حد بيفهم في حكايه الساعات المسجله والمحوله والمطلوبه يفيدني الله يخليكم

[جيجي21]

انا اللي اعرفه انو لازم 128 ساعه صح ؟؟؟؟

طيب انا اللي فهمته من هنا ان انا درست الي الان عندهم 105 ساعات

وهما عادلولي 26 ساعه

وده غير ان اصلا انا عندي مواد ده الترم - احصا و تدريب وحلقه بحث وفونولوجي وماده حره يعني كمان 15 ساعه

كده المجموع 146 كيف ؟؟؟؟؟؟؟؟






انا رحت الجامعه واخدت ورقه نموذج طلب التخرج وفيها ان اعبي كام ساعه خلصت وكام ساعه باقي وكم ساعه اتعادل وكده بعدين رحت اطلب برنت للخطه عشان اعرف بضبط لقيت الاستاذه عندها مشكله في الطابعه ومش نفع وقالتلي اجي الاسبوع الجاي ---- ودحين انا رحت اودس اشوف بنفسي بس لما شفت في اودس حاسه في شي غلط


حد يفيدني بلييز

[مروره]

عزيزتي ..
الساعات المسجلة هي مجموع عدد الساعات اللي سجلتيها في كل ترم بغض النظر عن نجاحك فيها أو تعثرك ..
الساعات المجتازة هي مجموع عدد الساعات اللي تجاوزتيها ونجحتي فيها..
الساعات المحولة هي مجموع الساعات التي تم دراستها في جامعة أخرى وتم معادلتها لك ..
ما أعلمه أنه لابد أن تكملي عدد الساعات المطلوبه منك 128 (كساعات مجتازة)والمواد المتبقية في الخطة الدراسية ليتسنى لك التخرج ..



موفقة بإذن الله ..

[nour al3mr]

حيـآك أختي

حولتي من تخصص لآخر ؟

[جيجي21]

لا حولت من كليه ينبع الجامعيه لهنا وهو نفس التخصص انجليزي لكن لاني كنت في الكليه الجامعيه اللي بالهيئه الملكيه اول دفعه لهم وكانت لسه مفتوحه جديده هناك فلما جيت هنا واجهت صعوبه ان يعادلولي المواد- كان مايعرفوها يقولها ايش هدي هههههه مع انها والله احلي من جامعه عبد العزيز ولولا اني اجوزت ماكنت سبتها مافي هناك مدرسين عرب وكل موادنا انجليزي - المهم فجامعه عبد العزيز يقولو انها غير معتمده وبعدين شافو نظامها غير حتي ضاع عليا ترم زياده لحد ما يضبطو اموري مع انهم يعادلولي المواد -- وفي الاخير عادلولي بس دول مواد الانجليزي فقط وكورس دين وبس واما الباقي ولا عادلوه ولا شي ولا كااني درسته مارضيو بيقولو نظامها غير وموادها غير ولانها انجليزي علمي مو ادبي يعني المواد العامه كانت فيزياء كيمياء رياضيات احياء وماده اسمها صحه بتتكلم عن امراض وكده ونعرف كل مرض واعراضه وعلاجاته وكلها بالانجليزي مافي شي ابدا بالعربي الا الدين واساسا كمان دي ماكانت تقبل الا البنات اللي واخدين ممتاز بالثانويه او جيد جدا مرتفع وانا كنت ممتاز في الثانوي علمي 95 في الميه - فمافي اي شي فاد ان يخلصو اجراءاتي بسرعه - الصيفيه وترم كامل عشان يضبطو اموري ويعادلولي

يعني تخيلي سنتين دراسه في كليه ينبع الجامعيه وبس دي المواد اللي اتعادلت
وكان هناك مافي شي اسمه حذف واضافه لازم مشي تمام علي الخطه 6 مواد في الترم ولا 7 مااتذكر وكنت طبعا باخد كله :(

قلبتي عليا المواجع والله - عارفه والله سعات بندم اني اجوزت يلا نصيب مافي احد بياخد غير نصيبه في الدنيا - بس مافي شي بيزعلني غير اني هناك كنت مبسوطه اكتر ومستفيده اكتر وفوق هددا كله كنت باخد كله a او a+ وكمان اتكرمت هناك وكنت اعلى نسبه في القسم -- وطبعا ماكان ينفع اصير انتساب عندهم لان مافي عندهم انتساب لازم انتظام لانها صعبه

واما هنا في عبد العزيز لا :( ماادري ايش حصلي مع انها لا تقارن بصعوبه هناك اللي كل شي انجليزي ومواد علميه كمان انجليزي -- لا وكمان اخدت f في اكتر من ماده :(

وكمان اهو زي ماا انتي شايفه فوق ان نسبتي الي الان تقدير جيد

وفوق هدا كله بقيت 25 سنه ولسه مااتخرجت - واللله خلاص تعبت حتي طموحاتي وكل شي خلاص ماابغي حتي ماجستير ابغي اخلص من البكالريوس هدا اللي مايبغي يخلص وخلاص

خلاص حاسه عمري كله راح في الدراسه :( :(

[white rose]

حياك الله اختي

والله يجزاك الجنة البرنت مهم جداً لمعرفة المواد المتعادلة لك + المواد المُجتازة [ وهيا أهم شيء ] سواء حرة او اجبارية او من مواد القسم والتخصص

ولا تركزي على الاودس لانه دايم مخرف خاصة بحساب الساعات انا وزميلاتي تخرجنا والاودس كان منقص عدد الساعات وحاسبها غلط لان المعيار المهم هو كشف الدرجات الشامل لدرجات الاختبار وتجاوز المواد + البرنت للمواد اللي تجاوزتيها وتعادلت لك غيرها ما يركزو عليه لانهم وقت عمل اجراءات التخصص الموظفة تركز عليهم اكثر من حساب المواد المتبقية بالاودس فتوكلي على الله ولا تقلقي

وبإذن الله اذا ضبطت الطابعة وقدرتي تطبعي البرنت [ كشف بحالة الطالبة ] راح تكملي اجراءات التخرج بشكل طبيعي

الله ييسر لك امرك :-)