خبر هام وأكيد ومن تجربة : (شهادة الانتساب معتمدة في التعليم العالي ) ..

ام دنيا · #1 19-08-2010, 08:18 PM

السلام عليكم ورحمه الله وبركاته
كيفكم يااعضاء منتدى جامعه الملك عبد العزيز
الصراحه مره وحشني المنتدى من يوم مااستلمت الوثيقه مادخلتو
اليوم بقول موضوع مهم بالنسبه لي واكيد لكم كمان
نبدأ
طبعا انا سجلت في الجامعه انتساب وماحالف لي الحظ اني احول انتظام
وكل مااقرا موضوع عن شهاده الانتساب انو مو معترف فيها اتحطم وافكر اني اسحب من الجامعه
ومااكمل لكن الحمد لله كانت عندي اراده وامل وكنت اقول لنفسي مو معقول نتعب وندفع فلوس على الفاضي وان شاء الله ربي ماراح يضيع تعبي والحمد لله اتخرجت الترم اللي فات
واستلمت الوثيقه وصادف انو انفتح برنامج الابتعاث الخارجي للمرحله السادسه
قلت لازم اجرب حظي واقدم واشوف يقبلوني ولا لا
وقدمت من خلال موقع الوزاره واعطوني رقم الطلب
وكانت المفاجاه انو ارسلو لي رساله بالموافقه المبدئيه وماصدقت وجهزت اوراقي للتدقيق
بس كنت مره خايفه لو شافو شهادتي مكتوب فيها انتساب حيرجعوني
ورحت لمقر التدقيق بفندق المرديان امس الاربعاء وانا مره متوتره
وجلست قدام المدققه وهي تطالع في شهادتي وتكلم اللي جنبها بصوت مااسمعه
وتقول لها كيف يعني ؟؟ طبعا انا قلت اكيد ماراح يقبلوني
الا وشويه سألت بصوت عالي تقول لها انتساب عادي نقبلها ؟؟
طبعا انا قلبي وقف واستنى الاجابه
وسمعتها تقول ( طبعا اكيدد )
وفرحت فرحه كبيره وحسيت بشئ مايتوصف واخذو اوراقي وحطوها في ملف وقالو انتي الان مستوفيه كل شروط الابتعاث وانتظري الى شهر شوال لنعلن اسماءكم رسمي في الجرائد
طبعا انا كتبت الموضوع الطويل هذا كله عشان شئ واحد
وهو انكم تدرسو وتكملو الجامعه ولااحد يحطم من عزيمتكم لان شهاده الانتساب معترف بها من قبل وزاره التعليم العالي
وتقدرو تكملو الماجستير ان شاء الله ببلاش على حساب الملك عبد الله حفظه الله لنا
وتاخذون احسن الشهادات ( لغه وماجستير ومن دول برا وبشهاده قويه بالانتظام )
وارجو تثبيت الموضوع عشان الكل يستفيد ويكون عنده طموح بدل المواضيع اللي دايما
نقراها بالمنتدى عن شهاده الانتساب
وانا الان افتخر اني تخرجت من جامعه الملك عبد العزيز منتسبه والحمد لله ربي وقف معايا
لاني بجد كنت اتعب واجتهد
( ان الله لايضيع عمل عامل منكم )
فانا قلت لازم ابشركم وسامحوني لاني ماني عارفه كيف اصيغ لكم الكلام
وماابغى منكم غير دعوه صادقه من القلب
اختكم ( ام دنيا )

ZAID1122 · 19-08-2010, 08:23 PM

الله يوفقك

جديد بقراطيسي11 · 19-08-2010, 08:27 PM

اللله يوووفقك ياام دينــــا

989898 · 19-08-2010, 08:53 PM

الله يجزاك خير ام دنيا ومامن دابة في الارض الا على الله رزقها اسأل الله العظيم في الشهر المبارك الكريم انه يرزقني ويرزقك ويرزق كل مسلم الرزق الطيب الحلال الميسر ويعطينا من خير الدنيا والاخرة ولايأخذنا بذنوبنا انه الولي والقادر على كل شي الرحمن الرحيم وصلي اللهم وسلم على نبي الله محمد واله وصحبة اجمعين

فتى الأحلام · 19-08-2010, 09:05 PM

الله يوفقك يارب ...
انا مثلك قدمت على الماجستير بس ما مشت اموري بسبب فارق شهر على العمر المطلوب ..
شروطهم في العمر تعجيزية ...

المهم الله يسعدك ويحقق لك كل طموحاتك ...
دمتي بود ..