[نسووومة]

صح لسااااانه الكاتب

ياريت فعلاً الموضوع هذا ينتشر .. والوعي ينتشر بيننا..ويبطلو السعوديين النظرة الدونية والتحقير لغيرهم من غير الجنسية وكأنهم هم شعب الله المختار !!

تلاقي واحد محسب نفسه انه كووول ومتطور ومثقف ومخه واعي .. وأول ماتجي سيرة واحد تاني غير سعودي او يسمع عن واحد سعودي أخطأ اول حاجه يقولها أكيد ماهو سعودي أصل وهم غير السعوديين هدول اللي مخربين لنا البلد <<وكأن السعوديين معصومين من كل الأخطاء وفقط غيرهم هم اصحاب المصائب والبلاوي .. مايدرو ان بلادنا فيها كل شي بس مستوووور ..

أمس كنت قاعده مع بنت ماهي سعوديه .. من جد قعدت تشتكيلي تقول لي انا ماعدت طايقه البلد ماادري ليه كده بنتعامل مع اني مولوده هنا وعايشه هنا طول حياتي .. ولاعمري شفت بلدي .. وأعامل هنا كأني عار لا جامعة أقدر ادخل ولا مستشفيات حكومية ولا مسابقات اقدر اشارك(زي مسابقة الامير سلمان جات تشارك فيها قالوا للسعوديين فقط) .. وحتى لو دخلت الجامعه عشان نسبتها الخارقه ماتاخد مكافأة ولا حتى مكافأة امتياز ولا تلقيط وجه !

يعني من جد قطعت قلبي تقول احس اني لا الى هؤلاء ولا الى هؤلاء .. والمشكلة احنا فاكرين ان غير السعوديين مبسوطين عندنا وعايشين حياة هنيه وانهم والله لولا اهلهم انهم يتمنو يرجعو بلدهم او يهاجرو اي بلد يحسو فيها بالاحترام اليوم قبل بكرة ... اهم شي الانسان يحس بالاحترام ويحس بقيمته كإنسان في اي مكان يكون فيه .. وغير كده الله الغني عن المكان دا .. والله اسكن في عشه ولا اسكن في مكان احس فيه اني متهانه ومنبوذه من المجتمع واعامل معامله ونظرة (الدون) ...

يعني هم كفاية انهم مغتربين .. انا احس انهم كـ ظيوف علينا هدول اكتر ناس اكرمهم .. لأني المفروض اعرفهم اننا قد ايش اصيلين وقد ايش احنا ديننا (اللي فالحين مسميين نفسنا اننا اهله) دين يعامل الناس كلهم بسواسيه واطبق فعلا (لافرق بين عربي ولا اعجمي الا بالتقوى) وغير كده اخليهم يحبو السعوديين بدل ماهم ماهم طايقين يعيشو في البلد بسبب تعاملهم السيء ...

مجبور معليش طولت .. بس فعلا انا دا الموضوع مأزمني جدا .. وان شاءالله أملي انه يكون فيه تغير في المجتمع والناس يكونوا أكثر رقياً <<الحلم العربي


وشكراً لك

وشكراً من قلب لكل مقيم عمل شيء مفيد لهذه البلد .. وكان الله في عونكم ..وردكم لبلادكم أو أي بلاد تقدّر الانسانية (بما تبقى من كرامتكم) سالمين

:)