ادارة الاعمال الدولية نموذج ب اصعب من أ - ماذا فعل د.عبدالعظيم شمسان في القاعة؟

[fna]

السلام عليكم

اولا ياشباب
يشاع ان نموذج ب اصعب من أ لاني مالقيت احد يمدح الاختبار الا اللي نموذجه أ
اما نموذج ب للي مثلي بالعكس كان الاختبار فيه كور لافه وفيه حفر تحت المويه (هالجمله بمناسبة السيول )
ويعلم الله اني قاري الكتاب مرتين وقاري ملخص هاني عرب وملخص بندر العمري وحال اكثر من نموذج اسئلة ومع هذا جت فقرات كثير صعبه
عموما الله يوفق اللي كان نموذجهم أ وياخذون اعلى الدرجات وحنا نموذج ب ان شاءالله عوضنا بمقبلات الليالي

-
الموضوع اللي بتكلم عنه شخص اسمه
الدكتور عبدالعظيم شمسان
ياجماعه هذا ماعمره درسني لكن مره قريت موضوع لطيب الذكر الهتان "ابو لانا" ورسخ اسم الدكتور بذهني
ليه مدري
الين امس باختبار ادارة الاعمال الدولية دخل علينا واحد وسمعت الطالب اللي وراي يقول لخويه شف شف هذا الدكتور شمسان
تراه رهيب
المهم لما بدا توزيع اوراق الاجابات
الدكتور عبدالعظيم عطى امر للمراقبين بصفته رئيس القاعه انه عطوا الطلاب اللي جالسين بالامام الاوراق بس لايعطون الطلاب اللي خلفهم
الين اعطيهم امر
فيه واحد من المراقبين الله يهديه عطى واحد من الطلاب اللي جالسين امام وقال له عط اللي وراك
خوينا الطالب ماصدق خبر وعطا الطالب اللي وراه يوم شافه الدكتورعبدالعظيم قاله يااخي قلت لك لاتوزع الين اقولك (قالها بنبره صوت متوسطه يعني مو عاليه) زعل الطالب وقال زميلك اللي قال لي وزع التفت الدكتور عبدالعظيم لزميله وقال له لو سمحت لاتعطي اوامر عشان ماتصير القاعه حوسه
ورجع وقال للطالب معليش انا اسف بس عشان ماتصير فوضى وعشاني انا مسؤول عن القاعه
رد عليه الطالب طيب لاعاد ترفع صوتك ماحنا بعيالك
قال له الدكتور اسف وحقك علي

سكت الطالب ومر الموقف
الى هنا كل شي عادي
لكن ياجماعه والله الذي لااله الا هو ان الدكتور بنص الاختبار والناس تحل وساكته
يجي للطالب مره ثانيه وينزل عند اذنه ويقول له ارجوك اقبل عذري انا اسف ومثل ماقلت ترى اللي صار قبل شوي غصب عني وعشان الامور ماتصير فوضى وحوسه
رد عليه الطالب ماصار الا الخير
انا كنت قريب من الطالب والله انه جاء على بالي اقوم وابوس راس الدكتور


ياربااااه يادكتور عبدالعظيم اي اخلاق تملك؟


والله ياجماعه انه كبر بعيني فوق ماهو كبير لاني كنت سامع عنه اشياء كثير تخليني احطه فوق الراس
وسامع تعاطفه مع المنتسبين وتعاطفه مع الخريجين لدرجة انه يكتب بورقة الاسئلة
هل انت خريج؟
وكم معدلك؟
يسألونه ليه يقول عشان مانخفس بمعدلات الخريجين


المشكلة العظمى
ان الدكتور مو بكليتنا
ولايدرسنا للاسف
لكن الطيب ذكره بكل مكان

يعلم الله ان الدكتور لايعرفني ولااعرفه
لكن هي كلمة حق يجب ان تقال بحق هذا لدكتور الفاضل
فعلاً الأدب قبل العلم
وانت جمعت بينهما
الزبده
محتاجين الى اكثر من عبدالعظيم شمسان في كلية الاقتصاد والادارة
نحتاج للكثير من عبدالعظيم شمسان في مجتمعنا
على دروب الخير نلتقي