[ذكرى مؤلمة]

السلام عليكم ورحمة الله..
شكرا لمن طرح الموضوع..
وهذا موقف أموت ولا أنساه..



أذكر مرة أبوي رحمة الله علية كان معزوم عند واحد من قرايبنا..
أتصل علية واحد ثاني وقال أنا معزوم في مناسبة خاصة فيني وأبيك معي..
الوالد وافق ونسى من الدعوة الأولى,,,

المهم وهو في الطريق تذكر دعوة قريبنا وأتصل علي,,
وكلفني أخذ الأهل وأروح مكانة وأقدم العذر...
قفلت أخلاقي لأني مرتبط مع الشباب..
وقمت واعتذرت من الشباب..

وتركت أهلي بالبيت ورحت للعشى..
ووصلت ودخلت وجاء الرجال ورحب فيني..
دخلت المجلس وسلمت..
والرجال ماسكني بيدي يبي يوديني لصدر المجلس..

سأل عن أبوي وين هوة..
رديت بكل أريحية..يعتذر منك...
طبعا حطوا في بالكم المجلس فل من المعازيم
وهو يفك يدي ويزعق بوجهي..
كيييييف؟؟ وأنا عازمة من أربعة أيام..
ومن الإحراج عدلت عن مساري..
وجلست في نصف المجلس عقب ما كان صدره مهيأ لي..

المهم شرحت له الوضع..
وكأنه هدي شوي..
وسألني عن الأهل أنا جيايبهم وإلا لا...
<<<< طبعا الأخ جاحد هله في البيت..
وهو يسأل جهزت التصريفه..
قلت له لا وديتهم عند جدتي فلانة لأنها تعبانه..
<<<< أسم جدته فاطمة ولا احد يدري..

الــمــهــم...
وأنا أناظر فيه ومبتسم..
حسيت عيونه بتطلع من راسة..
قال تستهبل أنت..
قلت له لا من جد..
والله أرد علية وفي قلبي خوف..

ويرد وهو معصب ووده يذبحني..
والمجلس كله يناظر فيني..
كيف وديتهم عندها والمناسبة خاصة بجدتك...
( اللي هي جدتي فاطمة )
أنا وقتها ودي أن الأرض تنشق وتبلعني..

ولا وقف على كذا..
أخذ جوالة ودق على ولد جدتي..
وقال وين أنتم ؟,,
رد وقال قريبين من الاستراحة..
وسألن عن أمه هي تعبانه..
قاله لا طيبة وهي هذي معنا.. كلها عشر دقايق ونكون عندك
سأله عن أهلي هل أنا جبتهم وإلا لا ..
رد الأخ وقال ما جونا من أسبوع..

قفل من الإتصال ويتكلم بكل صوته.. والناس تسمع
كيف تكذب على رجال لحيته كلها شيب..
ما تستحي..
حسيت وقتها أن أحد كاب علي مويه..
وقلب وجهي كاتشب..
وعيوني بدت تنزل دموع من الإحراج..
وطوال الليل عيني بالأرض وأسمع الناس تضحك..
ما صدقت أتعشى وأمشي..

توبة ما عاد أكذب ولا اصرف..
الصدق منجاة..