إختبار القدرات للجامعيين محوسب . #تجربتي.

[Brhom-tabuk]

السلام عليكم و رحمة الله و بركاته ..
صبحكم الله بالخير / مساكم الله بالخير 😊

هذي مشاركتي الأولى في المنتدى الجميل هذا و في الحقيقه مشاركتي الأولى في المنتديات من 8 سنين انقطاع
و حبيت أشارككم تجربتي في أختبار القدرات للجامعيين المحوسب ..و اللي بفضل الله و بحمده جبت 83 و هي تعتبر درجة حلوه بالنسبه لشخص مثلي آخر علاقه له كانت بالرياضيات و تشغيل المخ في الثانوي !! دونت جدج 😁😂
ما أطول عليكم ..
كانت مذاكرتي و استعدادي قبل الاختبار بخمس ايام و كل يوم معدل 6 ساعات مذاكره ..
- اللي فادني كتاب فهد البابطين لقدرات الجامعيين و سعره 100 - 65 = ؟؟ ريال >> أنتم حلوها 😂
- كتاب القدرات العامه لفهد البابطين > مشابه للقدرات الجامعيين و لكن جت أمثله كثيره منه ..
- قناة اليوتيوب " المعاصر في القدرات والتحصيلي " هذه القناة أستفدت منها كثير ..

يوم الأختبار كان ممتاز أنا أول الواصلين .. خذ معك بطاقة الهويه ..تدخل على موظف الإستقبال تعطيه بطاقة الهويه يعطيك نموذج و فيه إقرار و كلام تعبيه ..بعد ما تسلمه النموذج يبصمك 10 مرات لكف يدك يمين و يسار و يصورك " الصوره تخوف أكثر من حقة الأحوال "😂 ..و يقولك حط أغراضك كلها بدرج الأمانات نظام خزنه ..طبعا كل أغراضك الشخصيه ( جوال ، محفظه ، ساعه ، نظاره ، قلم ، فاين ،..) بعدين تدخل على قاعة الإختبار و قبل القاعه في نقطة تفتيش و تبصيم كمان ..و هذا الأخير يعطيك قلم و "شخبوطه" تحل فيها المسائل الرياضيه ..ويقولك تفضل و بالتوفيق ..أيه صح و يعطيك ماء أبو نص ريال و منديل اذا و أنصحك كثر من المنديل لانه متعب تمسيح الكراسه اللي تشخبط عليها ..و باسم الله و أبدا الاختبار .

- الجزء الكمي :
_تدرب على حل الكسور و تبسيطها " أسئلة قارن أغلبها كسور.
_الأسس و الجذور .
_النسبه و التناسب " مثل عدد طلاب 60 طالب و طالبه نجح منهم 5:6 أوجد عدد الراسبين " طبعا نص السؤال مش فاكره بالضبط ..بس هذي " 6:5 " تعلم كيف تستخدمها في الحل ..
- الوسط الحسابي .
- هذي بعد يجي منها " 1 ، 5 ، 9 .... " و يبغا تكملة الأعداد .
- يجيب لك مليون مربع و معين و مثلث و يقولك عد كم عددها ..
- المثلث و أعرف أنواعه و زواياه و محيطه و مساحته و كذلك الأشكال الأخرى " موضوع قدام وجهك قوانين الأشكال الهندسيه كلها .
- يجيب لك في سؤال أربعة أشكال و يقولك ماهو الشكل اللي يكملها ..

الإختبار سهل و يبغاله تركيز و أهم شيء تكون مرتاح و شبعان نوم ..لا تسوي مثلي و تروح مواصل و سهران " مخك يفصل و يكلج عند سؤال بسيط و تافه وتضيع عليه وقت "

- بالنسبه للجزء اللفظي أنا دخلت عالبركه و ما أستعديت له صح . تجيك قطع كثيره و تستنتج منها الاجابات .
-الرسم البياني جاء منه أربعة أسئلة .
- التضاد و الترادف بين الكلمات .
-العلاقه الدلاليه بين الكلمات و أحيانا يجيبها في القطع .
..ملاحظه : أنا ما أعلم عن سياسة المنتدى في طرح مثل هالمواضيع و هل إخباركم بالأسئلة اللي جتني ممنوع أم لا ..

أعتذر على الموضوع و طريقة الشرح بس هذا اللي قدرت عليه .. و أي إستفسار أنا حاضر و بالخدمه 24/7 ..و بالتوفيق إن شاء الله للجميع ..و السلام عليكم و رحمة الله ♡