جاوب بصراحة

[يلدرم]

السلام عليكم

كل عام وانت بخير وعيد مبارك

أدخل في الموضوع وهو موجه للشباب وممكن للبنات

لو جاك أب وسألك عن احد اصدقائك وعن اخلاقه وعن صلاته

لان صاحبك خطب بنت هذا الرجل

تجاوب الاب بصراحة حتى لو كنت عارف انه ممكن بكلامك تتفركش الحكاية ويترفض صاحبك

كثيرا منا لديه اصحاب لكن لديهم بعض النقاط التي تحسب ضدهم سواء كثره السفر او حتى عدم المواظبة على الصلاة

هل تقول الحقيقة ولا تحاول تخفيها؟

مااعرف هل البنات ممكن ينسألو نفس السؤال دا؟ وطبعا راح يكون عن بنت مخطوبة وتكون من اعز صديقاتك

بالنسبة ليا حصلت عده مرات منها وانا قلت كل اللي اعرفه صراحة وماخبيت اي معلومة استفسر عنها الاب

بالعامي لو تعرفني لا تعطي احد رقمي وتقله أسأل فلان عني

[majed2005]

"امشي بجنازة ولا تمشي بجوازة "


ومافيه اجمل من الصراحه وخاصه موضوع الزواج لانها اساس كل حياة ناجحه

يعطيك العافيه على الموضوع
وكل عام وانتم بالف خير يارب

[banoota mnkoosha]

وعليكم السلام ورحمة الله وبركاته ...


بالنسبة لسؤالك :

طبعا تقول كل شي .. دا زواج مو لعب ... مافي شي اسمه عشانه صاحبي ولا عشانه قريبي

لو سترت عليه دحين في شغلة بكرة حيبان فيه دا العيب ولا دي الصفة ..


وبصراحة انا كمان انحطيت في دا الموقف ؛ ما اكذب عليك واقولك انه كان سهل عليا !

قلت كل شي .. الاشياء الحلوة و الوحشة .. وبكدة عملت اللي عليا


الله يكتب لصاحبك الخير ويرزقه ببنت الحلال اللي تسعده ... وعقبالك

[علي العسيري]

اذا تاكدت اولا ان السائل فعلا يسأل من شان موضوع الزواج ونه فعلا ممكن يتم هذا الزواج بعد مرحلة جمع المعلومات هذه التي يقوم بها اب البنت وان ليس هناك اية معوقات اكبر قد تعيق هذا الزواج ( لأنه في حالة اذ ماكان بقصد الزواج او ان الزواج احتمال كبير مارح يتم فكشف عيوب صاحبي امام هذا الرجل يعتبر نوعا من التشهير بالناس والذي لايجوزشرعا ) ,,,,,
اما اذا تاكدت فعلا عندها لابد انني بالعامي (( بهل له السبحه )) عن صاحبي يعني بقول له كل شي اعرفه عنه من النقاط الحسنه او السيئه وفي النهايه رح ازيده من الشعر بيت وبقوله الخلاصه احدى كلمتين اما انه 1- انا ارضاه زوجا لاختي ,,, 2- او انا لايمكن ان ارضاه زوجا لاختي حتى ولوكان صديقي ,,,

شاكر لك الموضوع القيم (يلدرم )

وتقبل تحياتي

[الحنونة 1]

وعليكم السلام ورحمة الله وبركاته ..

المشاركة الأصلية كتبت بواسطة يلدرم مااعرف هل البنات ممكن ينسألو نفس السؤال دا؟ وطبعا راح يكون عن بنت مخطوبة وتكون من اعز صديقاتك ؟

اقول ..
ولو انه شي صعب وممكن نحس بعض من تأنيب الضمير لانها صحبتي ولانه صاحبك في حالتك مثلا بس الساكت عن الحق شيطان اخرس
مجرد بس ماتفكر انه عارف انه مايصلح للزواج وسكتّ .. اوكي طيب مشيت حياتهم وسكتت بنت الناس عليه وصبرت .. طب افرض لو خلفوا وجابوا عيال وماقدرت تستحمل بنت الناس وطلبت الطلاق ...!!!هذا اذا ماطلبته من اول كم شهر ...

عيالهم وين حيروحوا ؟ اش ذنبهم باللي يصير كله ويعيشوا عائلة مفككة ؟
لانه الام والاب مو متوافقين !!
طب ليش من البداية ماترفضوا ..!! تروح وتجي كمان دا قدر ومكتوب بس محد يتوكل ع الله ومايعمل بالاسباب .. انت بحالتك تعمل بالاسباب لانك واحد من الاسباب الي ربي سخرها لهم ... :) وقول الي عندك وانت مرتاح ... مثل ماتفضل الاخ وقال ..

المشاركة الأصلية كتبت بواسطة majed2005 "امشي بجنازة ولا تمشي بجوازة " ومافيه اجمل من الصراحه وخاصه موضوع الزواج لانها اساس كل حياة ناجحه

من جد ..انت اضطريت خلاص قول عشان لا تكون سبب في تفكك اسرة ..المصيبة بس لو عرفوا انه احنا السبب مثلا في فركشة الموضوع او بمعنى اصح توضيح الصورة بكل ابعادها يقولوا : عشان ماجاكي عريس ولا عشانك مالقيت بنت الناس الي ترضى بيك !
طب هم عارفين نفسهم غلطانين وانه ماغلطنا فالحقيقة مُرة غالبا .. ومن الكلام الي يسم البدن ..
في النهاية اهم شي مانكون سبب في تفكك اسرة بعد قيامها نقول من البداية منعاً لاي شي يضر ..
وربك فوق عالم بالنوايا :)


صارتلي دي الحركة انا كمان وبصراحة قلت كل الي اعرفه بس البنت ماكانت تعرف اصلا بالموضوع ..يعني الحمد لله تمت سكتم بكتم لا من شاف ولا من درى يعني الحمد لله مافي وجع راص
وان شاء الله مايصيرلي شي زي كذا ثاني ولا يصيرلكم ..
عارفة اني طولت فـاتأسف ع الاطالة ..و دمتم بخير ..وكل عام وانتم بخير اجمع :)

[shaden]

اولا كل عام وانت بخير وينعاد علينا وعليكم بصحة وسلامة

ياسيدي انا صراحة لما أتسأل وتكون البنوتة بنت حلال ومافيها شي أقول الحق بكرة حيسير معايا زي كدة ويسألو عني والله يسخرلي الي يقول الصراحة

أما لو البنت ما أعرفها وماكانت تعجبني في أمور كدة أقول ما اعرف عنها شي صراحة

وشكرا على موضوعك

[قلب البحار]

وعليكم السلام ورحمة الله أخي يلدرم
كل عام وانت بخير

بالنسبة للموضوع لازم الواحد يقول الحقيقة وكل اللي يعرفه
وهل يصلح كزوج أو لا , لأن هذا زواج وأولاد ورحلة عمر

[مجرد شخص]

اقول الصراحه لان هذا زواج وفيه حياه وفيه انسانه راح تشاركه

مهما كان صاحبي غالي علي راح اكون مع الرجل صريح

تحياتي اليك يلدرم

[.,.نيــــــــــــــــــــران.,.]

بصراحة هو موقف محرج

لانه الصديق المقرب جدا غالبا يعرف عن صديقه كللللل حاجة الزين والشين ونفس الشي هو

عشان كذه أنا من البداية راح أقول: لا احد يسألني لأني صحبتها وماراح أقول لا طيبها ولا شينها

وللا كيف يصير بين الصديقين أسرار ؟

ومافي أحد كامل كل إنسان فيه حسنات وسيئات

واذا اتكلمت فيها كأني اتكلم عن نفسي وعلى كذه حقعد أمدح نفسي !!!

أما عن الصلاة هو الشي الوحيد اللي ممكن أتكلم فيه لانه أهـــم شي واساسا انا ماأقعد مع أحد مايصلي!!

في عدة طرق الواحد يسأل فيها مو شرط الأصدقاء المقربين

ممكن الاصدقاء العاديين أو محيط العمل أو أعمامه وأخواله - جيرانه

[TIFA]

الصراحه تحرق الضعيف
و تدفي القوي