيونك من كتر البكش والارانب اللي يقولها وما يهجد ولا يسكت تكون

حالته مزمنة جدا

واذا كان واحد شيبة وعجوز الله يستر يمتحن ملتك بكلامه ايش يقول: انا لمن كنت شباب كنت

اسوي واسوي وما اكل الا من عرق ظهري(قصدي جبيني) وانا لمن اطلع الشفا في الطائف اتسلق

الجبل وادور عالاكل واولع النار واشوي الكزبرة و..و...و....و...

انا لمن كنت شباب كنت اشيل عشرة انابيب غاز دفعة وحدة (هدا ارنب بماركة فيراري)

وما يسكت ولا ينكتم ولا يستحي على وجه من كتر البكش حقه

وعندك حل من اتنين

تجلس وتسايره وتسمعله الين ما يؤذن الفجر

او تصرف نفسك بأي طريقة (سكت امه وانتهينا قوله خلااااص كفاية واللي يرحمك)

وفيه الشخصية الطموحة الحالمة

هدول لمن تجلس مع واحد منهم بس يقولك انا لمن اكبر اسوي واسوي بس دحين ما اقدر او يقولك نفسي يكون

عندي فلوس (50مليون دولار) كنت اسوي بيها العمايل

فهدول الناس الزمن كفيل بهم يعني سيبهم عالزمن امكن يحققها يوم محد يعرف الغيب

وفيه الشخصية الانانية الحقودية

هدول ما يتمنوا لاحد الخير قلبهم اسود زي الفحم ينعكس على نظراتهم وتعاملهم

وتلاقيهم شلل مع بعض يسووا مقالب على بعض ويحسدوا نفسهم اعوذ بالله منهم

وفيه الشخصية القحروطية الناشفة الجلد اللي همو البخلة

هدول طماعين تقول عمرهم ما شافوا نعمة وهدول تلاقي هرجهم عن البلاش والتوفير ولا تجيب

سيرة الفلوس على لسانك لانهم سلاتيح بمعنى الكلمة(زي لصق جونسون) ووقت العزايم يطيح

في الاكل كأنوا ما اكل قبل كده زي المفجوع يالطيف بس وكمان تلاقيه دائما بلبس بشكل واحد مايغيره ولو ايش

فيه كمان الشخصية الكسولة الهادئة الكتومة

ما تعرف ايش وراه ولا ايش قدامه

ما يتكلم ولا يفرفش زي الكاتشب ثقيل دمه وبارد زي الثلج ماعنده احساس ابد ويحب يكبس المخدة تكبيس

ويتكلم بقدر الحاجة وبس امكن على باله الكلام بفلوس (وتحس كأنك تبغى تحط في فمه نص ريال

حتى يتكلم) بس ياما تحت السواهي دواهي وهدول يخوفو بجد , صحيح انو خير الكلام ماقل ودل لكن برضو

اعطي كل شي حقه مو يجيك الضيف تسكت وتسير اصم وابكم؟؟؟صح؟

وفيه الشخصية المتهورة المندفعة

اللي ماعنده ريوس أي شي تقوله يقولك قدام والراجع مهو برجال يعني مخنث فهدول ما تلاقيهم

راسين على بر كل يوم بموجه وهبقة حق مطارحات سيارات (مو مطارحات غرام) و.. و....

همو وغمه التهور والتحدي فالله يهديهم ويصلحهم ومو كل مررة تسلم الجرة ياحمزة

وفيه الشخصية الفيلسوفية المعقدة

اللي لازم يفرض كلامه حتى لو كان غلطان

وهدول غالبا يكونو متحذلقين ويسووا فيها انهم فاهمين الهرجة والحكاية (حتى بعض الاحيان تزبط معاهم)

ويكونو غالبا يلبسو نظارات وعليهم نظرات خصوصا الحواجب تعرفهم على طول من كلمة او نظرة

ومن طريقة كلاممهم تلاقيه يمسك على شي تمسيكة ما تنفك

وفيه كمان الشخصية المترفعة المتكبرة

اللي شايفين نفسهم وهو مايسووا تراب يسوا انهم هاااي كلاس وهمو اصلا سب كلاس

متكبرين ومغرورين على ايه؟؟؟ امكن على شوية فلوس ربنا رزقهم امكن على حسب ونسب

فرحان بيه امكن الله اعلم لكن هدول نهايتهم سريعة اوي وربنا هو الكبير والباقي دائما

وكمان الشخصية الفرفوشة الحبوبة الفلاوية

هدولا تلاقي الابتسامة ما تغادر وجههم ولمن تتكلم مع واحد منهم تحس انك تعرفه من زمان يدخلو

القلب على طول وترتحلهم بسرعة والنور والضياء على وجههم

بس انتبه لايكونو مباحث وتروح شوربة وتقاطيع ومرقة وتسير عشا

طبعا اسمى الشخصيات هي الشخصية المتواضعة اللي يعرف حدود نفسه ويمد رجله على قد لحافه

قنوع جدا وطموح ايضا وشكور لربه

وهدول سارو زي ماقلت في البداية زي الالماس نادرين وغالين لكن موجودين

طبعا فيه شخصيات كمان بس خلوها مستورة ما تجي في الاختبار او تكون مكس مخلوط من هنا

شوية ومن هنا شويتين

ووفق الله الجميع

نشووووووفكم تااني