ليش الغياب
ليش الغياب؟؟
أشقيتها عروق السؤال
ياللي شرخت محبتي
ما دستها دروب الوصال؟؟
قصه تموت بخاطري
وبناظري لمحة صواب
شوف الذنوب
علمتها تخطي وتتوب
علمتها وشهو الخطا
وكل البراءه بها تذوب
شوف الورود
ما بينها قصة عشق مثل الخيال
مثل الدموع
اللي اعشقت رمل الصحاري ع الخدود
مرّت ليال
ما ذاقت حدود الأماني بلا دموع
مثل الشموع
لا ذابت بآهه تشق صدر الوله
بين الضلوع
عقب العذاب
شنهو الذي بعده جنيت الا السراب
عقب الربيع
سطرْت في دفتر حياتي
بعض من بوح الخريف
صرت الذي لملم شبابه
وانكسر وجه الشتا وذوّبْه صيف
إنت وأنا
وهذا الغياب
قصه طويله من فصول
فصلٍ تذوب به المعاني والهنا
ننثر على وجه الزمن كل الزهر
ننسى العنا
ننسى الشقا
نرسم مواعيد السهر
نحكي ونجول
كل العواصم في خريطة حبنا
وفصلٍ تموت فيه الأماني
وتوْ الثمر منه انجنى
بعثرتني مثل الورق
اشقيتني بصد وعشق
واثر الحزن فيني انبنى
صرت اشتكي هذا الغياب
بلا عتاب
صرت اتبعه مثل السراب
ما ادري الخطا مني أنا
والا انت ضيّعت الصواب
شفتك هناك
ما بين جدران المسا
يتلعثم بشوقك حنين وخوف
وحروف القسا
كنك نسيت
ذاك الوعد اللي انوقد
لحظة لقاك
لكن قسيت
شوف العمر
ذابل مثل ذاك الزهر
حط الغياب
في راحة إيدينك عطر
وتنفسه
كلما طريت بخاطرك
وازعل علي
لا جيت قسوه بناظرك
كلي غياب
كلي وله
كلي جروح بهالكتاب
كلي حلم
كلي وهم
كلي محطات لمواجيع السفر
وارجو العذر
هذي تعابيري إذا شح النظر
كل الصوَر
كل الشعر
كل النثر
تنطق إلي عذبتها بلحظة غياب
خلني أقول
وبآخر اللحظه بفضا قلبك
خليني أجول
واستكشفه
ذاك الغياب
اللي طفل قلبك هواه
من عذبه ؟؟
من بعثره ؟؟
من قاسم الآهه معاه
ما أجبرك توفي إذا شح الوفا
وبآخرك
وبأولك
علّم جليدي ينتظر منك دفا
والا كفا
بس بسألك
ليش الغياب؟؟
|