تافه ؟!

[وفاء]

أكرر ترحيبي و شكري لكل من أسهم بكلمة في الرد على هذا الموضوع

أخي ليدر .. كلامك صحيح ( مو لأنك أيدت رأيي في مواضيع الأصدقاء و الوناسة لأنها مثل ما قال الأخ نضال مكان للترفيه و ما تتوقع تلقى فيه معلومات دسمة ، بس حتى أحياناً المزحة يستفيد منها البني آدم ، ممكن تلفت نظره لشي معين و ممكن ياخذ عبرة من موقف فكاهي عشان لا يقع هو فيه ، و كذلك الأسئلة و المسابقات هذي كلها تندرج تحت التسلية المفيدة ، و حتى مجرد فضفضة المشاعر و الـ (قفشات) على قول أخواننا المصريين لابد تلقى فائدة مدسوسة بين كلماتها (-:

أخي triples .. أرجو إن الهدف من موضوعي ما ينفهم غلط
أنا لو أبغى أكبر الموضوع و أرد على اتهام سؤالي بالتفاهة كان رديت في نفس الموضوع ، لكن فضلت أكتب موضوع مستقل أعرف فيه كيف العضو يقيم الموضوع إنه تافه و لا مهم .
أقدّر لك غيرتك على المنتدى و هذا إن دل فإنما يدل على روح طيبة و الرغبة في رفع مستوى المنتدى بأكثر مما هو عليه بحيث تغلب المواضيع العلمية الخاصة بالطالب الجامعي على المواضيع العامة و الترفيهية.
لكن ما تتفق معايا -أخي الكريم - إن كتابة طموحاتك و نقدك للموضوعات اللي تشوف إنها ما تضيف شي للمنتدى (كمنتدى أكاديمي ) كان أفضل لو تكون في موضوع مستقل بدون ما تحدد ردك و رأيك لعضو بحد ذاته ؟
مجرد استفسار ياريت تتكرم و ترد لي عليه.

أخي نضال : أنا ما أتكلم بشكل خاص على منتدى الأصدقاء و الوناسة عشان أسأل عن تبرير لدخول الأعضاء له .. هذي حرية شخصية . فيه ناس يدخلوا المنتدى (فقط) عشان هذا الركن و لا يدخلوا أي قسم جامعي ثاني (مع إنه هذا هو الهدف الرئيسي من وجود هذا المنتدى وإثراؤه بكل الأسئلة و نماذج الاختبارات و الاستفسارات اللي تهم الطالب و الطالبة الجامعيين ) .. هذا شي ما يخصني زي ما سبق و ذكرت .. أنا أتكلم عن رأيي الشخصي.
و بالنسبة للمثال حق قبل الاختبار أكره شي عندي أحد يستخف دمه في آخر دقيقة أحاول ألقط فيها أي معلومة تفيدني . على فكرة و عشان أثبت لك بس كلامي و ما تقول عني مفلسفة ، سنة ثالثة ثانوي الفصل الأول دخلت الاختبار النهائي للفصل الأول و أنا لسه ما ختمت المنهج و كنت أفر الدفتر عشان ألقط أي معلومة لأخر ثانية رمينا فيها الدفاتر عشان ندخل القاعة و الحمدلله أنجزت فيه .

فيه ناس أعصابها تنشد قبل الاختبار و ما تقدر تستوعب أي شي مهما قرأت و فيه ناس ما تبغى تسمع أي شي عشان تستوعب اللي تقرؤه (- : ، إذن المزاح في هذا الوقت ينفع الأول و يقتل الثاني .

و بس (-:

أنتظر رأي البقية .