"حملة إمسحها واحتسب"

[نجمة سهاري]

السلام عليكم ورحمة الله وبركــــاته

أسعـــد الله صباحكم\ومسائكم وجعلــــ أيـــامكم واوقاتكم عامر بذكــــره

ظــــاهرة إنتشرت بين الفتيات وأستغلها بعض ضعــاف النفوس من الشباب والفتيات

كانت تنوي الاحتفاظ بها من أجل الذكـــرى

وارسلتها لصديقتها لانها تثق بهـــا

ولم تفكــــر بعد ذلكــ بالعـــواقبـــــ...


اترككم مع المشهـــــــد:

سوسن: توتو, وقفي هناك شوي.. بسرعه بسرعه..
تهاني: ليش شسالفة؟؟
سوسن: شوي بس بطق لك هذيك الصورة اللي تاخذ العقل..
تهاني: هااااو.. مايحتاج صور ولا شي, بعدين انا الصور تظلمني دايماً.. وأنا حلوه,
سوسن: أخلصي علي منيب ماكلتس يالمخيسه.. قبل يطلع احد علينا..
تهاني: طيب طيب.. بس وانا لابسه الحجاب..
سوسن: بلا خبال عاد.. شيليه يالللللللللللله..
تهاني: طيب يلاااا..
تششششك <صوت كاميرا جوال..
سوسن: خلاص مشينا يالله..
تهاني: أرتحتي ألحين..؟
سوسن: ايه شوفي شكلك تجننين ههههه ياحبني لك بس..
/
/
هيفاء: هلا وسهلا بالقاطعة شخبارتس يالشينه؟
سوسن: الحمدلله تمام شلونتس أنتي؟
هيفاء: والله بخير, من طوّل الغيبات جاب الغنايم..!
سوسن: هي غنايم وبس؟ شي(ن) بيوسع صدرتس بقوّه..
هيفاء: وش عندتس هاتي..؟
سوسن: تذكرين تهاني اللي معنا فالمحاضرة.. حقت ذيك الدكتورة المملة..
هيفاء: إيه إيه اللي منيب أهضمها.. ياشينها وش جاب طاريها ألحين..
سوسن: جبت لتس صورتها.. بس ياهي صوره تعجبتس..
هيفاء: وريني أشوف..
سوسن: أمسكي الجوال شوفي.. اضغطي تكبير وشوفيها زين..
هيفاء: وين هذا؟؟ شقه ولا وشو؟ يا هي داهية ذالبنت ههههه
سوسن: لا لا هذا فالمول اللي جنبنا.. بس كأنه ديكور شقه هههه
هيفاء: طيب ارسليها الله يعافيتس.. وأنا أوريتس فيها..
سوسن: وش بتسوين بها؟؟
هيفاء: مالتس دخل.. أرسلي وخلي الباقي علي..
سوسن: طيب أفتحي بلوتوثتس.. وش إسمتس فيه؟
هيفاء: إسمي العاشقة الجميلة..
سوسن: طيب أرسلت.. إقبلي..
هيفاء: طيب .. ضغطت موافق..
/
/
مسفر: أبو رشود, وش آخر شي وصلك بلوتوث؟
راشد: أبد ماعندي الا الدجه, كلش قديم..
مسفر: طيب ماعندك مقاطع.. اللي بالي بالك؟
راشد: لا مسحتها آخر مرّه.. قفطني أبوي هههه
مسفر: أجل شكلك ماشفت بنت (الفلان)؟؟
راشد: من هي ذي؟؟ وش سالفتها؟؟
مسفر: هذي طالعه استراحة مدري شقق عيال ومصوّرها خويها..
راشد: هااااو.. تقوله صادز أنت؟
مسفر: إيه والله ياهي موووت بعد.. يقولون أنها ساكنه فالحارة اللي ورانا عاد..
راشد: وش يقال لهم؟؟
مسفر: ابوها ...... وأمها بنت الـ..... عاد والله أعلم من صدز هالحكي..
راشد: طيب ارسل ارسل.. خلني اشوف زين, شاشتك صغيره انت موب واضحه..
مسفر: طيب بس أمانه ما ترسلها لأحد.. لأنها في ذمتك.. وتراها أعراض ناس يعني..
راشد: هههههههه شف من يتكلم بس؟ خلاص منيب مرسل لأحد, بشوفها وبمسحها..
مسفر: أوكي أفتح بلوتوثك..
راشد: يالله أرسل لي.. إسمي الفتى الرومنسي..
مسفر: أرسلت..



/
/
نشوف هالمشاهد تتكرر كثير هالأيام خاصة بإنتشار البلوتوث والإنترنت, وأنه وحده تثق في بنت ثانية لكن لظروف معينة تقلب عليها, أو يضيع الجوال أو ينسرق, أو حتى تبيعه لشخص ذمته واسعه ويرجع الصور اللي فيه وينشر اللي عنده, أو غيرها من الطرق الأخرى.
لكن يتحمل الذنب كل أطراف القصة, بداية من البنت اللي رضت أن صديقتها تصورها, أو حتى هي صوّرت نفسها بالجوال, وإنتهاءاً بـ آخر شخص تصل له هالصورة..


/
مايستفاد:
1- قال الله تعالى: {والَّذين يرمونَ المُحْصناتِ ثمَّ لم يأتوا بأربعةِ شهداءَ فاجلِدُوهم ثمانينَ جلدةً ولا تقْبَلوا لهم شهادةً أبداً وأولئك همُ الفاسقون(4)} سورة النور
2- يقول المثل: من طقّ باب الناس طقوّ بابه.. وإذا كان بيتك من زجاج فلا ترمي الناس بالحجارة.
3- تخيّل أن اللي فالصورة هي أختك - بنت عمتك - خالتك - أمّك - أي وحدة من قريباتك.. قبل ترسلها لأي أحد,, هل سوف ترسلها وتنشرها؟؟ وكثير منّا يعلل نشره لها بأن صاحبة الصورة هي اللي رضت على نفسها كذا, أنت ماتدري لأنه فيه ظروف كثيرة صارت لها وانتشرت الصورة بغير ارادتها.. وتشوهّت صورتها وكرهت نفسها يوم ألتقطت هالصورة.
3- يقول النبي - صلى الله عليه وسلم - ((من ستر مسلماً ستره الله يوم القيامة)),
4- خلوّنا نبدآ حملة مع بعضنا البعض, بعنوان "إمسحها وإحتسب" وأي صورة توصلنا بطريقة مباشرة او غير مباشره سواء عن طريق جوال - ايميل - بلاك بيري - نمسحها ولا نعيد ارسالها, لقول الرسول صلى الله عليه وسلم: (( مَنْ رَأَى مِنْكُمْ مُنْكَرًا فَلْيُغَيِّرْهُ بِيَدِهِ، فَإِنْ لَمْ يَسْتَطِعْ فَبِلِسَانِهِ، فَإِنْ لَمْ يَسْتَطِعْ فَبِقَلْبِهِ، وَذَلِكَ أَضْعَفُ الْإِيمَانِ)).
/
تعليقاتكم..

[6flah]

الله يعافينا ,,

في ناس كذا !!

[نجمة سهاري]

تسلمين طفلة على المرور

الله يهدي الجميــــــع ويصلح حالهم.

[شمعة الجامعة]

وعليكم السلام ورحمة الله وبركاته
ويسعد صباحك يارب
محزن أن يكون ذلك حــال المسلمين
أسـأل الله الهداية والصــلاح للجميع

بارك الله فيك أختي وأحيي فيك حبك للخير ونشر التوعية ..
رعاك الله

[نجمة سهاري]

اللهم اميــــــــــــــن

سررت بمروكـ غاليتي

جزاااكــ الله خيرااا

[sara a7md]

وعليكم السلام ورحمة الله وبركاته
أسـأل الله الهداية لجميع المسلمين
جزاك الله خير