[soma al7elwa]

عاشق الفهد:

أول حاجة الدكتور مالو ذنب انو مجتمعك الرائع بيفكر بدي الطريقة ..

الدكتور بيوضح لطلابه انو وقت ماتصير حالة تحتاج انعاش قلبي بمكان عام وحاولوا يعملوا انعاش كيف المجتمع حيشكرهم الشكر الجزيل على محاولة انقاذ حياة النفس البشرية دي ..

راح ينعطوا ميداليتين :
الاولى ميدالية كشف عورة والتانية ميدالية كشف العورة في مكان عام

ومو غلط من الدكتور انو وضحلهم ايش تفكير المجتمع المثالي اللي احنا فيه وايش الجوائز والمكافآت اللي راح تتقدملهم لو حالوا يعملوا بسمو مهتنهم .. عشان لا يروحوا هما في ستين داهية ... اوبس

قصدي يعني انو فستين داهية من الفرح والسرور بالهدايا والميداليات المقدمة لهم

تاني شي :

اعتذر وبشدة عن إني شوهت صورة مجتمعنا اللي مافي أحلى وأكمل منو فالدنيا دي كلها من تعاملاته وقضائه وتفكيره وحساباته ومساواته وكل شي فيه ..

أتمنى اني قدرت اصلح الخطاب في ردي الحالي ونال اعجاب حضرتكم ..

تقبل ردي ياسيدي

_________________________

كاندي :

حبيبي ارجعي اقري كلامي كزا مرة وقلبيه فراسك مزبوط

حتلاقي اننا بنقول انو مجتمع يسير على قوانين وضعية مهما كانت قاصرة نظرتها ويحترمها ويعمل بها احسن من مجتمع عنده قانون رباني كامل ومابيعمل فيه

ايش استفيد من انو عندي قانون رباني لو التزمت فيه -وحطي تحت كلمة لو مية خط - راح اكون احسن منهم بمليون مرة مع اننا فالواقع مابنلتزم ولا بنعمل بيه ؟؟؟؟

ايش استفيد انو لو كان عندي كتاب بيعملني اصول الاتيكيت وانا حاطته عالرف اني اقراه مطالعة كدا وتلاقيني اكل وادخل يدي كلها ففمي ولا تكلم وفمي كلو اكل والعب بالاكل اللي عالصحن واتكلم بصوت عاااالي وغرفتي كلها فوضى

واجلس اقول انو عندي كتاب فيه كل اصول الاتيكيت ولو اتبعته راح اكون احسن من كل الناس واتمنى اننا نتبعه؟؟

ومانيل المطالب بالتمني .. ولكن تؤخذ الدنيا غلابا

ياريت يكون وصلك المعنى اللي اقصده ..

أما بالنسبة لبقية كلامك عن تزيين وزخرفة قضايا المرأة فما اعرف ايش اقول صراحة ..

زي ايش قضايا لو فكرنا فيها حنلاقيها مالها معنى بس بلبلة صحفيين والسلام؟؟

قضية انو في بنات بيموتوا بسبب منع المسعفين الرجال انهم يدخلوا هادي بلبلة؟؟

قضية انو يفرق بين زوجين راضيين بعيشتهم بسبب اخوان الزوجة لابوها دي بلبلة؟؟

قضية تزويج الاطفال دي بلبلة؟؟

قضية ازمة المواصلات دي كمان بلبلة؟؟

ايش هي المواضيع اللي كل الهدف منها اثارة البلبلة؟؟؟

اللي صار في حريق مكة قبل 7 او 8 سنوات وقضية بريدة دي مو غلط المسعفين

هما كانوا متواجدين لكن اتمنعوا من انهم يدخلوا ويباشروا عملهم ..

فهل غلطي اني اكون موجودة واتمنع اني ادخل واباشر عملي بالقوة؟؟؟

وصدقيني الاخطاء الطبية في ضجة كبيرة جدا عليها

لكن حقوق المرأة قضية ازلية .. واقولك على شي ؟؟

انا امرأة ابحث عن حقوق المرأة في بلدي وأثور لها ..

وتعرفي ايش الغرض التاني اللي فنفسي؟

انو بنتي ماتجي تعيش في مجتمع زي كدا ..

وبعيد الشر عن قلبك