][هل تؤيد الذهاب لمدرس خصوصي لمساعدتك لفهم المادة أكثر ؟!][

[CrEaTiVe4ever]

السلام عليكم ورحمة الله وبركاته

كيفكم ؟!

ان شاء الله تمام :) ..

أممممم .. حبيت أستشيركم في موضوع أنو الواحد يروح لمدرس خصوصي يساعدو على الفهم أكثر وانو بإذن الله يحصل معدل عالي .. وبادرت بدا الشيء لعدة أمور ولقول

علي بن أبي طالب -رضي الله عنه-:
«الاستشارة عين الهداية، وقد خاطر من استغنى برأيه، والتدبير قبل العمل يؤمنك من الندم».

مشكلتي:

حاسة نفسي تاااايهة مع مادة الإحصاء رغم إنها جداً سهلة [الاحتمالات] بس ما أدري ليش حاسة انو لازم يكون في أحد يساعدني فيها !!
مع اني أعرف نفسي لو مسكت الكتاب من قلب حجيب درجة من قلب بإذن الله ، ههه

ففكرت اني أكلم مدرسة تفهمني لكن متردد مرررررررررة .. لأن ما أحب أشتت نفسي بين طريقة الدكتورة وبين طريقة المدرسة <<حالتي صعبة جداً

وغير كدا أحس أنو
1- مضيعة وقت .. روحة وجية وخصوصا اننا فجدة تقعد ساعة في المشوار رايح وساعة جاي ...الخ
2- مضيعة فلوس .. ياخدو ع الكتاب من 1000 الى 4000 ريال !!
3- لو أجتهد بنفسي وأحس بتعب المذاكرة حأحس بطعم الدرجات وحيكون هذا أفضل ..
4- ... الخ

فحابة أسمع آرائكم المُنيرة بإذن الله ..

مُــــــــــوفقين

في أمان الله

[asooom]

يا هلااا والله بكرييتيف بخصوص المدرس الخصوصي

أنا ما عمري أخدت مدرس خصوصي في حياتي ,,,, لكن هادي السنه ومع الإحصاء راح أخد وبإذن الله اليوم راح يكون أول كلاس ليه معاه إن شاء الله ,,,

1- مضيعة وقت .. روحة وجية وخصوصا اننا فجدة تقعد ساعة في المشوار رايح وساعة جاي ...الخ الوقت إلي يضيع في المشاوير كدا ولا كدا حيضيع على جلسة التلفزيون واللعب في البيت والكلام دا كلووو فما يعتبر حاجه سلبيه لأنوو في كل الأحوال حنضيع وقت وأنا على فكره كنت أفكر كدا برضوو زيك 2- مضيعة فلوس .. ياخدو ع الكتاب من 1000 الى 4000 ريال !! مافي شي يغلى على إني أجيب درجة حلوه وأرفع معدلي ,, أهم شي الدرجات والمعدل والفلوس وسخ دنياا >>> حضرمي ترى 3- لو أجتهد بنفسي وأحس بتعب المذاكرة حأحس بطعم الدرجات وحيكون هذا أفضل .. إنتي جالسه تجتهدي كدا ولا كداا لمن تروحي عن المدرسه الخصوصيه بتتعبي زي ما قلتي في المشوار وتشدي حيلك وتفهمي وتحلي معاها تمارين وكدا فبرضوو يعتبر دا إجتهاد 4- ... الخ إلخ برضو

أتمنى إني أفدتك أختي والله يكون في عونك

[Th4m3r]

المشاركة الأصلية كتبت بواسطة asooom يا هلااا والله بكرييتيف بخصوص المدرس الخصوصي أنا ما عمري أخدت مدرس خصوصي في حياتي ,,,, لكن هادي السنه ومع الإحصاء راح أخد وبإذن الله اليوم راح يكون أول كلاس ليه معاه إن شاء الله ,,, أتمنى إني أفدتك أختي والله يكون في عونك

طحت من عيني تاخذ مدرس خصوصي ؟

<< ما كأنو حيروح معاه خخخخخخخخخخخخ

و الله شوفي أنا عن نفسي اجرب المدرس اذا اوكيه استمر اذا مو اوكي ما اكمل

[asooom]

طحت من عيني تاخذ مدرس خصوصي ؟ << ما كأنو حيروح معاه خخخخخخخخخخخخ و الله شوفي أنا عن نفسي اجرب المدرس اذا اوكيه استمر اذا مو اوكي ما اكمل

حتكمل ولا وربي تنضررب ترى مرررره متحمس بلااا نذاله

[كتكوتة الحاسبات]

بالنسبة لي أميل لرأيك كثيييييييييير أكره التشتيت
وعلى فكرة أنا ماجربت ولا مرة في حياتي
وانشا الله ماأحتاج وأنتي انشاالله ماتحتاجي
الله يسهلهاعلينا ياااااااارب

[محتاج لها]

خذي مدرسة واجتهدي وراح تحسين بطعم الدرجات أكثر ^_^

[Chocolate Cake <3]

بالعكس روحي عند مدرسه عشان ترفعي درجاتك انا مارحت في التحضيري ودرجاتي كانت على قدي وما كنت ازاكر اصلا
بس هادي السنه لازم ان شاء الله عشان التحويل لاني مابا حاسب ابدا
طيب ممكن ازا عندك ارقام مدرسات كويسات تقوليلي
ابا مررررررره لل"بـــرمجه" مع اني ماقيد شفت مدرسة برمجه
والاحصاء والحوسبه برضو يكون احسن ازا اخدتها مع مدرسه
المواد صعبه احسها اصعب من التحضيري كمان :s
الله يوفقنا كلنا بس

[men]

شوفو ترا اول سميستر في الحاسب كدا تحسس انك مانتي فاهمة ولا حاجه
كلنا كنا كدا عشان المواد جديدة واول مرة ندرس حاجه اسمها برمجه وحوسبة ومن دا الكلام
بس صدقوني شدوو حيلكم وراح تمشو باذن الله اللي يذاكر يحصل:)
وربنا ما يضيعلنا و لا يضيعلكم تعب يارب
بالتوفيق

[Chocolate Cake <3]

آميـــــــــــن يارب يوفقنا كلنا
طيب انا الى الان مني فاهمه ولا شي في البرمجه كيف ممكن تمشي معايا دي الماده
الاستاذه بتشرح وانا بس اطل فيها
ومني عارفه حتى من فين راح ازاكرها ولا كيف ازاكرها :|

[هلالي و بس]

انا غير مؤيد للمدرسين الخصوصيين


اعتقد انه الطالب لو ركز مع مدرس المادة
و ذاكر اول بأول راح يفهم المادة


يعني الطالب تركيزه الذي يضعه مع المدرس الخصوصي

لو وضعه مع مدرس المادة راح يفهم



ليش هل المدرس الخصوصي يفهم و مدرس المادة ما يفهم؟؟؟؟؟؟؟؟؟