رد: فائض من النسوة علينا رميه للموت!
أهلا أهلا ابو عبدالله
اول شي :
مقولتي وضحت ايش اقصد فيها ..
وعدت الشرح وحرجع مرة تانية اعيده
عندنا شخصين
واحد واتنين
واحد دا عنده كتاب في كل اصول الاتيكيت في العالم واحسن كتاب يعلم البشرية كيف يكون ناس متأنتكة ومرتبة
واتنين ماعنده الكتاب دا .. لكن عنده أساليب واحد واتنين وتلاتة واربعه عمرها ماكانت بكمال كتاب الاتيكيت حق رقم 1 لكنها اساليب حطها من راسه كدا
طيب ؟ حلو لما دحين؟؟
رقم واحد دا يمسك الملعقة بكل يده زي مسكة الاطفال
يملي الملعقة للاخر ويدخلها كلها فحلقه .. يتكلم وفمه كلو اكل .. يوسخ ملابسه وفمه ويده وهو ياكل
يطلع صوت وهو يمضغ .. غرفته موسخة وملخبطة والملابس مرمية فكل مكان ..
وعنده كتاب الاتيكيت .. ويقراه بين فترة وفترة وممكن كل يوم وفوق دا ودا يدرسه بالمدرسة.. لكن يقراه للمطالعة بس
وعندنا رقم اتنين ماشي بكل الاساليب الي حاطها لنفسه ويحاول ما يغلط وازا غلط يعاقب وفي حالات بيهرب من العقاب وفي حالات مابترضى تتبع النظام اللي هو حاطه لكن بالغالب تلاقيه انجح من الاول في الظاهر ومرتب اكتر منو ومتقدم ومتطور اكتر منو
مين احسن ؟؟؟
صاحب كتاب الاتيكيت الكامل اللي مافي زيو اللي من هو صغير يدرسه ويسمع انو احسن كتاب واحسن نظام ولا بيتبع شي منه
ولا صاحب الاساليب الوضعية الي يعلمها لنفسه وقدر يكون من نفسه قوة ونظام في بلده؟؟؟
ازا مافهمت قصدي كمان بعد الشرح اللي حاولت اشرحه فأنا اعتذر ..
لأنو ماعندي شي تاني اقوله واوضح اكتر
بالنسبة للدراسات اللي اقسم بالله مليييييت وانا كل ما افتح موضوع يجلسوا يعيدوا ويزيدوا فيها
أول شي ترى مجرد وجود زي دي الاحصائيات والدراسات دا يعتبر نقطة كبيرة جدا في صالحهم ..
تاني شي ..
جبلي نفس الاحصائيات دي مقامة على العالم "الاسلامي " وجبلي مصدرها وعلى اي شريحة اقيمت
كم عدد النساء المغتصبات في بلادنا ؟؟؟ عندك اي دليل اننا اقل منهم؟؟
كم عدد الاطفال اللي يتم اغتصابهم في دا السن؟؟
كم عدد البغايا عندنا؟؟
لا تجلس تقارن تزويج اطفال في سن 8 و9 و10 سنين في مجتمعاتنا لرجال تجاوزا العشرين من عمرهم وبعضهم وصلوا للـ60 والـ70 بممارسة الزنا لمراهقين بسن 17 و18 وبرغبتهم وهو يعتبر شي عادي في مجتمعهم مع انو غلط عندنا
شتان مابين الاتنين
كم عدد الشواذ عندنا ؟؟؟
كم عدد النساء اللي ينضربوا ويعذبوا جسديا ونفسيا من ازواجهم واخوانهم وابائهم "واولياء امورهم" عندنا؟؟؟
لسه الاسبوع اللي فات قريت عنوان في جريدة الجزيرة حسب ما اذكر بانه 92 % من السعوديات سبق وتعرضن للاعتداء من ازواجهن
والله اعلم بصحة الاحصائية هادي من عدمها لأي وقتها كنت مستعجلة
لا تجلس تجيب احصائياتهم واحنا ماعندنا اي احصائيات ... ترى كل شي ذكرته موجود عندنا بشكل او بآخر
ايش اللي يثبتلك انها حالات فردية ولا تتجاوز اصابع اليد؟؟؟
عندك احصائيات واثباتات على كدا؟؟
ولا اعتمادا على وكاله يقولون للانباء ؟؟
ترى الاشياء الي زي كدا مافي احد يتكلم عنها عندنا .. ودا ماينفي انها موجودة او ازا طلعت قضية او اتنين انو هي بس دي الموجودة
أما العنصرية وما ادراك ما العنصرية عندنا ..
ياترى كيف بنعامل البنغالي ولا الهندي والباكستاني ولا الاندنوسي ولا الفلبيني اللي جايين يشغتلوا هنا؟؟
ياترى زوجتك او اختك او امك بتعامل الخدامة فالبيت زي ما بتعامل بنتها او اختها؟؟
بلاش نجيب الجنسيات دي
كيف بنتعامل مع الجنسيات العربية التانية اللي جية بلدنا؟؟؟
يا اخي كيف بنعامل السعوديين اصحاب البشرة السمراء من اصول افريقية واللي حالتهم على قدهم؟؟
كل شي قلته الاسلام منه براء عشان جايز تفهم كلامي اني بقول انو الاسلام فيه نقص
الاسلام هو ديني الكامل
بس الاسلام شي ووضعنا شي تاني خااااالص
|