شرحي للفصل الاول والثاني محاسبة ادارية

[طــبــعــي خــجــولــه]

بسم الله الرحمن الرحيم ..
بقدم لكم شرح للفصلين الاول والثاني من مادة المحاسبة الادارية وهو اجتهاد شخصي حسب حضوري لمحاضرات السنترا لاستاذه تغريد ومحاضرات خارجيه لتثبيت المعلومه وزيادة الفهم ..
نبدأ على بركة الله ..
الفصل الاول يتكلم عن المحاسبة الادارية ومفهومها..
ندخل ع المطلوب
1- مفهوم المحاسبه :
• هو نظام موجه للادارة
• تعتبر فرع من فروع المحاسبه
• لاتتبع اعراف وقواعد معينة في عملها
• هي امتداد لمحاسبة التكاليف
وجهات النظر حول المحاسبة الاداريه: ( قراءه )
2- اهمية المعلومات المحاسبيه:
نظام المعلومات المحاسبي هو المصدر الرئيسي , المحاسبة الماليه والاقتصاديه هما من اجزاء النظام المحاسبي
3- الجودة المطلوبه في المعلومات المحاسبيه: ( مهم )
حتى تحقق الفائدة المرجوه يجب ان تكون المعلومات عاليه الجودة ولها معاييرهي:
• الملائمة
• القياس الكمي
• القابليه لتحقق
• التحرر من التحيز
• التوقيت
• الوضوح
• الايجاز
استخدام الادارة للمعلومات المحاسبيه ( قراءه )
دور المحاسب في العمليات المحاسبية ( قراءه )
مقارنة بين المحاسبة الادارية والمحاسبه الماليه ( مهم )
الجدول في الملزمة راجعي صفحة 4 سلايد 9 +10

الفصل الثاني
التكلفه : هي تضحية ذات قيمة اقتصاديه للحصول على سلعه او خدمة في الحاضر والمستقبل
(بمعني آخر هي المبالغ اللي اصرفها عشان انتج سلعه اوخدمه ويكون المبلغ شامل كل شيء سويته على المنتج )
موضوع التكلفه : هو الشيء المراد قياس تكلفته , يعني الشيء اللي ابغى احسب تكلفته سواء كان منتج او مشروع او برنامج ...الخ أي شيء شركتي تشتغل فيه حسب المنتج اللي انتجه اسميه قياس التكلفه
التكلفه اقدر اقيسها بطريقتين : التجميع وتعيين التكلفه
1- التجميع : هويحصر مجموع التكاليف اللي صرفتها على المنتج وبعدين يصنفها على انواع ( العماله – الكهرباء – الوقود – الصيانه ..)
2- تعيين التكلفه : لها طريقتين
• تتبع : تكاليف مباشرة
• تخصيص : تكاليف غير مباشره
التكلفه والمصروف ..
التكلفه : قيمة المواد التي يتم استخدامها او التضحية بها او استهلاكها في سبيل انتاج سلعه او تادية خدمه .
مثال عن التكلفه , مثلا عندي منتج وابغى انتج منه 1000 وحدة والوحدة الواحدة ب100 ريال .. التكلفه حقت الانتاج 100,000 ريال .. ال100,000 ريال هذي هي التكلفه
(( الوحدة هي عباره عن اسم المنتج يعني مثلا مصنعي ينتج سياره اقول انتجت 100 سياره بدل ماقول 100 وحده .. كلمة وحده هي كلمة تعبر عن اسم المنتج بشكل عام ))
المصروف :
هو اصغر من التكلفه .. مثال عليه زي ماقلنا في المثال الاول طلعت لنا التكلفه الاجماليه للمنتج100,000 ريال .. الحين ابغى ابيع منتجي ورحت نزلت بالسوق 800 وحدة من المنتج خذوا بالكم كانت 1000 وحده بس نزلت منها فقط 800 وحده والوحده الواحده تكلفني 100 ريال لما ابيعها , كيف اطلع تكلفة البيع ؟
نضرب 800 وحده في 100 ريال سعر بيعها ..
800 ×100 = 80,000
اذا الجواب هو 80,000 ريال وهو يعتبر مصروف
طيب بما اننا بعنا وربحنا 80,000 ريال من قيمة انتاج المنتج 100,000 ريال .. ايش باقي؟؟
نطرح 100,000 – 80,000 = 20,000 ريال
طيب ال 20,000 ريال وين راحت ..؟؟
بما اننا بعنا 800 وحدة ب100 ريال من 1000 وحدة صنعناها باقي لنا 200 وحدة مابعناها ولا اتصرفنا فيها وهذي ال200 وحدة تكلفتها 20,000 ريال
طيب كيف طلعنا تكلفة ال200 وحده ؟
ضربنا ال200وحده اللي انتجناها في 100 ريال قيمة الوحده الواحده منها
200وحده ×100 ريال = 20,000 ريال
ال20,000 ريال من قيمة انتاج 200 وحده راحت لمخزون المصنع
(اذا نقول ان التكلفه 100,000 ريال هي اكبر من المصروف 80,000 ريال)
...


نجي لاقسام التكلفه :
تنقسم التكلفه الى قسمين:
1- تكلفة مستنفدة :
• هي تكلفة البضاعه المباعه اللي هي 80,000 ريال وهي تظهر كمصروف في قائمة الدخل آخر السنة
2- التكلفه الغير مستنفدة :
• هي المخزون اللي قلنا عليه 20,000 ريال . وهي باقي بالمخازن وتظهر كأصل في الميزانية او قائمة المركز المال خذوابالكم ماتظهر في قائمة الدخل لاننا باقي مابعناها .
قياس التكلفه :
عشان اقيس أي دخل او نشاط لازم استخدم وحدة تكلفه وهي أي شيء داخل المنشأة اقدر اقيس منوا لتكلفه , عادة ماتكون وحدة القياس هي وحدة المنتج مثلا ساعه سياره ملابس حسب طبيعه النشاط اللي تمارسه المنشاة .
اهداف قياس التكاليف ( محذوف )
تصنيف التكلفه :
يعني لو عندي منتج كلف 100,000 ريال بعه الحبه ب 100 ريال وابغى اصّنف ال 100,000 ريال ايش نسوي .؟
الاول تصنيف نوعي:
يعني اطلب منك تصنفين لي ال 100,000 ريال على حسب المواد حبه حبه , يعني المواد الخام كم كلفت والاجور والعماله و الاعباء الاضافيه كلها كم كلفت , نصنفها حسب طبيعة العنصر اللي دخل في انتاج
الثاني تصنيف وظيفي :
يعني ال100,000 ريال قد ايش فيها تكاليف الانتاج - تكاليف البيع والتسويق - والتكاليف الادارية التمويليه


الثالث تصنيف التكلفه حسب امكانية التتبع :
عندي مصنع ينتج خطين انتاج مثلا المنتج الاول هو ثوب والمنتج الثاني فستان
• تكاليف مباشره :
مثلا طلبت مادة خام وهي القماش من المخزن عشان انتج فيه السلعه الاولى الثوب وكانت تكلفة المادة الخام 20,000 ريال طالعه من المخزن ورايحه للمصنع عند منتج محدد وهو الثوب , هنا نقول عنها تكاليف مباشره ليش ؟ عشان قدرنا نتتبعها من يوم ماخرجت من المخزن الى ان وصلت الى خط انتاج السلعه الاولى الثوب ..
بالمختصر طالما قدرنا ننتبع المبلغ الخارج من المخزن وراح للمنتج المحدد بذاته يعتبر من التكاليف لمباشره لاننا عرفنا من وين خرج الملبغ ولفين وصل .
• تكاليف غير مباشره :
لو طلبت مادة خام من المخرن مثلا القماش بتكلفه 20,000 ريال خارجة من المخزن ورايحة للمصنع من دون مايتم ربطها بمنتج معين يعني ماحددنا وين راح تروح المادة الخام للسلعه الاولى ولا الثاني ؟؟ للثوب ولا للفستان .. هنا ماقدرنا نتتبعها فتعتبر تكاليف غير مباشره
[i]الرابع تصنيف التكلفه حسب امكانية التغير: ( مهم )
[/i]• التكاليف المتغيرة
مثلا عندي منتج معين وبتتبعه وبيكلفني مواد خام الوحدة الواحده بتاخذ 5 ريال للمادة الخام لو انتجت وحدتين من المنتج كم راح يكلفني .؟
احنا قلنا الوحده تكلفني 5ريال طيب لو كان وحدتين راح يكلفني 10 لاننا جمعنا 5ريال+5ريال = 10 ريال
معناه التكاليف المتغيره نصيب الوحدة الواحده منها ثااااابت اللي هو 5 ريال مهما زودنا في انتاجنا ماراح تتغير , بينما راح تتغير في اجمالها يعني لو انتجت وحده اتحمل 5ريال ولو انتجت وحدتين اتحمل 10 ريال ولو انتجت ثلاثة وحدات اتحمل 15 ريال وهكذا راح يزيد الاجمالي لكن تكلفة الوحده هي 5 ريال ماتتغير ثابته .
نقول كلما زاد حجم النشاط زاد اجمالي التكاليف المتغيره ( علاقة طرديه )
اذا نقول التكلفه المتغيره ثابته بينما اجمالي التكاليف متغيره
• التكاليف الثابته
تظل ثابته بغض النظر عن التغيرات , مثلا عندي مصنع سيارات ومستأجرة المصنع ب 500,000 ريال هذي التكلفه تعتبر ثابته لاتتغير ليش ؟ لاننا ندفعها بأستمرار بغض النظر عن المصنع سواء كان ينتج منتجات او كان واقف ماينتج راح يدفع في كلتا الحالتين .
مثلا لو حجم النشاط صفر ايش راح تكون التكاليف الثابته ..؟ راح تكون 500,000 قيمة اجار المصنع
طيب مثل اخر لو انتجت 1000 وحدة منتج والتكاليف الثابته زي ماقلنا 500,000 ريال فكم نصيب الوحدة الواحد من التكاليف الثابته .؟
نقسم 500,000 ريال على 1000 وحدة كم يصبح نصيب الوحدة الواحد ؟؟
500,000 ريال ÷ 1000 وحدة = 2.5 ريال
ولو زدنا من الوحده وانتجنا 2000 وحده
500,000 ÷ 2000 = 1,5 ريال
نصيب الوحدة من التكلفة الثابته بيتغير كيف؟ بينقص لكما زدنا من الوحدة الانتاجيه
احنا عندنا 1000 وحده قسمناها على 500,000 طلع لنا 2,5
وزدنا من كمية انتاجنا من 1000 وحدة الى 2000 وحدة وش صار ؟
صارت التكلفة الثابته تتغير كلما زدنا من عدد الوحدات المنتجه ( علاقة عكسية )




• التكاليف المختلطة :
تحتوي على ثابت ومتغير
الثابت مثل الاشتراك الشهري للكهرباء والهاتف لانه اشتراك لايتغير ثابت
المتغير مثل تكلفة فاتورة الكهرباء والهاتف مثلا الشهر هذا كان مبلغ كبير والشهر الماضي كان تكلفته اقل
اذا هي عباره عن التكاليف التي تحتوي على شقيق احدهما متغير والاخر ثابت
مثلا عندي خط انتاج والالات اسوي لها صيانه حتى لو كانت متوقفه عن العمل عدد الالات 10 اسوي لها صاينه في حالة التوقف بتكلفه 20,000 ريال في السنة , رغم انا لاتعمل , اما لو كانت تعمل وسويت لها صيانه فتكلفتها ستكون اكبر لاننا نعمل الصيانه للالات وهي قيد العمل , تكلفتها 30,000 ريال . وهي عبارة عن تكاليف مختلطة ,
مثال اخر , لو عندي ماكينة استأجرتها ب 25,000 ريال في السنه بالاضافه الى 3 ريال لكل ساعه طول العام , الجزء الثابت هو ال25,000 ريال اما الجزء المتغير هو 3 ريال لكل ساعه كل مازادو عدد الساعات كل مازادت ال3 ريال
[b]خامسا تصنيف التكلفه تبعا لتوقيت التحميل على الايرادات :
[/b]• تكاليف الانتاج :وهي تكلفة صنع المنتج , هذي التكلفه غير نهائية , مثلا تكلفة المصنع 450,000 ريال صرفتها على الانتاج داخل المصنع وهذي التكلفه غير نهائية لان باقي تكاليف اخرى نحسبها معاها ..
توضحها اكثر .. السلعه ولتكن مثلا سياره انتجتها في المصنع وانتهيت منها كلفني صنعها 450,000 ريال لحد الان انا انتهيت من تكاليف انتاج سلعتي بس هذي تعتبر تكلفه غير نهائية صحيح انتهينا من تصنيع المنتج بس باقي علينا تكاليف اخرى راح نصرفها على المنتج اللي هي في التكاليف الزمنية
• التكاليف الزمنية :
هي مجموع تكاليف البيع والتسويق وتكاليف الادارية والتمويليه بحيث تعطينا في النهاية التكاليف الزمنية
مثلا تكاليف البيع والتسويق كلفتني 50,000 ريال ايش نسوي فيهم ,؟ نضيفهم مع تكاليف الانتاج تصير 450,000 + 50,000 = 500,000 ريال ونجمع معاهم التكاليف الاداريه والتمويليه وكمان التكاليف الغير مباشره زي الكهرباء والماء وايجار المصنع والآلات وتكلفة الاعباء الاضافيه

سادسا تصنيف التكلفه تبعا لوقت حدوثها :
• تكاليف تاريخيه :
عباره عن مثلا منتج أ نزلته بالسوق وهي التكلفه الي انصرفت عليه في الماضي

• الاحلال والاستبدال:
عبارة عن تكلفة مثلا عندي ماكينة قديمه ابغى اغيرها ايش اسوي ؟ احّل امكاينه (الاصل) القديمه واستبدلها بأخرى جديده
مثلا بعت الماكينة القديمة ب 10,000 ريال ونتيجة للتظورات التكنولوجيه لقيت ماكينه جديده سعرها 100,000 ريال , يصير اشتري الماكينه الجديده ب 90,000 ريال كيف؟؟ اخذت المبلغ 10,000 حق بيع الماكينه القديمه واضفت لها 90,000 ريال فأصبحت 10,000 + 90,000 = 100,000 ريال
• التكاليف المستقبليه :
هي تعتبر تكلفة تقديريه , تكلفة منتج للفتره القادمه للمستقبل
[b]سابعا تصنيف التكلفه تبع للعلاقة بالفتره :
[/b]• تكاليف ايرادية :
مثلا انا عندي شركة بها 10 سيارات تشتغل فيها ولكل سياره اسوي لها صيانه وزيوت وبانزين ..الخ .. هذي التكاليف حقت الصيانه والبنزين .. صرفت علي في السنه 10,000 ريال للسياره الواحده ولو جمعنا التكلفه لكل السيارات
10,000 × 10 = 100,000 ريال وهي قيمة صيانه وتغيير زيت وبانزين لجميع السيارات في السنة الوحده
وهي مبالغ يتم صرفها خلال الفتره على ان تستخدمها الفتره الحاليه فقط وليس للفتره المستقبليه , يعني ماقدر احط بنزين مره وحده طول السنة لازم كل مرة اعبي واعبي .
وتعتبر تكاليف خلال الفتره الحالية واستفيد منها حاليا فقط .
• التكاليف الرأسماليه :
مثلا عندي 10 سيارات شاريتهم من 5 سنين ومشكلتها بدأت محركاتها بالتهالك فرحت انا واشتريت محركات جديده بتكلفه 20,000 ريال للسيارة الواحده لو جمعنا المبلغ يطلع لنا
20,000 × 10 = 200.000 ريال

هل تعتبر هذي التكاليف ايراديه ولا رأسماليه ؟؟
نقول رأسماليه ليش ؟؟ لاني اشتريت محركات جديده للسياره ويترتب عليها زيادة في الطاقة الانتاجيه للسيارات وزادت من العمر الافتراضي الاصلي لها بدل ماكانت راح تتهالك حاليا زدت من قدرتها وصارت تقدر تتحمل ل 5 سنين قدام
ولهذا تعتبر تكاليف رأسماليه وهي التي يتم انفاقها حاليا ولكن استطيع الاستفادة منها في الفترات الاخرى المستقبليه القادمة .


باقي جزئية معادله الخط المسقيم ماكملتها بس لاني تعبت وانا اكتب ان شاء الله الصبح اكملها ..
هذا ما عندي فإن أحسنت فمن الله، وإن أسأت أو أخطأت فمن نفسي والشيطان
اذا افدتكم لاتنسون تدعون لي ..
الله يوفقني ويوفقكم ويسهل علينا كل صعب

[طــبــعــي خــجــولــه]

رفع......