ابغا نصيحتكم ...!!!( ما خاب من اسشار)

[امري]

السلام عليكم

انا ودي ادخل كلية الهندسة

ولكن ما اعرف افضل التخصصات ؟ واوسطها >> يعني قسم له مستقبل
و مو ودراسة حلو ( مو صعبه حييل ).؟




انتظر نصايحكم>

[Naser]

هلا أخوي أمري
حيالك الله أول معنا في المنتدى
وان شاء الله الاخوان يفيدونك بالنسبة لافضل التخصصات .
لكن حبيت ابين لك نقطة مهمه وهي : لازم تعرف رغبتك أنت لأي تخصص تميل
لا تدخل للتخصص وانتا مو راغب فيه علشان لا يقل مستواك مع مرور السنوات الدراسية
نصيحه وحبيت ابينها لك

تحياتي
ادمن

[العاشق الساهر]

وعليكم السلام ورحمة الله وبركاته
هلا وغلا أخوي أمري <<< زميل الكليه
بخصوص التخصص مثل ما قال لك أدمن روح للتخصص اللي تشوف نفسك فيه
واللي تميل له أكثر
أما أفضل تخصصات الهندسه عندك الكهربائيه او الصناعيه
لكن يبقى الخيار الاول والاخير لميولك
ولعلمك عزيزي مافي شي بالهندسه سهل
تحتاج لجهد وتركيز بالدرجه الاولى

وأي مساعده باذن الله نخدمك


سلامي

[خالد]

هلاً ومرحبا أخوي

وأنا أخوك وزميل في نفس الكلية تخصص هندسة مدنية

أذا كنت تسئل عن أكثر التخصصات مطلوبة في ديوان الموضيفين وبالتوضيف بشكل عام
1- كهربائية
وتخصصاتها هي ( اتصالات , طاقة , الكترونيات , حاسب , وتخصص دقيق هندسة طبية )
اللي ماشي سوقها اتصالات وطاقة
وتقدر تروح تسئل بالخدمة المدنية

2- هندسة مدنية
هي مرتبة في التوضيف
ومجالات العمل فيها كثير

أهم شي من حقك تروح تسئل المشرف الأكادمي لكل قسم تشوف لك رغبة بأنك تدخلة
والأكثر أهمية أنك تكون تحب القسم
أهم شي لاتفكر أبداً بدخول النووية

وأذا بتسئل عن تخصص أنا أعرفة فحياك أخوي
أهم شي يكون تخصص ذو مستقبل

تحياتي

[إعصار المعلومات]

السلام عليكم ورحمة الله وبركاته
بالنسبه لموضوع التخصصات اولا يعتمد على المعدل في اول سنه . فإذا تبغى تريح راسك وتخش التخصص اللي نفسك فيه شد حيلك في اول سنه بالذات وجب معدل مسكت . ثاني شي من ناحية المستقبل ما احد يعلم الغيب لاكن اهم شي تخش التخصص اللي ترغبه انت . يعني مثلا اذا كنت تحب الكهرباء وعندك قدره على التخيل والتعامل مع اشياء غير محسوسه ( شحنات . ومجال مغناطيسي . ومجال كهربائي . الخ ) . خش كهرباء ( يبغى لك معدل جامد طبعا ) . اذا كنت تحب الرسم ( الرسم الهندسي طبعا ) وما تبغى تتعب راسك في التخيل وتصير تتعامل مع اشياء واضحه قدامك ( تروس . وزنبركات . وكتل . وغيره ) خش ميكانيكيه. والمدنيه تقريبا قريبه منها في طبيعة الاشياء اللي تتعامل معها ( كباري . انفاق . عماير ) . اذا كانت لغتك الانجليزيه جامده وعندك قدره على الحفظ خش صناعيه . اما بالنسبه للصعوبه ما تقدر تحكم . يعني هي راجعه لطبيعة الشخص . يعني انا مثلا تخصصي كهربائيه واشوف ان الميكانيكه اصعب من الكهربائيه لاني ما اطيق شي اسمه رسم هندسي . لاكن في زملاء لي في الميكانيكه لو تقتلهم ما يخشون كهربائيه ويقولون ما نطيق شي فيه تخيل نبغى شي محسوس قدامنا . فهذا شي راجع لرغبتك وميولك . اهم شي في نضري لمن يجي الطالب يتخصص انه يعرف امكانياته بالضبط وما يضحك على نفسه ويختار تخصص ماهو قده عشان يقولوا والله فلان دافور . لانه اكيد راح يتعب ويمكن يقعد بها سبع او ثمان سنوات في الهندسه واخرتها يتخرج بمعدل طايح . واخيرا لا تفكر انك بترتاح في كلية الهندسه . الكلية جامده ويبغى لها دراسه جامده بالذات في الفتره الاخيره ( بعد اعتمادها من لجنة ابت ) يعني اذا مافيك حيل للدراسه شف لك كليه ثانيه اسهل . واهم المواد في كلية الهندسه كلها وفي جميع التخصصات الرياضيات والانجليزي . يعني اذا كنت ضعيف في وحده من الثنتين هذي معناها راح تتعب في الهندسه في اي تخصص كان . اتمنى اكون افدتك وتحياااااااااااتي لكم .

[امري]

يعطيكم العافية شباب

ومشكورين على نصايحكم




وهذا الموضوع يبغالو تفكير




ومشكووووووووورين مرة ثانية