ماذا لو قالت لك فتاة ..أريد أن أتزوجك..!!

[الاهلاوي]

مرة حزنت عليك يا il captino
لاكن خذها معلومة
اذا صارت معاك مرة تانية اضغط ctrl مع حرف z

ويرجع الي كتبته

تحياتي

[NeMo]

يلا سرييييع اللي ماجاوب يلحق نفسو




جالسة بعمل دراسة


واجوبتكم جددددددا تفيدني

[ليدر أستوديو هبقات]

أنا بأغير إجابتي

لوووووووووووووووول

[داوود]

أرجع مرة تانية اكتب اللي كنت ابغا اكتبوا

المهم رأيي في الموضوع

اتمنى دي القصة توضحوا

في مرة من المرارير

كان في اب عند ولد رباه فاحسن تربيتو وعلموا ...الخ الخ الخ

عدت الايام وابو دا الواد مات (الله يرحمه )

الاب دا ترك لابنه وصية مكتوب فيها

اذا اتزوجت ياولدي ... طلبي الوحيد منك انك تتزوج راجل

طبعا الموضوع بالنسبة للولد مرة غريب ... وهوا في كل الاحوال بدري ان يفكر في الزواج فا بساطة

قال خليني اجل فهم دا الموضوع الين اتزوج لاني بصراحة ماني فاهم شي .........

عدت الايام


والبني ادم دا اشتغل وكون نفسوا وجا اليوم اللي يتزوج فيه

ما قلنا معلومة عن دا الولد

انه حالته المادية متوسطة ... ( ميسور الحال )

المهم فالمن جا اليوم اللي يبغات يتزوج فيه .......... افتكر بالتاكيد وصية ابوه ... الل يتعتبر بالنسبه لغز محير

المهم الولد دا راح لواحد من اعز اصحاب ابوه قال هدا الشخص كان يمشي مع ابويا يمكن عندو الحل

فاراح لو وزارو وفينك ومن الكلام دا وقالو انو هوا يبغا يتزوج وابوه وصاه انه مايتزوج الا راجل

راح صاحب ابوه قاله والله صدق ابوك ياولدي طب الولد زي كدا ضاع في خرايطها .....

قالوا كيف ياعمي ........ قالوا انا مستعد اني احقق لك وصية ابوك بس بشرط انك

ماتسالني كيف وليه وتنفذ الل اقولك عليه .؟.............

قالوا الولد طيب يدي على كتفك اهم شي يكون الحل معقول

المهم راح الراجل دا قلو في بيت ناس اعرفهم طيبين وكدا شوف نمرهم ازا عجبت بنتهم وانت عجبتها وكان لكم خير

في بعض يسير الله يوفق

قالو بس ياعمي......... قالوا قلتلك لا تسالني ... فقال الولد طيب

المهم الولد راح شاف البنت وعجبتوا والبنت عجبها الولد وكدا ......

فا بس اتزوجوا والولد عاش وانبسط وكل حاجة

المهم في يوم من الايام خش الولد دا على مرتو ... لقاها بتبكي

قالها اشبك اش في

قالتلو احنا ماعندنا .... احنا ناقصنا ماني عارف ايه

شوف جارتنا ام فلان عندها والتانية ...عندها ومن الكلام دا

الولد قالها انتي في احد جاكي اليوم فاقلتلو ايوا

فا فهم الهرجة

فقالها طيب بعدين ... خير ما خير ... قالتلو مالي ابغاك توديني بيت اهلي

يابنتي يخطيكي يرضيكي .... مافيش امل وديني بيت اهلي

الواد قال مو كشكلة برضو من فترة مارحنالهم تروح تريح اعصابها

راح الولد اخد مرتوا وعلى بيت ابوها ... خشت البنت تبكي على امها ... وفي دي الاثناء الولد راح جلس مع ابو البنت

وقالو عالقصة بالزبط ... فقالوا ابو البنت خلاص سيبها تريح عندنا يومين تلاتة وبعدين لمن اكلمك يسير تيجي تتعشى وتاخدها ان شاء الله ومافي الا الخير

فقالو الولد طيب

المهم خرج الولد من عندهم والاب راح انفك الف على بنتوا

وقالها مايهمك منوا يحب مالك اهل ترجعيلهم مايكفي انو ادينالو اغلى شي عندنا

كمان يخليكي تبكي .... الله لا يردوا ماني عارف ايه ومن الكلام دا واقعد في بيت ابوك معززة مكرمة اليني يجي يبوس الايادي يبغاكي

المهم البنت مرررررة انبسطت انشكاح عالآخر

بعد ما البنت راحت غرفتها الابو قال لامها اسمعي ابغا الخدامة حقتنا تمرض الان وابغا البيت دا يبرق برق ابغاها تطبخ وتغسل وتكوي وتكنس ابغاكي تدهكيلي هيا دهك... تهد عافيتها ....

المهم البنت خلال 3 ايام ... اتشطبت .... فل كامل من التعب .. وتعرف عاد ناس كبار طلبات ماتنتهي ورجة دماغ ..... شي يبكي

المهم الولد اتصل على الولد من غير ما احد يدري وقالو خلاص تعال اليوم اتعشى عندنا فقالو الولد خلاص طيب

بعد كدا راح لبنتو وقالها زوجك دا ... الل فيه اللي يخطيه .. جاي اليوم يطفح سم هاري عندنا اطبخيلوا اليوم على العشى

المهم راحت البنت وزبطت ... عشى من مافش على قولهم الشي اللي يحبو زوجها ... المهم جا الولد واتعشوا وكل حاجة

رجع راح الاب للبنت وقالها .... بارد الوجه زوجك يبغا يبات عندنا افرشيلوا عند الباب في الارض وانا افرشيلي فوق الكنبة

والبنت عملت زي ما قال ابوها

وراحت على غرفتها في دا الوقت ابو البنت خلى زوجها ينام على الكنبة

وهو نام ف يالارض وغطى نفسو مزبوط ... وفي اخر الليل البنت تتسحب وتروح لزوجها .... اللي على بالها عند الباب

وقالتلو ابويا تعبني وبهدلني ... وماني عارف ايه خلاص بكرة نروح بيتنا ... الخ الخ الخ

في دا الوقت اللي شخص اللي على الكنبة بيتقلب حسبتوا ابوها راح انفكت على غرفتها

تاني يوم وبكل سلاسة فطروا مع بعض والبنت جهزت اغراضها ورجعت مع زوجها البيت

أبوها اش عمل ... صالح بين بنتوا وزوجها بدون اي واحد منهم مايعرف اش اللي سار بالزبط

فكان هدا معنات وصية ابوه لمن قالو لمن تتزوج لا تتزوج الا راجل

في رد اخر حابين اش علاقة دي القصة بالموضوع واسف على الاطالة

[ليدر أستوديو هبقات]

العلاقه باينه وواضح

وفعلا عبر كثيره

لكن المقصود من الموضوع حسب ما فهمته

ردت فعلك ساعة البنت تقلك أتزوجني وأنا أحبك وهذا الكلام

لكن والله أفدنا يالغالي

[داوود]

المهم الناس الكبار السكرة لمن يقعدوا يحكونا ... كانوا يقولولنا زمان .. كان الراجلل يخطب لبنتو.........


فا ترى موضوع انو البنت تعجب بشاب امر اشوفه عادي ... بس اللي مو عادي طريقة تعبيرها باعجابه لدا الشخص


الموضوع ترا مرررررة حلو ويلامس اشياء حلوة ..... ويقرب اشياء

فالبنت في حاجز بينها وبين الــVIP's اللي في عليتها ( اقصد اللي مسئولين عنها وبالاخص خصوصا خصاصاً الخصة )

ابوها وامها وبعد كدا اخوانها اللي اكبر منها وكدا

انا اشوف انو حلو انو يكون في حاجز معين بين الاب وبنتو او بين الام وبنتها بس دا الحاجز

يعتمد عالظروف

يعني مثلا يكون بينهم حاجز بس في نفس الوقت يكون في اخ كبير في الاسرة دي مكسرة معاه الحوواجز وهوا يكون

همزة الوصل بين الجهات القيادية في الاسرة وبين افراد الاسرة العاديين

ترا وجود الروح القيادية والخوف من اللي اكبر مننا اشوفو انا عامل مهم في التربية

المهم انه الحاجز دا مو شرط يكون ضروري هوا دايما يكون على حسب ظروف الاسرة دي

المهم نترك موضوع الحاجز على جنب ونقول انو لمن انا ابين لاخويا في جلسة صفا مثلا

انه الشخص الفلاني شخص وكويس واشوفه انسان كويس وانه اتمنى انو يكون زوجي

طبعا الجملة ماحتكون كدا هيا حتلمح لاخوها ... واخوها راح يفهم ويقول لابوه او امو بالتالي

وبعد كدا الجهات القيادية تقوم بوضع الخطط الاستراتيجية وعمل اللازم

وخلينا اقولك حكاية بنت تانية .. وهادي البنت ظروف اسرتها انو بين ابوها وامها مشاكل وانو كل ماواحد منهم يرضى بعريس التاني يرفض

البنت هادي كانت مبسوطة من الوضع لاانو كل اللي اتقدمولها ببساطة مو عاجبينها

المهم لما جا واحد اتقدملها وهي اعجبت فيه جدا وكان كالعادة احد الابوين راضي والتاني رافض

راحت البنت لام الولد او حاجة زي كدا وقالتلها انو انا راضية في ولد وزي كدا بس ابويا وامي كيت وكيت

والمهم البنت كبرت في عين الولد مرة لمن امو قالتلو وحاول بكل الطرق واتزوجها

ماني عارف الحكاية بالتصيل الممل بس ....اللي حكاني الحكاية قالي انو الشخص دا يقولو انو احلى شي سواها في حياتو انو اصر انو يتزووج البنت دي

انا شخصيا... اؤيد الموضوع دا بقوة

بس اللي ما اؤيدو كيفية تعبير البنت والوضع اللي جا منو الاعجاب

فا اظن واحد من الردود قال انو ف يالمنتدى انخطب او حاجة زي كدا وهوا ما ناسبو الوضع

فا مثلا ازا عالنت حا نخش في متاهة تانية ... واش معيار انك تقبل وحدة تكون في النت او لا

اتمنى محد يفهمني غلط لاني باتكلم عن الواقع ... عن الشي اللي بيصير مو شرط اكون انا

بس اهم شي انو بيسير

بس عشان نسهل الموضوع

راح افرض جدلا ... انو الطريقة اللي عرفت بيها انو البنت معجبة فيا ظروف مناسبة

والبنت نفسها تعجبني .........فا كون اني اتزوجها حيكون شي

اروع من رائع


اسف عالاطالة مرة تانية وتقبلو مني اجمل تحية وباقة ورد واتمنى اني اكون ما دوشتكم

[alol]

بصراحة يا غرين انتي بتحاولي تغيري طبيعة المراة الخجولة فكيف لها ان تحاول لفت نظر رجل ليس لها

انا رايي طبعا مع الاحترام لامنا خديجة رضي الله عنها بس انا احس على الرجل المبادرة و بعدين البنت تحاول بعدها لفت النظر زي ما بتقولي

و الاختلاف في الراي لا يفسد للود قضية صح؟؟؟؟؟؟؟؟

و مشكورة حبيبتي على الموضوع

[NeMo]

صددددااااااع ابغى سلوبدين


اييه دا يا كابيتانوووو!!!



عيني زغللت



بس ماشاء الله تبارك الله عندك اسلوب سرد يشد الواحد


بوركت


كم حاجة اعلق عليها ازا تسمحولي

خلينا نحط قواعد مسلم بيها

يعني لما حنقول البنت اعجبت بشخص يعني عرفته مرررررة كويس


اسمو نسبو عيلتو وضعو الاقتصادي النفسي الاجتماعي الاكاديمي كل شي


فاعجابها انبنى على هادي الاشياء

وزي ماكلنا عارفين(خلينا نكون واقعيين) الاشياءدي كلها او قولوا اهم مافيها صعب جدا صعب يتعرف عن طريق نت او غيرو

فالدائرة هنا حتضيق شوية

حتنحصر في مين؟؟؟


اقارب الدرجة الاولى او الثانية وممكن تكون حتى الثالثة


طالما في احتكاك مباشر بشكل او اخر مع عيلة الشاب دا(اخواته الام الخالات العمات الجدات.....)

وممكن تكون في الصحوبية


زي مثلا اصحاب الاخوان او اصحاب الرجال في العيلة عموما


هنا في نوع من المعرفة غير المباشرة ابدا


لما يتكلموا عنه كتير قدامها لومثلا الامهات صحبات لو... لو.... وحطوا الاحتمالات الكثيرة والقنوات الشرعية اللي ممكن البنت تعجب فيها بشاب معين وتحاول تعرف اخبارو وتتقصى عنو


فالنت واللي زي كدا فيها risk كبير حتى في الغرب بيحذروا منها


فخلينا نقول انو السؤال اللي حتطرحو الفتاة لواحد معروف للعائلة بشكل او بآخر




وانا مازلت عند رأيي انو ممكن اعملها بس متى؟؟؟؟ هنا التكة


شكرا لاريحيتكم ونفسكم الطويل معانا



يلا اللي ماردوا بسررررررعة يلا باقي كتيييير

[ليدر أستوديو هبقات]

مو الكل يا نيمو

والله فيه بنات كلمه تودي وكلمه تجيب

وممكن من الشكل أو أي شي بسيط

خلاص تتجن

لكن هذا حال الدنيا

والناس أجناس

[NeMo]

الا معاك انا يا ليدر مو الكل

بس برضو مش ممكن توصل لدرجة احبك وابغى اتزوجك!!!


ممكن توصل طيب مو مشكلة بس حتعتمد هنا عالولد دا


ان كان ولد حلال وابن ناس حيحاول يفهمها انو لا

وان كان غير كدا يا ليف ولعياذبالله..... مش عاوزة افكر في الاحتمالات اللهم احفظنا وبنات المسلمين