يا فاتنه

[الى من يهمها امري]

السلام عليكم ورحمة الله

قصيدة طازة من وقتها


حبيبتي ترى الليالي لها احكام
والله على احكام الليالي يعيني


وقت الرخا دهره كما عدة ايام
ووقت القسا يومه يعادل سنيني


تعبت اعسف النفس واجر الاقدام
واضحك وقلبي من همومه طعيني


وتعبت من طرد الهقاوي والاحلام
سراب ما تروي عروق ظميني


انا عشقتك دون تصوير وارقام
بيحت لك سدي وخافي كنيني


لا سامع صوتك ولا شايف لثام
ولا يدينك لامستها يديني


محبة ما هي من الناس تنسام
حب من اقصى خافقي يحتويني


لكنك لغيري على عقد والزام
وهو على اللي في يدينه ظنيني


يا فاتنه بعدك كما حكم الاعدام
لكنه المكتوب بينك وبيني


يا فاتنه والوصل مقطوع مادام
اذا ذكرتيني بخير اذكريني

وابذكرك مع الهبايب والانسام
وابذكرك ما دامت الروح فيني

وسلامتكم