[نسووومة]

اولا حبيت انبه الاخ اول المشوار الرجاء التأكد من الآيات القرآنية قبل الاستشهاد بها

وربي يقول في كتابه (وعلى نياتكم ترزقون) ويقول عز وجل (الطيبون للطيبات)

((وعلى نياتكم ترزقون)) مافي آيه إسمها كده ...ولا فيه في القرآن كله الكلمة دي ،،

التانية .. الطيبات للطيبين والطيبون للطيبات ...



بالنسبة للتعليق على موضوعك

ماادري اش اقول ايش ولا ايش ولا ايييييييييييييش

بس عموما لازم يكون هدفك من الدراسة دي اولا وأخيرا انك تتعلمي وتتطوري وممكن تخلصي دراستك وتكملي ماستر او لو كنتي متفوقة تتعيني معيدة .. وبكده راح تطبقي اللي درستيه عشان ماتنسيه ..

طبعا هو التطبيق او العمل فايدته انك تمارسي الكلام النظري وتكتسبي خبره ..

أما اذا زي ماتقولي جوزك ماحب انك تشتغلي .. فـ طبعا الموضوع مايتاخد بالعناد او كده ... والله اذا جاكي واحد مايبغاك تتوظفي .. أسمعي منه وناقشيه .. ايش وجهة نظره ..ليش رافض .. ويا يقنعك ياتقنعيه .. او اذا الطريق مسدود مافي أمل .. وانتي بالنسبه لك دا شي ماتقدري تتنازلي عنه .. فـ الله يعوضك بأحسن منه ،، والزواج دا أصلا الواحد يشيل يده منه احنا اللي نعمله مجرد أسباب .. بس لو ربنا كان كاتبلك واحد حتتجوزيه لو ايش ماكان ..

وبالنسبه لمسألة الاختلاط فأعتقد يعني إنو المسألة مو بهذه البشاعة .. يعني لو واحدة بتشتغل ورئيس قسمها مثلا او مديرها راجل .. معنى كده انو لازم ياخدو على بعض ولازم يكون فيه انحراف !!!

هذا يحصل لسببين اتنين .. أول شيء انو البنت اصلا مايكون عندها أساس في حياتها وماشيه بالبركة لاقيم ولامبادئ .... ولا حاطه لنفسها حدود معينة وكان عندها عقل تفكر فيه وتعرف تتصرف صح وتتكلم كيف ......السبب التاني .. ان الراجل يكون ينظر للبنت نظره وحشة يعني مجرد"ست" وخلاص ..بغض النظر عن انها انسانة لها كيانها وتفكيرها واحترام لخصوصيتها وعقلها ... يعني بالعربي نظرته لها "دونية" ..

ودا للأسف تفكير مغلب الرجال السعوديين ...

ونرجع برضو للنقطة اللي شاربينها من يوم هم اطفال المرأة فاسدة مفسدة لازم وجود رااجل معاها في اي مكان تروحه ياخد على يدها عشان لوحدها حتنحرف !!!


وعلى سالفة لو صديقتي مع زوجي في العمل .. أنا عشان خليتها "صديقتي" المفروض اني أكون صادقت وحدة أهل للثقة وعلى قدر من الوعي والاحترام .. والمفروض كمان أكون واثقة من زوجي ... زي ما أحب انه يكون واثق فيا ...

ياجماعة السيء سيء

وربي لو حطيته في وسط ملائكة راح يفسد ... والصالح صالح لو حطيته في وسط أفسد ناس ....


وفيه حاجه ضروري الناس كلها تعرفها وبالذات "البنات"

انو ربنا حيحاسبك "انتي" على عملك سواء سيء أو حسن ... مارح يحاسب زوجك ..

الراجل لازم لما يعطي لزوجته الثقة والأب لازم لما يعطي لبنته الثقة .. لازم يقول لها انتي راقبي ربنا و نفسك وضميرك

وتأكدي ان كل شيء حتعمليه انتي محاسبه عليه ... "عشان نتعلم مانعمل شي عشان الناس .. وعشان فلان قال لي لاتعملي ما أعمل"

انتي انسانه محاسبه على كل صغيره وكبيره حلوة أو مو حلوة .. (وكل انسان ألزمناه طائره في عنقه) مو في عنق زوجه او ابوه او امه...

الواحد لما يحس انه متحمل مسؤولية نفسه .. وعارف انه هو الوحيد اللي راح يجني عليها بأفعاله ... وقتها ينصلح الحال ...




تحياتي للجميع :)