[وفاء جدة]

أنا والهم و الوحده على طول السنين إخوان

على الحلوة وعلى المرة على صوتي على الحاني

أنا جرحي حفظته في دروج السر والكتمان

وفجر داخلي عالم يحاول يقطع لساني

أنا اللي كان صدري للخيول الجامحه ميدان

و أنا اللي طيبتي كانت شعور للهمس وجداني

أنا اللي كنت غافل لين جتني طعنة الشريان

نزفت العمر كله لين ضاعت قوة إيماني

ترى طعنة قريبك لوصلت يا شينها بركان

و أنا اللي طاح صدري في يدي و انهزت أغصاني

تغير كل شي عندي وانعدمت الألوان

وصار اللون الأسود من هنا اسمي وعنواني

أنا المجرم و أنا اللي ما قتلت بداخلي إنسان

قتلت الحب والطيبة بعد ما شفت نقصاني

أنا الحاكم وأنا الظالم وأنا عالم من الحرمان

ومن يدخل محيط الحزن يبشر بي ويلقاني

أنا اللي خافقي مسجون وإحساسي هو السجان

وضاع العمر مني ما قدرت اقبض على الجاني

أنا عالم غريب وعالمي ما يسكن النسيان

عجزت انسى جروحي والزمن يسعى لنسياني

كفاية ما كتبته من وهم عمري على الجدران

كتبت آخر قصيدة بالدم فـي صدر حرماني