معضلتي مع الرايتنق 2..

[little Angel]

مرحبآ...

اتمنى تكونوا بأتم الصحة والعافية والله يعدي أيام الأختبارات على خير وتنجحوا بأعلى المعدلات..
آمين..
أعزائي الغالين..حبيت أكتب هالموضوع لأن أحس أني بمعضلة مع مادة الرايتنق 2 ماقصدي صعوبتها لا..قصدي المادة هذة شكلها خايفة مني >>>>قوية..
راح أقولكم قصتي معها من الترم اللي فات كنت مستوى 4يعني عندى رايتنق 2....ok
ويوم الأمتحان دخلت مادة elcaبدل الرايتنق وشكيت بالأسئلة وسألت ألأستاذة هل هى رايتنق؟؟
قالت أيووووووة رايتنق...فقلت يمكن حنوا على البنات عشان كذا الأسئلة طريقتها غير...وخلصت وخرجت وصلت للبيت وجيت أشيك على المنتدى الغالي....معايا>>>>>>>>>
لسة ماجات الجزئية المرعبة..
ألا والاقي قروبي العزيز يتكلم عن أشياء غير اللي شفتها.....والله كأن أحد صب علي موية باردة

كيف؟؟؟؟ لا مو معقول أنا حريصة لدرجة الوسوسة كيف أدخل أختبار غلط؟؟؟؟؟
وطلع فعلآ دخلت إختبار غلط....رحت وقدمت عذر وسألتهم متى أختبر البديل قالوا الترم الجاي...طبعا أنا فهمت أنة الترم هذا بأختبر يعنى مابينزلي أختبار بديل لوحدي لا أختبر الترم الجاي مع البنات...وقالوا نبلغكم عن موعدة ..وكل ماماشيك ع الأودس الاقي dnالمفروض قبلوا عذري تتغير وتسير ac أتصلت عليهم مايردوا ونزلت المادة هالترم بالأودس رايتنق .....طيب...أنا حذفتها لأنها أختبار بديل ومكتوب بالأودس انة المادة اللى اختبارها بديل لاتضاف بالجدول فقلت انة خلل بالنظام لأن ايقونة الحذف والاضافة اختفت وضايفين الرايتنق كمان<<<<<<فحذفتها...
المهم حاااولت أتواصل مع الجامعة بأي طريقة مايردوا وأنا مو من جدة ومع ذلك ماتهاونت ونزلت أراجعهم علمآ أني( أم + موظفة + طالبة) ضربتين بالرأس توجع ..كيف ثلاث..
وماأحصل من ينزلني غير أخوي جننتة من كثر مايستأذن من دوامة ...شكلة بينفصل بسبتي
لا من زود النحاسة اليوم اللي أنزل أراجعهم ألاقيهم غايبين ولا بحفلة ومكاتبهم مقفلة...
وأخيرآ صارت لي ظروف مرضية وخليت أختي تراجعهم وبرضة لقيت الأستاذة غااااايبة
وأخذت رقم السكرتيرة الخاص ورقم المكتب وكتبت تقرير عشان نرفعة للأستاذة المسؤولة
وكماااااااااان أتصلت عليها وماترد؟؟؟؟؟؟
يوم الأحد كان أختباري جيت أدخل وقلت للأستاذة أنة أختبار بديل....قالت مافي شئ أسمة بديل ؟
البديل من زمان أختبروة .....قلبي وقف من الفجعة وكلمت جميلة مشطاطي ...وقالت ماحتدخلي الأختبار...والله أنفجرت من القهر ...حسيت العالم وقف...لاإرادي جلست أبكيي....وجميلة تحاول تفهم الموضوع وماقدرت أتكلم...وفهمتها أختي الموضوع وراحت تشوف الأودس وجات قالت تعالي أشوف أذا أسمك موجود تختبري,,,ورحنا ندور وماحصلت أسمي...وقالت حللي المشكلة اللي موجودة بالجدول مع استاذة نوف وفي اختبار الاربعاء لو تعدلت الdnتدخلى الاختبار...جيتهم اليوم الثلاثاء وقابلت الوكيلة سلوى الغالبي.....فهمتها الموضوع وقالت مانقدر ندخلك تختبري لكن أسويلك إستثناء لأن الرايتنق اللعين متطلب لبيقية المواد ..يعني ماأقدر أضيف أي مادة إلا اذا عديت الرايتنق ورحت لأستاذة رندة قالتلي لازم تعدين الرايتنق لأن النظام مايسمح يضيف...يعني أخرتني هالمادة ترم كامل...والله بيكون بيني وبينها ثأر..والله أحس بقهر وكل ماأتذكر اللي صار أجلس أبكي مقهورة ...صرت موسوسة وشكاكة والشئ أتأكد منة 600ألف مرة والله أكثر شئ قاهرني أني فوتت قروب حبيبتى الغالية أم حمدان..وجدولي بيكون للترم الجاي:
ثقافة-كتابة-لغويات-مادة حرة وماأبغي معدلي ينزل ..بالله أيش أسوي..نصايحكم آرائكم تكفوون والله النفسية عدم...

[عبير العسيري]

وربي تعبت من قصتك وما الومك لوكرهتي الماده

وحسبي الله على المسؤلين بالجامعه

لانه المفروض مشكله زي هذي المفروض من البدايه تنحل عن طريق الايميل او المعاملات الالكترونيه

مو سفر وطلعه ونزله وبالاخير ماصار شي

حرام والله

المفروض المنتسبين لهم تعامل خاص وانظمه خاصه تناسب وضعهم

لانهم بعيييييييد

مو على كل شي نسافر لجده

حراااااااااام


الله يكون بعونك ويوفقك يارب

نزلي المواد الحره كلها مع ثقافه ورايتنق وان شاء الله ماينزل معدلك


اسأل الله ان يوفقك ويسهل امورك

[Luminous Star]

سالفتك سالفه تقللللللللللق .

الله يكون بعونك خصوصا انك 3 في 1 مثل ما تقولي

بس حطي في بالك ،، الضربه اللي ما تكسر الظهر تقويه ،،

شدي حيلك والله يكتب لك الفرج والتوفيق وتعدين هالماده على خير

موفقه

[Daisy2]

little Angel

يارب يعوضك خيرا تصدقي ذكرتيني بموقف مشابه لموقفك مع ماده بس هم من الاساس ماقبلوا العذر يعني نتيجة تأخر منعوني من دخول القاعة ,,,,,,,,,,والله حسيت بموقفك خصوصا لمن البنات يخرجوا ونترجى الاستاذات ومافيه مجيب

بس اعرفي انو من عسر على احد ربي راح يعسرها عليه

يارب يكون خيره ,,,,تصدقي انوا الانسان يجهل الحكمه بس الله اعلم واحكم

يارب يفرج كربك ويسهل امرك ويشرح صدرك,,,,,امين يارب العالمين[/I][/I]

[حنين الشوق]

حبيبتي ماتدرين فين الخير بيكون .....صحيح ظاااااهر كلامك مؤلم ومحزن لانك اخرتي ترم كامل عشان الرايتنق بس ماتدرين عن باااااطن مصيبتك....أمكن ربي رايدلك خير ....وأمكن لو أخذتي مواد كثيره مع الرايتنق تحمليهااا وينخسف معدلك وع فكره حطي ببالك انو كثير بنات باالتخصص يحملواا مواد الكورس كامله واحياننا يطلعوا بوحده ناجححين فيهاااا فلو كنت مكانهم وش راح تختارين ؟؟؟ أكيد بتقولي الحمدلله ع كل حااااال
daisy2 وش جابك روحي ذاكري هة هة والاجمعيلك اوراق البوتري خخخخخخ

[little Angel]

[align=center]مشكورين وجزاكم الله كل خير...
والله ياحنين فجعتيني..معقولة يرسبوا بكل المواد...
الحمد لله اللهم أجرني في مصيبتي وأخلف لي خيرآ منها..[/align]

[ام حمدان]

يالله حكايتك حكايه على بالي انتهت معاناتك وتحددلك يوم اختبار بديل

ياربي والله حرام الي يسوونه فينا ليه التعسير هذا كله

الخلاصه يعني ماراح تختبريها هالترم خلاص ولا لسى في امل ؟

عموما لا تتحسري على قروبنا اهم شي تتخرجي بمعدل زين وتتخرجي وانتي استفدتي من دراستك احنا لاحقه علينا وامرنا لسى في علم الغيب الله يخارجنا من هالقسم على خير

انا مستغربه كيف يقولولك انها متطلب لمواد كثير

هي بس تفتح لك ثلاث مواد اول شي الترجمه ومناهج بحث
وبعدها براكتكم 1 و2 فقط

ومناهج بحث مايرضو يخلونا نآخذها الا بعد مانخلص مو بس الرايتنق لا كمان لازم نخلص الادب
عموما هذي مواد ماتاخرك كثير

وعلى الاغلب اكثرنا بيضطر يزيد ترم اذا مو اكثر عشان صعب مواد المستويات المتقدمه نآخذها 6 في ترم واحد
ربي يفرج همك ياقلبي وتنحل مشكلتك عاجلا يارب ليت بيدي شي اسويه بس ماباليد حيله:(

[حنين الشوق]

المشاركة الأصلية كتبت بواسطة little angel [align=center]والله ياحنين فجعتيني..معقولة يرسبوا بكل المواد... الحمد لله اللهم أجرني في مصيبتي وأخلف لي خيرآ منها..[/align]

لا تنفجعي عيشي وشوفي بتخصصنا القميل هة هة بجد مرت علي مواقف حمل الطالبات للكورس كامل واحياننا تطلع الطالبه بماده او مادتين ناجحه فيهاا فكل ماعليك انك تنظري للاقل منك عشان تخف مصيبتك بالتوفيق

[nour al3mr]

لا حول ولا قــــوة إلا بالله ..~

الله يكتب لك الخير ويصرف عنك كل شــــــر ..

موادك للترم القـآدم جيدة و لله الحمد ..

ويعوضك ربي خير ..

فكل أمـر خلفه حكمة لصالحنــــــــــآ .. قد نراهــــــا شر محض لكنها في الواقع خيرٌ بحت ..

أعانك الله و جبر لك كل كســــــر و أثلج صدرك بمـا يرضيه ..

[little Angel]

للأسف مافي أمل نهائيآ...حأضطر آخذها الترم الجاي..
والله يابنات كلامكم أثلج صدري ..ونساني الهم اللي أنا فيه..ياقلبي ياأم حمدان والله أدري لو بيدك شئ ماتأخرت..والله أشتقت لكم..
الله يوفقكم وينور دربكم..على فكرة مانسيتكم من دعائي وكل من أسهم بالمساعدة ولو بحرف..الله لايحرمكم الأجر..