[مزاحمتهم]

المستوى الثالث :

المحاسبة 1 : أخذتها مع د.إقبال خاطر .. جنسيتها مصرية و تشرح كويس .. بالنسبة لنا كانت جددا ممتازة مقارنة بالبقية .. بس لما شفنا محاسبة 2 و التمويل اكتشفنا إنها ما أدت الماده حقها .. يعني أشياء كثيرة كانت تقولنا أنها مسلمات وهيا بالواقع لها شرح وتطبيق بالحياة ينفهم .. لحد اليوم هيا الأحسن من بين الدكتورات المتواجدات بالشرح.. والمادة قد ماراح يخوفكم وتشوفون ناس ترسب إلا انها سهلة ..

المهارات الللغوية: كانت مع أ. سلوى بابطين .. مرررة كانت بطلة من ناحية الشرح.. تشرح من قلبها كل شي ، علشان كذا البنات يطفشوا أحيانا منها .. أمينة مررة بالشرح وتجاوبك بدقة لو سألتيها و بالها طويل ..مستعدة تضيع كلاس علشان تفهم طالبة .. تحسي هدفها انك تخرجي فاهمة .. مو مادة عامة مشي حالك .. نشاطها خليكي دقيقة فيه لأنها ماشاء الله تلقط أخطاء ما ننتبه لها .. بس ما تنقص إلا لو كان شغلك كارثي هههههههههه..

الاقتصاد الجزئي: د.نادية يوسف .. جنسيتها هندية .. شرحها تحاول تبسطه قد ما تقدر وتستخدم الانقليش المفهوم .. عن نفسي كنت مبسوطة منها وفيه بنات ما ارتاحو ..كانت مررة متساهلة معانا .. يعني تكنسل كثير و تساعد بالمشروع و لا تدقق عليه .. المادة نفسها سهلة ومفهومة وممتعة..

الانجليزي1 :
دكتورتي كانت وحدة تدرس بنات التحضيري وجايبينها اسمها د.رحمة رخنتور .. لأنها أول مررة تدي المنهج فكانت مررة ملخبطة و تدخل أشياء بثانية وفجاة تقولنا افتحوا الكتاب فجأة الرايتينق طلعوه و معصودين ههههههه .. ما أتوقع لسه تدرس لأنو فيه بنات اشتكوا ..

إحصاء الأعمال : ا. عبير الثبيتي .. المادة حلوة وأغلبها معتمد على إحصاء التحضيري .. يمكن 7 شباتر مراجعة للي أخذناه بالتحضيري.. لأنو استاذتنا شرحها من القللب و مرتبة و تبدأ الكلاس بمراجعة اللي فات كانت المادة خفيفة .. طبعا الدور الأكبر علينا كطالبات بس لما تكون الدكتورة بطلة يسهلك المذاكرة مررة ..