[نوره الغامدي]

السلام عليكم و رحمة الله و بركاته ’


الله يسعد أوقاتكم بكل خير



قبل حوالي اسبوعين سوينا حفلة كبيره لأختي بمناسبة تخرجها


المهم حضرت العيله و الصديقات و كان كل شي حلوووو و فله ..



جيت أسلم على زوجة خالي أم عزوز , و نتبادل الاحاديث , شويه جا على بالي أسألها عن ولدها نواف , ماشاء الله عليه ولد عقله نظيف , ذكي جداً , و لديه ثقافة واسعه في جميع المجالات الله يحرسه ... دوووبه خلص الثانويه :) ,


دار بيننا الحوار التالي :


نوره : كيف نواف ؟ هاااا بشري عساه نجح ؟

أم عزوز : الحمدلله , نجح و نسبته 99

نوره : ماشاء الله تبارك الرحمن , مبرووووك و الله , مو غريب عليه الله يحفظه ..

أم عزوز : يبارك فـ عمرك حبيبتي :)

نوره : الا ما قلتي لي كيف نسبته فـ القدرات ؟ ان شاء الله كويسه ؟

أم عزوز : إيوآ أبشرك ’ جاب 90 فيها .. الحمدلله

نوره : ماشاء الله لا قوة الا بالله .. الصلاه عـ النبي , الله يوفقه يا رب

أم عزوز وقد بدآ عليها القلق , و تغير لونها ..

نوره : ايش فيكِ ؟

أم عزوز : نواف جنني !! يبغى يدخل هندسه , ما يبغى طب !

نوره : طيب و مالو ؟ خليه يدخل هندسه اذا هذي رغبته "

أم عزوز : لااااااااا , ايش هذاا ؟!!! ولا واحد من أولادي حيصير دكتور .. مررره قهر !

نوره : يا بنت الحلال خليه على راحته , ما دام هذي رغبته .. لا تغصبيه على شي ما يبغاه !

أم عزوز : ما اعرف .. بس ان شاء الله يغير رأيه !


انتهى الحديث عند هذه النقطه !



توقعت انه هـ الثقافه انتهت و ولَّى عصرها , و لكن ما زالت موجوده , و لم تندثر ! ما زال الكثير من الناس يٌطالع بإزدراء الى بعض التخصصات , و مازالوا يعتقدون بأن الطب هو التخصص الوحيد و المثير و المقدَّس !!


( يووووووه فلان دخل محاسبه , فلانه دخلت كيمياء , علان دخل اعلام )


تهميش لأبعد درجه ’



العجيب انه بالأمس القريب انتهيت من السنه التحضيريه و حصلت على معدل عالي و لله الحمد , أطلق تخصص يقبلني بالراااااااحه ..


ابوي يقول ادخلي طب مثل اختك ! .. طيب انا ما ابغى !


فيه شي اسمه ( رغبه ) + ( قدرات ) + ( هدف ) !


كان بإستطاعتي اني ادخل جراحه أو أسنان , و متأكده بإذن واحد احد اني راح انجح فيها بمعدل كووويس .. بس انا يدي مو خفيفه و لا دقيقه .. و أقرف من أي حاجه ! يعني بإختصار حكون طبيبه فاشله مع مرتبة الشرف :) و حـ أكره حياتي المهنيه , ندم + ملل


بعد ما خلصت السنه التحضيريه , قابلت احدى الزميلات ( ولاء )

نوره : أووووه ولوشآآآ ... وحشتيني يا بنت من زمان عنك ! ايش اخبارك ؟ و ايش تخصصتي ؟

ولاء : الحمدلله انا طيبه , و تخصصت حاسب :)

نوره : ماشاء الله مبرووووك والله .. مررره حلو الحاسب الله يوفقك ’

ولاء : يبارك فـ عمرك , و انتي ؟

نوره : اداره و اقتصاد , لسآ ما خصصونا

ولاء - بنظرة الشفقه و الانكسار - : يلآ الحمدلله >>> حتى مافي مبروك

نوره - بنظره جامده- : أبشرك هوآ كان رغبتي الأولى الحمدلله دخلت اللي ابغاه





//



انتو ايش رايكم فـ كول الحكايه هذي ؟

يعني انا مثلاً كل ما لقيت احد لج راسي , انتي ليه مادخلتي طب ؟ و ليه و ليه ؟ .. عاد بعضهم يمصخونها حبتين :


( ايييييييييش ؟ اداره ؟؟ مره غباء .. الله يهديكي ! حرام عليكي تدفني نفسك بالحياة )


اييش يبغو من حياتهم هذووول ؟


متى راح يشيلو فكرة ( كلية ادارة و اقتصاد مقبرة الفاشلين )

ليه ما يؤمنو بالتخصصات الثانيه ؟ لازم كول حاجه طب x طب !


عن نفسي لا أهتم بآرائهم , أهم شي راحتي .. بس من جد شي مزعج