نصائح
الحضور لا تتهاونوا فيه لأنه لو كثرتوا غياب تاخذوا حرمان وفيه ناس فعليًا أخذت حرمان وتاخذ المادة صيفي وهالشيء يأثر ع المعدل والنسبة بشكل كبير يعني حتى لو جابت في الصيفي 100 ما حيكون زي الي جابتها من أول مرة .
لا تراكموا المواد هي سهلة بس برضو لا تراكموها خاصة العلمية. خذوا ساعة ساعتين باليوم ارجعوا حلوا الي حليتوه ولخصوه ، ترتاحوا كثير فترة الاختبارات يكون كله محلول وملخص أحسن بكثير من إنه تدوروا لسا ليلة الاختبار ع طريقة حل مسألة ولا تبحثوا ع جزئية ما فهمتوها .
إنتوا في الجامعة مو بس عشان الدراسة ! محتاجين تكتسبوا مهارات وهذي المهارات ما تكتسب إلا عن طريق الممارسة بس قبل لازم تعرفوها ! عشان كذا انصح إنكم تحضروا الدروات الي تسويها الجامعة فيها دورات كثير شوفوا الموضوع الي يناسبكم والوقت الي تنعرض فيه عن طريق حساب kau_active في الانستقرام ، أيضًا في مواقع تعطي دورات أونلاين مجانًا زي رواق وإدراك . من الدورات الي أخذتها والي كثيير استفدت منها دورة كانت محاور النجاح الستة أخذتها عن طريق إدراك كثير استفدت كيف أنظم وقتي كيف يكون لي رؤية وكيف أحقق أهدافي وأشياء كثير غيرتني للأحسن الحمد لله أيضًا دروة في الجامعة (كيف تكونين مشروعك الصغيرة) كثير مفيدة كانت
الدورات تبين أشياء ممكن عمرنا ما درسناها ولا راح ندرسها في مناهجنا فعشان كذا أنصح بالدروات داخل وخارج الجامعة
في عندنا في الجامعة مكتبة مركزية ، تقدروا تقرأوا فيها وكمان فيه أماكن مخصصة للمذاكرة هناك ، تنفع خاصة للي عندهم بريكات طويلة، وع ذكر القراءة في كتاب رائع ومشهور اسمه 10 أمور تمنيت معرفتها قبل دخولي الجامعة ، جميل
حتسمعوا كلام سلبي كثير أبشركم وإنه الاختبارات صعبة وتعجيزية وإنه ذاكروا كثير وما استفادوا وو .. قد يكون أحد الأسباب ببساطة "طريقة المذاكرة" للأسف في ناس كثيرة ما عندها هذي المهارة ، المذاكرة مو يعني إنه افتح ع الدرس الأول واقرأ سطر سطر وإذا وصلت لمسألة حليتها وهكذا لآخر الجزئية ! حتى تلخيصاتكم المفترض تحتوي على أهم النقاط الرئيسية بطريقة مرتبة وبألوان مو نسخ لصق الكتاب .. دائمًا يقولوا ادرس بذكاء وليس بجهد ، كيف ؟ شوفوا هذا الفيديو يشرح أهم 9 طرق علمية للمذاكرة الفعالة
طبقوها وإن شاء الله بتسهل عليكم المذاكرة ، (لازم تشوفوا الفيديو)
بالمناسبة هذي القناة https://www.youtube.com/channel/UCG-...VnIGXYEBQvmBAQ تتعلق بأشياء تهم أي طالب جامعي (طرق المذاكرة-التخلص من التوتر في الاختبارات-كيف تستيقظ مبكرًا-كيف تصبح شخص قارئ والخ) لو حبيتوا اطلعوا عليها
إنتوا الدفعة 17 وصار لكم هاشتاق بتويتر #تحضيري_17 ، دفعتنا الحمد لله كانت متعاونة في هاشتاقنا يعني الي يلخص يصور ملخصه والي يسأل يلقى الجواب وكانت في ناس تغرد بأشياء إيجابية نكون فعلاً محتاجين نقراها .. فأفيدوا واستفيدوا مع دفعتكم
حاولوا تعرفوا إش التخصص الي يناسبكم قبل فترة التسكين بفترة ، كيف تعرفوا رغبتكم ؟ النت مليان مقاطع ومواضيع تجاوبكم ممكن تشوفوها :)
مرة ثانية السنة مو صعبة وفي كثيييييير جابوا 5 من 5 وإنتوا كمان حتجيبوها إن شاء الله توكلوا على ربكم قبل كل شيء ونظموا وقتكم و ولا تقعدوا تشيلوا هم الاختبارات اللي لسا جاية ولا هم التسكين والتخصص ثقوا بأنفسكم وعيشوا اللحظة