نظرتك في الاختلاط ......... ؟

[wallo]

اذا الشخص محترم نفسو واذا الزوجين بينهم ثقة وحب كبيير عآآآآآدي ليش لااا !

[كبرياء جرحي]

بصراحه الاختلاط مرفوض وانا دايم اقول صعب

الا اللى ماتخاف الله فهدا غير


يسلموووووووووو على الموضوع

[لندنية]

الاختلاط عندنا احسوا ماراح ينفع
دحين كل واحد بمكتب ومفصولين وكل واحد في مبنى ويادوب ماتحصل مشكلة اجل لو يجمعوهم ايش حيصير؟؟؟
بالنسبة ليا الاختلاط حيجي زمن يسير حاجة عادي وفيه دحين بعض الاشغال فيه اختلاط وعادي الوضع
ويعني بالاساس مافي مشكلة بس المشكلة بالبنت او الولد اللي حيشتغلوا مع بعض ايش حتكون اخلاقهم دا هوا المهم
بالنسبة ليا عادي بس بحدود طبعا
اما بالنسبة للزوج لما نتزوج بعدين يسير خير

شكرا عباطة عالموضوع ...

[عباطة]

هيبا إب , لاحق المطيري , بايون , الشامخ , إناس , شمالية شمالية , مهاو , شروق , فاقدة أبوها ,

مجبور أودعها , طالب كسلان , ليوناردو , سي جي زي , والو , كبرياء جرحي ,

لندنية

شاكر مروركم وأضافاتكم الأكثر من رائعة

[مجبور اوادعها]

اخوي مجبور واوادعها اعتراني الفضول فقرأت موضوعك لكن ليس بالتفصيل.. فهمت ع السريع انك رافض للاختلاط وانا معاك في 100% لكن هل تعتقد ان عدم الاختلاط يمنع الفتاة من الوقوع في "الغلط"

ممكن توقع في الخطأ

ولكن نحاول - قدر المستطاع - ابعاد الشباب والشابات عن الوقوع في الخطأ

وفتكم بالعافيــــة

[Ash0o0sh]

المشاركة الأصلية كتبت بواسطة never hide شوف يا سيد عباطة الحلال بين و الحرام بين إلا إذا كان الدين يؤخذ بالهوى .... فهذا شيء آخر و الموضوع هذا يا ما اتكلمو فيه و ما طلعنا بشي الا بالطعن في الآراء ثم تقفيل الموضوع فيه ناس تقلك اختلاط ايجابي .... و إن عدم الاختلاط يؤدي إلى انفصام اجتماعي <<< متعوب على المصطلح المهم انتا تبغى الآراء... أنا مارح اتفلسف من راسي ... لكن انقلكم من تجربتي و تجارب بعض الزميلات في الاختلاط ... في البداية قلت عادي و اوكي لو الرجال محترم نفسه و البنت محترمه نفسه و كل واحد ملتزم بحدود الله لكن لما خرجت لبيئه العمل المختلطه شفت العجب العجاب .... بعض البنات هما اللي يترمو على الرجال و يفتنوهم... بالذات لو كان زميل العمل زي ما قلت وسيم ... غير كدا فيه عقده متأصله في بعض الرجال وهي التحرش بالأنثى حتى لو كانت مغطيه كلها ... فقط لمجرد انها انثى ... وبعض مرضى القلوب ما يحبو يفوتو فرصه وجود انثى في مكان العمل ... و طبعا التحرشات مو شرط تكون بالمعنى المتعارف عليه ...و يمكن أقل شي المعاكسات و الكلام المستفز ... و و الله العظيم الغريزه ما تفرق بين الشايب و الصغير و المدير و الغفير ... وفيه ناس ما يهمها لا سمعتها و لا منصبها ... اهم شي عنده غريزته ... طبعا دحين فيه ناس راح تجي تقلك طيب ما التحرشات موجوده في المولات و في كل مكان ... طيب و ليش في مجلس الشورى قاعدين يناقشو و يحطو مشروع القانون الجديد الخاص بالحماية من التحرش الجنسي في بيئة العمل للجنسين ؟؟؟ تتوقعو القانون هذا جاي من فراغ ؟؟؟؟؟؟؟ بصراحة أنا ما ارضى أن زوجي او اخويا يشتغل مع بنات بالشكل اللي انتا وصفتو لكن لو وحده محجبه و وجاده و محترمه نفسها اوكي ... بس المشكله فين نلاقيها دي ؟؟؟ معظم البنات اللي اعرفهم كانو نموذج في الحجاب الشرعي و لما اضطرو يشتغلو في مكان مختلط تغيرو تماما ... الحجج اللي سمعتها أنو رئيس العمل ما يبغى وحده متغطية ... و كمان ما يبغى وحده كاشفة و مكشره .... لازم يتأقلمو مع طبيعة العمل طبعا ... طبعا التغير بالتدريج و الشيطان له خطوات ... اول مره نغير لون الطرحه <<< مو لازم سوداء مالألوان كلها حلوه حتى صرنا نشوف الألوان في الطرح ... فوشي .. برتقالي ... تركواز ... و مو بعيده الفسفوري كمان بما انو طالع موضه السنة دي بعد كدا اللثمة تبدأ تنزل و لا تنسو العيون المكحله ... و بعد كدا العطور و العدسات ... و هلم جرا ... و فوق هذا كلو <<<< يقلك فيه اختلاف على تغطيه الوجه ... طيب بالله احد يفهمني على ايش مغطيه شعرها و المكياج فول و اللبس الله اعلم بحاله ممكن يكون لاب كوت او بنطلون و فوقه بلوزه طويله ... بس البنطلون الحمد لله ملزق .... يعني ما فه شي مستور ... و أحلى شيء كمان لما يرن الجوال و تكون حاطه اغنية حبيبي قرب بالله كيف راح يكون تفاعل الرجال مع المناظر دي ؟؟؟ و لو قلنا فرضا انهم بيغضو البصر ... لكن مشكلة القلب يهوى و يتمنى ... يا اخي اعتقد ان مشكلة الشعب انهم ما يعرف الانضباط الذاتي عشان كدا ماينفع له الاختلاط و لما تيجي تشوف تفاعلهم في البيئات المختلطة تلاقيه شوربه و الدليل على كدا .... شوفو مقاطع المبتعثين في اليوتيوب .... بعضها يجيب الغثا من السفاهه و الحماقه ....الله يهديهم بس ... و اللي احوجته الظروف للعمل في بيئه مختلطه فلجاهدو الله في انفسهم و الله يعينهم و من ترك شيئا لله عوضه الله خيرا منه ... و ترا لا تنسو وراح تشوفو ناس تيجي تقلك اش الافكار دي .... و اش التخلف دا ... افكاررجعيه ... الالتزام بالدين صار شيء غريب في الزمن هذا... و الاسلام بدأ غريب و سيعود غريبا و طوبى للغرباء ... و اللي مو مقتنع انصحو يجرب و يحكم .. و الله الهادي الى سواء السبيل

انا ماجربت ابدا العمل

بس كلامك مرررررررره جيد وعجبني
وعن البنات هههههههه دايما بسمع اخويا يقول انو البنات هما الا رامين حالهم وبنظرلهم نظره دووووووووووونيه يعني ولا شي بس انك لفتي نظري ونظر غيري واتفرجنا ببلاش

وحابه ابدي رائي .... اوربا دحينه بتحاول تفصل الدراسه بين الاولاد والبنات !!!!!!!
ليش؟؟؟
اكيد لقيت انو مالو اي داعي الاختلاط
(يقولك اسال مجرب ولا تسال طبيب)

انا دايمن اقول بما انها هيا محترمه فاليش لا
بس الا فوق بتقول ممكن هيا محترمه بس الرجل لالا
يعني بيئتنا ترفض داه الشي وحتى لو ماقالت بس فعلت

وللمرأة .... ماهو شعورك بأن تكون سكرتيرة زوجك مؤدبة ومنتجة لكنها جميلة وغير محجبة وكيف ممكن تواجهي الموقف ؟؟

اممممممممممممممممم بصراحه ماادري بس اكيد اول شعور راح احس بي الغيررررررررررررررررررره
بس بعدين كيف اتصررف ماادري بس باذن الله لو انحطيت في الموقف داه راح اطالع للثقه الابيننا واني ممكن اكون مكانه<<<جواب حالي يعني ممكن يتغير
لحد يعتب انا برضوا حرمه

ثااااااااااااااانكس عباااااااااطه مووووضوعك خنفشاري
وانا كان نفسي اعرف رائي اكتر الشباب في الموضوع داه

تقبل مرووووووووري وكتر هرجي ^_^

[υикиσωи]

وللمرأة .... ماهو شعورك بأن تكون سكرتيرة زوجك مؤدبة ومنتجة لكنها جميلة وغير محجبة وكيف ممكن تواجهي الموقف ؟؟!

مممممممم .. مو مشكلة مدام ما شفت منها شي ..
لكن ازا ازا حصل اني شفت شي .. فعليها العوووووض ..

[مايلي]

الاختلاط محد يبغاه بس الواحد احيانا مضطر يخوض فيه ولايقعد عاطل

حبيت ارد على الي يقول وظائف خاصة بالنساء خلينا نعددها سوا ونكون منطقين في كلامنا

مدرسة ؛ لايوجد الا في قرى مانعرف اسمائها

مدرسة حضانة او في مدرسة اهلية :2000-2500

معيدة في الجامعة :فلانه بنت فلان اولى من ثلاث ارباع الجامعه

موظفة في محل :1000-1500

طبيبة : 13000في بداية التوضيف

صيدلانية :9000 برضو في بداية التوضيف

اتوقع لامجال للمقارنه ؟؟

وثانيا الي مايحكمه دين ولامخافة الله لايتوقع شي ثاني ممكن يوقفه وكلنا ناس وصلنا سن النضوج ونعرف نفرق بين الصح والغلط

[wallo]

^^^^

كلآآمك صح 100 % :)

[C.J.Z.]

المشاركة الأصلية كتبت بواسطة كبرياء جرحي بصراحه الاختلاط مرفوض وانا دايم اقول صعب الا اللى ماتخاف الله فهدا غير يسلموووووووووو على الموضوع

مافهمت منك مرفوض ولا حرام .. أنتي تقولين اللي ماتخاف الله هذا غير يعني قصدك حرام إذا قصدك مرفوض بسبب العادات والتقاليد .. سؤالي لك هل نتبع العادات المريضه أم الدين
كثير مشايخ أفتوا بجواز الإختلاط إذا كان في حدود مو أنتي اللي تحرمين ياأختي

غير كذا مافي داعي للغلط على أحد يعني هذا الموضوع للنقاش ولأخذ الآراء ...