[.,.نيــــــــــــــــــــران.,.]

المشاركة الأصلية كتبت بواسطة b n d r اليوم الأول.. الجميع في خارج المبنى 125 ، حالة ارتباك وترقب تبدو على الوجوه.. العالم جالسين يصدمون ببعضهم لان مافيه احد كان يناظر قدامه، الكل يمشي وماسك المذكره ويقرأ.. كن جدول الاختبارات مانزل الا اليوم الفجر على موقع الجامعه .. (زيي انا مثلا والله العضيم اني طابع المذكره من الانترنت اليوم الصباح.. وانا بالطريق للجامعه.. مريت اقرب مكتبه وطبعوه لي) << بس لايهمكم / كان يذاكر من الكمبيوتر بس يوم جاء اليوم الصباح مالقى مذكره يروح فيها، (هذا الي ماحسب حسابه) لدرجة انه خطط ياخذ اللاب توب معاه للجامعه، بس خاف لايطلع بكره بمقطع بلوتوث .. أصعب شي عندي جو التوتر عشان كذه ماأجي المبنى الا على وقت الاختبار كان الجو طبعا شوية غبار وهواء ويواجه المدخنين صعوبه بتوليع الزقاره.. انا دخلت المبنى مع الجيش الأول، تفاجأت وطار عقلي / القاعات مليانه على الآخر.. متى دخلوا ذولا.. مدري في ابواب سريه ماندري عنها ولا راشين بخاخ الاختفاء على انفسهم ومروا من قدامنا ماشفناهم.. مدري بس.. المهم والزبده من الموضوع/ ملاحظاتي على اختبار اليوم bus101 انه كلما زاد عدد الاسئله كلما كانت النتيجة افضل.. يعني لو قلنا انك مخطي بـ 30 سؤال (وبرأيك انها واجد) بتكون درجتك 70 .. وستكون الاسئله شامله كامل المنهج.. وتزيد فرص التشابه في الأسئله.. الشي الي/ يخليك قادر تتوصل لاجابات اسئله ماكنت متأكد منها عن طريق اسئله أخرى، وتحاول تربط بين معطيات في سؤال ما مع معطيات أخرى أو نتائج في سؤال آخر.. وهكذا! انا الاسلوب هذا ألجأ له في كثير من الأحيان ويجيب نتيجة معي! طبعاً هذا اسلوب يحتاج (ذهانه) <<< :) ايوة والله كذه سويت في اختبار علم النفس عرفت جواب سؤالين عن طريق سؤال واحد كل الي كتبته فوق خطوات ومميزات،، (ماقلنا شي) لكن هذه الخطوات والمميزات تخضع لشروط لتحقيقها،، وأول شرط وهو المهم : الوقت.. الوقت.. الوقت.. الوقت.. الوقت.. الوقت.. من هنا الى يوم السبت مادام مافيه وقت كافي، ماراح نستفيد.. اول حاجه يسببها الوقت / الانفعال.. واذا انفعلت فقدت التركيز.. لانك تحاول تفكر بطريقه سريعه ومشتته.. ويعني لو صار ساعتين وش بيضرهم.. اصلا الي يبي يخلص بدري بيمشي من حاله، وهو من زين جو القاعه عاد!! وان بقى احد وكمل الساعتين بيكون ماله عذر عاد، اعتقد نص ساعه زياده - بتخلينا نحل بروقان.. وهم ماراح يخسرون شي بالمقابل، شغلهم هو هو بالنهايه بيقعدون يجمعون بهالاوراق ويرتبونها ويسلمونها.. مازاد شي.. ماراح يزود فيهم الا الأجـــر.. بس وش تقول ناس مدري كيف تخطط وتنظم وتوجه وتراقب.. قال ايش قال وظائف الاداره من جد هذا الشيء ماانساه في اختبار مبادئ ادارة المشكلة التظليل لحالة ياخذ وقت - اما سالفة انه ينقز لك واحد في آخر القاعه ويسأل كم بقى وقت!! هذي بحد ذاتها مرعبه!! وتنرفز - ياخي الله يرحم والديك طلع جوالك وشف كم الساعه وانت ساكت!! ياخي اسئله غبيه زي الي يسأل المراقب ويقول: نكتب الاسم الي على ورقة الاجابه بالقلم ولا المرسمه ؟ يرد المراقب ويقول القلم.. - عادي مشيناها وقلنا يمكن الولد يفقد الذاكره بسرعه وهو الي له سنه قاعد يختبر ويكتبه بالقلم - أما انه ينقز مره ثانيه ويسأل ويقول: طيب يادكتور و ورقة الأسئله بعد بالقلم ولا المرسمه؟؟ هذي حاجة حطمت كل التوقعات وكسرت سوق الحواطى كلهم ، وتم تسجيل هذا السؤال في موسوعة جينيس للارقام القياسيه كأغبى سؤال على مر التأريخ.. حسيت بعدها ان الامتحان راح يكون تعجيزي مادام ان كتابة الأسم كانت صعبه.. ههههههههههههههههه المهم ارجع اكمل موضوعي/ السلبيه الوحيده من زيادة عدد الاسئله هو زيادة فرصة وجود اسئلة صعبه.. لان ضرورة تكوين اسئله كثيره تجبر واضع الاسئله انه يستعين بالتفاصيل والامور الدقيقه، لتعويض النقص في مواطن الاسئله الواضحه (والي هي النقاط الاصليه في المواضيع).. وله العذر في ذلك!! وهذا الي صار في اختبار اليوم.. انا بالنسبه لي اعطي اختباري نسبة 7 من 10 بداية غير مطمنه!! ارشحك تكون مسئول عن كتابة الاسئلة في الجامعة وتفكنا من الازمات اللي ذكرتها -- صيد الكاميرا -- بعد نهاية الاختبار ركبت مع ليموزين والسواق برماوي ،، جلس يشكيلي عن معاناته من الاقامه رافضين يجددونها له لان جواز السفر حقه بنقالي وهو اصلا هو مولود في جده ويتكلم عربي.. انا حسبته يماني.. ويقول الحين لو يمسكوني بيرحلوني لبنقلادش، وانا ماعرف احد هناك ولا عمري زرتها اصلاَ والمصيبه الكبرى انه مايعرف يتكلم بنقالي .. - هذي بحد ذاتها نكته على طرفه على فلم - صراحه كسر خاطري، ووعدته اني اطرح قضيته للمناقشه في المنتدى.. الله يكون في عونه الى اللقاء في رسالة جديده من برنامجكم اليومي/.. ( يوميات جامعيه )

بالتوفيق في الاختبارات القادمة

على الهامش:>> وين الموضوع حق الملخص عشان احطه بدال القديم <<