[نضال]

بايوك انت خلطت الابيض في الاسود !!

الحب في الله شي و الحب اللي انا اتكلمت عنه شي تاني


انا بصراحة مؤمن ان جيل ابائنا و اجدادنا كان يعطي للحب معاني اكبر و اجمل من المعاني اللي بنعطيها احنا للحب

الحب في جيلنا صار يمثل كلمتين حلوة على كم لحظة مشاعر جارفة و السلام بعكس جيل ابائنا

معظمنا يمقت دي النظره في الحب , لكن معظمنا بيطبقها و هوا ما يدري

فيه احصائيه عملتها جهة اجتماعيه اثبتت ان 80% من علاقات الجوال علاقات فاشلة ,,

و نسبة كبيرة من الزواجات اللي تتم عن دا الطريق زواجات فاشلة و غير سعيدة في نفس الوقت , و دا الكلام ماهو من عندي

من عند نفس الجهة الاجتماعيه اللي عملت احصائياتها , و احصائياتها كانت على اشخاص لهم علاقة وثيقة بتجربة الحب و الزواج

=============
و بمجرد انك تفتح قلبك لانسان و تشكيلو و تفضفضله حيكون دخل قلبك و سار في حب صادق يجمعكم

و احتمال كبير يطور الموضوع و يسير حب حقيقي ينتهي بزواج اذا اتوفرت شرووط معينة يتفق عليها الطرفين

و الحب دا محا يكمل الا بالعشرة زي ما قال الاخ نضال ( يعني مع العشرة حيتضاعف الحب مئات المرات )

و اكيد اللي حببوو و اتزوجو عارفين الشي دا
=============

انا اشوف في دا المقطع انك اتفقت معايه اتفاق شبه كامل


آخر اقتباسين في ردك يا بايوك

"حـب النت والمسنجـر والتليفـون حـب مؤقـت وزائـل..."

هو بالفعل حب زائل و مؤقت لان شروط اقامة العلاقة الناجحة تكاد تكون معدومة فيه ..

ما قد سمعت ان العين تعشق قبل الاذن ؟

انت او انا او اي احد من الشباب , لو شاف وحدة حلوة في الشارع ممكن يحس باعجاب قوي تجاهها , " تختلف ردة الفعل تجاه دا الاعجاب بختلاف الشخص ,,, فيه ناس اول شي تصلح الشماغ , فيه ناس تفشخ فمها و تبتسم, فيه ناس تدور على قلم و ورقة و فيه ناس ترخي عينها في الارض .. مو دا موضوعنا "

لكن لو قابلت وحدة على الماسنجر , يمكن يعجبك كلامها او صوتها لو كنتوا على الجوال لكن بمجرد ما تشوفها حتختل نسبة التوافق بينك و بينها او بينك و بينه اذا كانت عكس اللي تخيلته عنها

و السبب واضح

انت جالس ترسم في بالك صورة لهدا الشخص و احتمال كبير ما تطابق الصورة الواقع


على دا الاساس , حب الماسنجر و التلفون حب زائل و مؤقت



اما الاقتباس الثاني

"الشئ اللي يجي بسرعــة يروح بسرعــة"

اعتقد انك اذا تعلقت بشخص معين و حبيته في وقت قصير ..

حتقدر تنساه او تتناساه في نفس الوقت القصير دا

خد على سبيل المثال

دائما اذا حصلت اتنين عايشين مع بعضهم لمدة 15 سنة مثلا او اكتر , و حصل بينهم مشكلة لا سمح الله


حتلاقي احتمال انفصالهم ضئيل , لن كل واحد اتعود على وجود التاني في حياته للدرجة اللي ما تسمح لهم انهم يفكروا كيف بتكون الحياة بدون التاني

لكن في حالات حديثي الزواج ,, تحصل نسبة الطلاق جدا مرتفعه , و خصوصا في دي السنوات , و الاحصائيات تتكلم

الرياض مثلا نسبة الطلاق في السنة ماضية وصلت اكتر من 40% من حالات الزواج اللي حصلت في نفس السنة

و السبب واضح

اللي عاشوا مع بعضهم لفترة اطول حصل بينهم عشرة زي ما انت قلت يا بايوك بعكس اللي دوبهم متزوجين

و الحب زي ما انت قلت يزيد و يقوى مع العشرة


اسف على الاطالة بس الموضوع شدني :)