رد: تفكيرنــا عن اهل جده ؟ قبل و بعد ؟؟ تفضلوا . القهوه يا ولد ..
أهل جدة مظلومين بكلام الناس
أنا من أهل مكة وأدرس في جدة ...
أول شي ما يتكلم عن جدة بهذا الكلام إلا اللي ما يجونها كثير ويتكلمون من خلال ما يسمعون فقط ، وخليني أكون صادق : تشكل في مفهوم الناس مفهوم ظاهري من خلال ما يشوفونه إذا جو جدة .. يعني أهل مكة إذا جو جدة ليش يجون؟ علشان الأسواق والمنتزهات وشي طبيعي إنهم يلقو شباب وبنات صايعين هناك (يعني بالله هل بيلقو محاضرات وإلا حلقات تحفيظ في هالأماكن ؟؟؟) لكن سؤالي: اش دراكم إن هالشباب والبنات من أهل جدة؟؟
أنا لما كنت في الثانوي أعرف شباب معانا في المدرسة -مهم أصدقائي لكن درسو معاي في الفصل- وسمعتهم يقولونها بألسنتهم: يوم الأربعاء يروحو جدة للأسواق علشان يتقابلون مع البنات طبعا يتعرفون بالنت ويتواعدون وفي مقدمة الأسواق اللي يروحوها -ردسي مول-وخاصة أول ما فتح ، والسبب في هذا إنهم وجدوا في جدة انفتاح أكثر من المدن الثانية -والحين اش ذنبهم أهل جدة؟؟- ... أنا ما أقول جدة ما فيها هالأشياء..فيها لكن مو معناته إن أهل المدن الثانية ما عندهم شي وأنا ما أعمم على أهل جدة ....
لكن إذا بغيتو تعرفون أهل جدة روحو وشوفو أهل جدة الأصليين اللي عايشين فيها من سنين الدنيا يوم كانت مدينة صغيرة قبل ما تتوسع وتكبر وتجي الأسواق
لكن خليني أتكلم عن نظرتي لجدة قبل ما أجيها وبعد ما درست فيها:-
قبل:
طبعا قبل دخولي الجامعه كنا نجي في الويكند أحيانا بحيث أني في مكة ، كنت أدخل بعض الأحياء وأحس بالكئابة -وهذا شي طبيعي إني دخلت منطقة جديدة علي وما اتأقلمت فيها- وكنت أقول لو ايش ما أسكن في جدة ، وكنت أدخل المولات طبعا علشان الأهل فكنت أشوف بعض الشباب اللي أتضايق من أشكالهم ..لكن بعد ما صرت أروح مع الوالد لأسواق جدة الأصلية اللي هي البلد (الخاسكية، باب شريف،....) بحيث إن لنا محلات هناك وكان لهم أصدقاء من أهل جدة وكنت أروح مع الوالد لهم فلما شفتهم وشفت أبنائهم وشفت طيبتهم وأخلاقهم وكرمهم وأصالتهم قلت:هذولي أهل جدة اللي عليهم الكلام ..ومن هنا بدأت تتغير نظرتي لأهل جدة
بعد ما درست:
طبعا أنا كنت جاي جدة علشان الجامعه وكنت متضايق بحيث إني بسكن فيها .... لكن بعد ما درست فيها ووصلت لثاني وثالث سنة في دراستي يسألوني أصدقائي اللي في مكة : كيف جدة وكيف الدراسة فيها وكيف أهلها ؟ فأقول لهم: شوفو أنا درست في مكة 12 سنة والآن أنا أدرس ثالث سنة في جدة وأقول لكم: مافي دراسة زي دراسة جدة الدراسة هناك فيها متعه والمدينة حلوة ، وأهلها طيبين .. أقول لهم: ممكن تلقون شباب يسمع أغاني و.... ، لكن تلقونه محترم وخلوق وطيب لأبعد الحدود
- من الأشياء اللي أعجبتني واتفاجأت فيها يوم جيت جدة وما كنت أتوقع إنها في جدة:-
1-جمعية تحفيظ القرآن في جدة أقوى جمعية تحفيظ في المملكة
2-فيها نشاط دعوي عجيب (محاضرات ، ندوات ، دورات) وتلقاها معلنة في المساجد
3-فيها معاهد عالمية تقدم دورات بحيث إنك تستطيع تطور ذاتك خارج نطاق الدراسة الجامعية
4- طيبة أهلها
|