[آمال وطموح]

أشكركم كلكم على مروركم وعندي كم تعليق على نقاط كثير أذكرها بإختصار!!

بمناسبة إن الجامعة ما درت عننا يوم السيول وكون الجامعة فيها فتاوى بحرمة استخدام بعض الأشياء فيها (كهرباء - أجهزة - جلوس في أماكن خاصة بالموظفات - حرمة إستخدام بعض المرافق المقدسة عندهم زي حماماتهم والذي منه) وكون اننا طرحنا مشكلة بدون حلول والعشرة ريالات اللي تطير من المكافئة وحازة بقلبي والمظلة الكبيرة اللي نلعب تحتها كورة واللي صاير بيته مسبح عرق من الحر والناس اللي تقول روحوا لموقع الجامعة الرسمي وزين لو احد عبركم.. (خلونا نتناقش فيها نقطة نقطة!! )

- أول شي سالفة السيول موضوع مختص بالدولة لإنها ما سوت مجاري والحق علينا المفروض اننا نكون مواطنين شرفاء ونقضي حاجتنا في الصحراء أو نحفر مجاري بنفسنا هم مو مسؤولين عننا من هالناحية وإذا عندنا اعتراض على السيول نجيب معنا احتياطاتنا هم بعد مو مسؤولين عننا (طوق نجاة - قارب نجاة هوائي - معلبات إحتياطية اي شي ثاني مشكلتنا الدولة فوق روسنا لا احد يجيب طاريها بسوء ولا تحاولون انكم تحملونا فوق طاقتها مو كفاية اننا عايشين على خيراتها؟؟ ) هذا خارج الموضوع ، أرجو عدم الخروج مرة ثانية والدخول عرض بمواضيع أخرى .

- الفتاوى التي تصدر من قسم الدراسات وغيرها من الأقسام بمناسبة إن المشايخ في البلد صاروا كثير وفيه ناس قاموا يفتون حتى في الملابس الداخلية النسائية بحسب صحيفة الحياة نقلا عن أحد البرودكاسات << برا
اللي بنوضحه في الموضوع إن الحلال في الجامعة حلال الحكومة مثل ما للموظفين حق فيه بعد الطلاب لهم كامل الأحقية في التصرف فيه ومسألة إن شواحن الجوالات بتخلص كهربة الجامعة قصدي بتزيد ميزانية الجامعة وتحملها فوق طاقتها موضوع غير صحيح لإن غلاية الموية الموجودة في غرفة كل موظف وموظفة طاقتها تكفي لشحن 23 جوال من نوع بلاك بيري ولا أقول لالالا خليها 43 ، مما يعني إن الغلايات هي اللي تزيد الضغط على ميزانية الجامعة أكثر من شواحن بسيطة !! عجبتني إحدى دكتورات الدراسات الإسلامية وهي توصف لي مدى خطورة الموضوع تقول تخيلي لو كل منسوبي الجامعة شحنوا جوالاتهم في نفس الوقت متصورة كمية الكهرباء اللي راح تنصرف عليها !!!!! >> بعيدا عن الحلال والحرام الحرمة خيالها خصب ما ألومها واضح إنها جاية من الصومال بمكرمة إمبراطورية (نسيت إننا في السعودية على بالها مدري وين تجاهلت إننا من كثر غنانا الفاحش نصرف على اللي حوالينا )
ماعلينا المهم في هذي النقطة إني تعلمت شي مهم جدا لا تقدسون أصحاب الفتاوى وتتبعونهم بلا هدى ومن هذا المنبر أقول لكم وفروا الكهرباء في بيوتكم وجيبوا كل ما يمكن شحنه من الأجهزة للجامعة والسبب في النقطة القادمة. {ملاحظة : هذي أيضا نقطة خروج عن الموضوع أرجو عدم التحدث فيها}

- موضوع العشرة اللي تنسحب كل شهر من كل طالب وطالبة أنا متأكدة إن ملك الإنسانية ما يدري عن الموضوع ولا كان إتخذ إجراء صارم في حقهم !!!
يعني معقولة ؟؟؟ احنا بلد المليارات نرغم أبناءنا وبناتنا على الصدقة لصندوق الطالب من معونة أعطيناهم إياها >> زي اللي يتصدق على واحد محتاج بريالين ويرجع ياخذ واحد منهم يقول يمكن يجي واحد غيرك يحتاجه << كيف بس؟ أعرف أضرب أمثلة ؟
سبحان الله هل حكومتنا الرشيدة صرفت لنا مكافآت ونسيت تعبي صندوق الطالب بمبلغ كمعونة للطلبة المحتاجين؟؟
عموما أنا أحس إن صندوق الطالب ذا من يوم ما بدأ نظام المكافآت وهو يتعبى في يوم من الأيام راح ينفجر علينا ونلاقي مطر من العشرات في الجامعة وقتها أظن المبلغ الفائض راح يكون كفيل بتسديد الفواتير المتراكمة حقت الشواحن

- اللي يقول لنا ان الموضوع مافيه حلول غابت عنك جملة (قطعة قماش على عمود متهالك ؟) > هذا أحد الحلول كان
فيه حل إضافي توفير دواليب في المساحات الفاضية اللي مالها داعي في الجامعة ووضع أماكن خاصة لمظلات يدوية تقوم الجامعة ببيعها للمنسوبين عشان يتمشون فيها > عادي لو أجروها هم الكسبانين برضو > ويحطون المبالغ اللي بتطلع من الإيجار في الصندوق الطلابي

- المظلة الكبيرة اللي نلعب تحتها كورة موجودة في الخيمة الرياضية محتاجين مظلات أصغر يحطونها على إمتداد الممرات لوصل المباني بعضها ببعض تقينا من أشعة الشمس ويكسبون فينا أجر ويشعرونا بالإمتنان نصير نمشي تحت الشمس وإحنا ندعي الله يديم علينا جامعتنا الجميلة اللي تعبانة عشاننا تعب ما يعلم فيه الا الله .

- اللي يسبحون في العرق الله يعينكم يارب وحسبكم على شركة الكهرباء اللي مدري تشيل هم مصاريف الأماكن الحكومية اللي تعاني من المواطنين اللي ماعندهم دم ويشحنون جوالاتهم في الجامعات ولا تركز في إيه ولا إيه عموما هنا نناقش مشاكل ماهي شخصية هنا المشكلة عامة نحن نتباحث قضية مجتمع لا أفراد .

- صاحب النقطة الأخيرة تبع منتدى مدير الجامعة عندي تعليق واحد بس للأسف كلماتي تعجز عن التعبير ولهذا بحط لك صورة





أشكر باقي الردود أصحاب التعليقات اللي أضحكتني أدخل الله السرور على قلوبكم أينما حللتم ..