تعاإأآلو نتعلمـ إنجليزي

[~Me~]

بسم الله الرحمن الرحيم

السلام عليكم ورحمة الله وبركاته





كاإأآبوسٌ يراإأآودني < لحد يسألني إيش يعني يراودني


الـــلـــغـــة الإنـــجـــلـــيـــزيـــة !! English Language


دراستك + وظيفتك + حياتك اليوميه ( مطعم - شركه - مطار < هذي مالكم شغل فيها للناس الكاش زيي ) + يمكن حتى إدا جيت تخطب يقولولك عندك لغه


طبعاً في مقطع ادري رجيتكم فيه فكل مكان حاطو بس عاجبني ياخي ( احلا شي لما تقول : إنتي بس لو تصبرين شوي انا اغرد بالإنجليزي ) وهو يعني يعبر على الحاله إلي انا وكثير فيها




جبتلكم مقطع جديد عشان لا تقولو كاني ماني

دا مقطع وكثير يسوو كدا إدا جو عند مطعم < طبعاً انا مو منهم





ودا كمان (احلى شي لما يقول : لا فيومي )




طبعاً الهدف من المقاطع وكدا إثارة الحماس و التشجيع للموضوع وكدا يعني





الموضوع دا مسوينو عشان شي واحد ... نتعلم إنجليزي


في موضوع في منتدى القبول بجامعة الملك عبدالعزيز اسمو مقهى اللغه الانجليزيه بس صراحه كل واحد كاتبلي 10 سطور انقلش ومسوي الي فاهم اللغه والعالم صارت تستعرض ومدري ايش يعني مو مكان خصب أبداً لتعلم اللغه << كيف كلمة خصب بس


طيب عشان لا يصير دا الموضوع زي هداك لازم تعرفو هنا إيش حتسوو

حتجيب جمله او فقره تكتبها او تفشخها من النت او او او على راحتك يعني المهم عندنا نحن إنو نستفيد


طيب مو حتكتبها كدا وسلام عليكم ( دا الخطأ إلي صار هناكـ )

لا نحن نبغاك تترجملنا الكلمات الي كتبتها و تشرح كل القواعد المكتوبه وليش كتبت كدا وليش وليش يعني فصلنا تفصيل كامل عشان نفهم ونعرف

او تجبلنا كلمات ومرادفاتها او كلمات ومضاداتها وزي كدا يعني ابغى الموضوع دا مراجعه لكل اللغه الانجليزيه عشان نفتكر كل شي

او جيب مثلاً سؤال وجاوب عليه وقلنا ليش اخترت دا الجواب

حوريكم مثال

-------------------------------------------------

they ( are not going - not are going ) home

home يعني منزل

go يعني يذهب


الجمله الي فوق بدأت بـ they ومعناها ( هُم )

ودايماً they و we و you تاخد are

والإختيارين فوق عندنا بـ are إلين دحين ماشيين كويس

وطبعاً السر في كلمة not الي هيا نفي

مرهـ جايبها قبل كلمة are ومره بعدها

الصح هوا انو not دايماً تجي بعد are

يعني حنختار


they ( are not going - not are going ) home

الجمله كامله معناها هم لن يذهبو إلى المنزل

they are not going home

---------------------------------------------------

قد ما كان الي كتبتوهـ تافه أشرحوه

طبعاً اكتبو الي ريحكم القواعد والجمل الي تبغوها اهم شي اشرحوها

حتى لو القاعده انشرحت قبل كدا ولا شي عايدي مو مشكله اكتبو واشرحو تاني نعتبرها مراجعه وتثبيت للمعلومه اكتر

اتمنى تكونو فهمتو ... الخلاصه اكتب اي شي تبغاه المهم انجليزي ومشروح ومترجم عشان الشعب يفهم ويتعلم

ومو لازم تستنى احد يكتب عشان تكتب كل ما كان فراسك شي اكتب هنا نزل كل شي وقت ما حبيت وفضيت تعال نورنا وفيدنا حتى لو ردودك كلها ورا بعض


ابغى دا الموضوع وقت ما جيت اذاكر انقلش اجي هنا يكون مرجع ليا اوكي حبايبي

بالتوفيق للجميع

ما ابغى اقول لونت وتعبت ومدري ايش عشان في ناس اتهموني اني اقلدهم هما عارفين نفسهم

وإدا أحد كتب شي خطأ صححولو يا شباب عشان الكل يستفيد



يلا انطلققققققققو