[أسير]

أول شي يا أخت نيمو بلييييييز طلب بسيط .. بس يا ريت طلبي - اللي هو طلب جميع الأعضاء و أنا متأكد من كذا - إنك تكتبي بحروف عربية .. إنتِ لحالك الشاذة و تكتبي بالإنجليزي .. و الله إني أحتاج تركيز أكبر لما أقرأ ردودك .. حااااااااولي تتعلمي Typing بالعربي ( و لا تشردي من المنتدى )

ثانياً : لو قرأت ردي على الأخ نضال راح تلاقي إن كلامي كله مبني على تجربة شخصية ، وأنا غير نادم عليها إطلاقاً لأني اتعلمت منها كيف أحب من أعماقي ، و اتعلمت إن فيه ناس تستاهل تنعطى الحب الصادق .

الكلام اللي أنا قلته كله ( طالما إنه من واقع تجربة ) فهو نابع من الأعماق ، ما هو مجرد تصرفات بين شاب اتصاحب له على وحدة و حبها و حبته ، هذا مو حب ، هذا اسمه لعب بزورة ، لأنه مبني على الحاجة ( باختلاف ماهيتها ) ، لكن اللي اتكلمت عنه تصرفات إنتِ ما تبغى من وراها شي إلا سعادة الشخص اللي تحسي إنه هبة لك من رب العالمين ، إنه سكن روحك من جد ، و بالتالي هذا الحب عمره ما ينهيه أو يقلل منه الزواج ، بالعكس ، لو كانت هذي التصرفات بين الزوجين فتأكدي إنهم ما راح يقولوا لأحد أي شي عن حياتهم ، لأنهم أكيد راح ينحسدوا على سعادتهم ...

طبعاً أنا ما راح أنشر مذكراتي على الملأ ، لكن أنا بأجاوبك بجزء من تجربتي على سؤالك ، و سؤالك عن المعاناة اللي نواجهها لما نحب أحد أو الألم النفسي اللي نعانيه فهو من كثر رغبتنا في إننا ما نفارق الناس اللي نحبهم ... من رد الفعل اللي ما نتوقعه من شخص كنا مخلينه متربع في قلوبنا ... و أحياناً لأننا نتمنى نعطي الأكثر للناس اللي نحبهم و مو قادرين .. أسباب كثير جداً تسبب الألم ، لكن مو من الحب نفسه ، لا ، من تصرفاتنا و رغباتنا كبشر .

نضال راح يقتلني .. بس الأخت نيمو استلمتني يا نضال .. سامحني

أختي نيمو .. كل اللي كتبته لك واقع ، مو مجرد مبادئ أو خيال أو مثاليات قرأت عنها ، واقع أنا شخصياً عشته و عايش أسيره .. عشان كذا لا تعتقدي إني أكتب لك كلام قصايد و أشعار .

ما أدري إذا قدرت أوصل للمعنى اللي إنتِ تقصديه و لا لأ ، يا ريت تفهميني بالزبط في ردك القادم إيش اللي تبغي تعرفيه . لكن لو اللي تبغى تعرفيه هو نفسه اللي أنا فهمته فما في أحد راح يرد عليكِ ، لأنك كأنك بتسألي:يا جماعة من فيكم عايش قصة حب يحكي لنا عنها عشان أعرف كيف الواحد يعرف كيف إنه واقع في الحب . أما إذا كان سؤالك كيف أوصل لواحد أعامله و يعاملني كذا فالجواب هو : انتظري واحد ابن حلال يتقدم لك و يخطبك و شوفي من عشرتك معاه إذا فعلاً كان عايش معاك بعض المواقف اللي اتكلمنا عنها أو إنت حسيتِ نحوه ببعض المشاعر اللي اتكلمنا عنها فوقتها راح تعرفي إنك فعلاً تحبي من قلبك .

أتمنى إنك تجربي الحب الصادق في يوم من الأيام مع إنسان يقدرك و راح تعرفي وقتها مقاصد كلماتي ..

تحياتي ..