معلييش والله بس دخلت من باب الفضول اشوف ايش صاير معاكم
والله
ماظن اللي عندها اخلاق زي ماتقولين باخلاقها كان مالبست ذي العبايه اللي كانها تعرض نفسها فيها
واذا على كلامك الثاني لااااتعليق
اذا تسوي المصايب ذي كلها وكمان مو مقياس شرف ايش الاخلاق بنظرك ومقياس الشرف
|
يختي لا تعتبريها عباية
اعتبريها فستان اسود طويل
اعتبريها بنت مو محجبة ولبست فستان اسود وطلعت
حتخليها تتحجب غصبا عنها؟؟؟
الحجاب قناعه داخلية قبل ما يكون منظر خارجي
ومن نواقض الاسلام كره امر جاء به الله ورسوله ولو عمل به
يعني الانسان لازم يكون مقتنع انو يصلي عشان ربنا ويصوم عشان ربنا وويطيع امه وابوه عشان ربنا ويزكي عشان ربنا والبنت لازم تكون مقتنعه من جواتها انو الحجاب دا ربنا امرني فيه وانا لازم البسه عشانه هو
مو عشان الناس لاتقول عني اني بنت بطالة ولا عشان الناس ما تاخد فكرة وحشة عني ولا ايش يقولوا جماعتي لو شافوني بدي العباية
يعني البنت اللي تلبس الحجاب عشان اتعودت على كدا وماعندها قناعه داخلية فيه ترجع تراجع نفسها وتدور وتبحث واكيد في الاخير راح تقتنع فيه
عشان تكون مبسوطة وهي لابسته
لازم نفهم انو مافي شي يصير بالغصب في دا الزمن
كل شي يجي بالتفاهم والاقناع
الاسلام دين مافي منو في العالم كلو والرسول مشى الصحابة والمسلمين بالاقناع مو بالاكراه مو بالعادات والتقاليد
عمركم ما راح تقنعوا احد بدا الاسلوب المستفز والاجباري
اذا هادي نظرتكم لبنت لبست عباية ضيقة ايش نظرتكم للمسلمات الغير محجبات برا اللي طالعين بملابسهم؟؟
كفروا؟؟؟
ولا صاروا عديمات اخلاق وشرف؟؟
والله اني شفت بنات مصريات ولبنانيات وسوريات وتونسيات وغير عربيات مسلمات وغير محجبات واخلاقهم زي الفل واشرف من الشرف نفسو
ايش التفكير دا يا جماعه
اي واحد ما يمشي على تفكيرنا يصير كافر وعديم شرف وعديم اخلاق
في من البنات اللي يلبسوا العبايات اللي من كتر ماهي ضيقة تحسها حتتقطع على جسمهم لانهم مو محجبات اساسا
الاجانب في بلدنا اللي يجوا غير محجبين او غير مسلمين اساسا
شيء جميل نشوفهم متماشين مع عاداتنا ولابسين العباية السودا
حتجبروهم كمان يتحجبوا غصبا عنهم؟؟؟؟؟؟
ولا حتروحوا تفجروا سفاراتهم واماكن عملهم وسكنهم؟؟
الحجاب امر رباني نزل من سابع سما
يعني هدا شي ديني هي وربها يحاسبها
احنا علينا النصح وبس
ولا كمان حتمشوا بعصاية في الشارع وتجبروا الناس يمشوا على الدين 100%
ويا ليت تلاحظ اني ما قلت انو الشي دا صح
بس قلت انو مافي داعي الاحكام دي وانهم فاجرات وفاسقات وعاهرات وما يصلوا وكفروا لاننا ما نعرف ايش جواتهم
وبالنسبة لغشاء البكارة
لعلمك ترى في بنات غشائهم جدا خفيف ممكن من اي طيحة يتشق
في بنات من ركوب الدراجات والسقوط منها ينفتح غشاء البكارة
في بنات من ركوب الخيل
في بعض انواع الكوتكس الخاصة بالسباحه اذا لبستيها بشكل غلط ممكن تزيل غشاء البكارة
في اغتصاب الاطفال يزيل غشاء البكارة
في بنات غشائهم مطاطي ما يزول الا بالولادة او بعملية جراحية
وفي بنات فتحات الغشاء كبيرة فماينزل الدم عند ليلة الدخلة
وطبعا دا غيض من فيض من الاسباب اللي تؤدي لفض البكارة مع انو البنت تكون اخلاقها زي الفل
وفي بنات يغلطوا ويسووا عمليات يرجعوا بنات
غشاء البكارة عمره ما كان دليل عالشرف لكن احنا اللي خلينا كدا
وممكن لما تروحي دكتورتك المرة الجية تستفسري زيادة وتعرفي
سومه الحلوة انا اشك انك من جده ولاماكان ذا كلامك الحمدلله انه في حجاب ولاكان الدنيا خربت من زمان
|
ايوا صح نسيت اقولك
انا ايطالية بس عايشة في جدة <<<< امزح
لا يا قلبوو انا من جدة وسعودية كمان
وفجدة زي ماهو في اي مدينة في محجبات وفي غير محجبات
متى انا قلت انو مافي حجاب وانو البنات طالعين بطولهم؟؟؟