مستشفى جامعة الملك عبد العزيز ما فيها دكتور طوارئ.

[دنيا الولهـ]

السلام عليكم ورحمة الله وبركاته..
صباحكم و مسائكم صحه و عافيه يارب
انا اليوم قررت احكيلكم ايش صار معانا
الاسبوع اللي راح يوم الاحد بالتحديد
كان يوم مره صعب من اصعب الايام اللي عشتها بحياتي
كنا جالسين بالتاسع تحت عند المصلى
وصحبتنا (هــ ) كان عندها محاظره ما كانت جالسه معانا
شوي يدق جوالي سألتني انتو وين قلت لها >حسيت انو صوتها في شئ
كانت مره مخنوقه المهم وصلت عندنا رمت نفسها في النص
صارت زي الجنازه بيننا مره منهاره وتبكي دموع الدونيا كلها نزلتها و ما كانت تقدر تتنفس مره كانت تعبانه حسيت انها حتموت في ديك اللحظه
المهم > وبعدين ياحب نطت عند الشؤون قالت لهم صحبتنا تعبانه
مو قادره تتنفس تعالو انقلوها العياده ,,
اول شئ جاءت العصابه كامله شؤون وامن الفزعه ما شاء الله عليهم ما يقصرو .
سألو ايش عندها صاحبتكم قالنا ان عندها القلب "هيا صمامات القلب تعبانه عندها" و في نفس اليوم راحت اخذت عمره الصباح وجات الجامعه الظهر ما شربت الدواء حقها يعني ارهقت نفسها شويتين ..
المهم كانو يتكلمو من خشمهم و في وحده دي ما ادري ايش تبغى من حياتها كأن احد غلط عليها قالت ل (هــ ) قومي روحي العياده البنت تعبانه
وتقولها قومي و تتكلم معاها بنفس خايسه >
صحبتنا قالت لا انا دحين بخير وهيا بتموت من التعب> الحرمه ما صدقت قالت خلاص انتي المسؤوله عن نفسك دا مو شغلنا لو صار شئ انتي تتحملي المسؤوليه ,, بعدين "وبعدين ياحب " اقنعتها انو نشيلها للعياده
حطو لها اكسجين و خفت شوي , بعدين كل وحده راحت محاظرتها وبقيو معاها بنتين من القروب بعد نص ساعه بالضبط رجعت لها نفس الحاله المشكله انو البنت امها مريضه و ما رضيت انو نخبر اهلها قفلت جوالها
مره خافت على امها انو يصير لها شئ >> دحين اللي صار هذا كلو عاتي مره تمام اللي قهرني اكثر شئ هو مستشفى جامعه الملك عبد العزيز لما نقلوها من العياده للمستشفى كان مغمى عليها وحالتها مره صعبه
>راحت معاها وحده من القروب و حرمه من الامن اول ما وصلو
ما كان في دكتور تخيلو مستشفى ما فيها دكتور طوارئ بجد انا انصدمت البنت حتموت "القلب يتأثر" بسرعه كانت صحبتنا تدق علينا تقول (هـ) خلاص حتموت لانو حتى التكيف كان خربان و في ممرض اهبل جالس
يدخن جوا المستشفى >دحين البنت تعبانه وحتموت وهو يدخن ,
صحبتنا لما شافت الوضع دا صارت تصرخ تقول وين المدير و حقت الامن تقولها يا طالبه اسكتي > جوا الجامعه مسوين طرزان وبرآ ما يبو يتكلمو
ولا حقت الأمن لما شافت البنت حيل تعبانه قالت دي مسؤوليه انا حرجع الجامعه تخيلو سابتهم لوحدهم وحده منهاره والتانيه حتموت بجد قلبها قوي . المهم بعد نص ساعه افتكرو انو في شئ اسمو اكسجين وحطولها البنت هديت شوي بعد الاكسجين > بعد كل دا قررنا نخبر اهلها لانو خلاص إلى هنا و كفايه كلمنا اختها وهيا خبرت اهلها بطريقتها المهم لما وصل ابوها على طول نقلها مستشفى تاني ,, والله تعبنا كثير داك اليوم بس الحمد لله ع كل حال "الله يشفيها ويخليها لأهلها"
بجد لو انتو مكاني ايش حتعملو .
اتمنى للجميع الصحه والعافيه.

اختكم دنيا الولهـ