احداث قبل وبعد الأختبارات , اكتبوها لنا ..

[الفتى]

السلام عليكم

ضاق صدري من قبل الاختبارات وجلست لي شهرين مغير أدربي راسي ما بين الشعر والنقد الادبي

والمودرن و شكسبير والفكشن والشعر والدراما .. ذاك اليوم دخلت مكتب خدمات يخلص اوراق جوازات وغيره

وانا اللي اشوف ذاك المصري يشتغل بالمحل يرطن انجليزي مع دكتور هندي , بصراحة المصري

عجيب اول مره اشوف مصري مطبق للأكسنت الأمريكي صح لأنهم بالعادة " زيس إيز "

وتشبك براسي فكرة سؤال المصري عن الأدب الانجليزي , وانا اللي اتوكل على الله واجلس قدامه

واضبط كشختي و اترزز وارسم ذيك الإبتسامه علشان يحس بروح المحبه والأخوه فيما بيننا

قلت صباح الفوول قصدي الخير .. قال اهلن إززيك , قلت له ما شألله الأنجليزي معك ينقط عسل

عاد المصري وسمع مدح جلس ساعة يشرح لي قصة حياته وكيف طور من نفسه وكيف كافح

ووصل للمرحلة اللي شدت انتباهي له وأنا ما غير فاق خشتي عنده وانا بيني وبين نفسي اقول

لو فيه معاهد زي الناس بديرتنا كان ما جيتك بس يالله خل نجامل ونشوف وش وراه

قال انا اساسا معايا ماجستير لغة انجليزية , انا بصراحة خقيت معه وقلت وجدت ضالتي

قلت جابك الله أنا بصراحة عندي اختبار بعد شهرين لمواد كلها تخص الأدب الأنجليزي وبصراحة

تعبت ماني عارف وشلون ابداء , قال ولا يهمك أنا موقود لااااا دي حاقه سهله خالص انتا بس مكبر

الموضوع حبتين شويا ما تحولش تصعب الأمور في نفوخك وتخليها تركيبة مفاعل نووي لاااااا

دي اسهل لغة في العالم , بصراحة كلامه فرحني وخلاني انظر للانجليزي على انه تافه ولا شي

قلت طيب وش رايك اجيب الكتب ونجلس انا وانت و نحاول نفهم الوضع ؟ قال خلاص عدي عليا

بعد سعتين انا ساكن فوء المكتب , قلت طيب كثر الله خيرك ..

و أنا انقز للبيت واشوف امي جالسه بالصاله وانا ابوس راسه , قلت ابشرك لقيت مدرس انجليزي فلته اسمه فرغلي

قالت الله يفتح طاقت الرزق بوجهك يا وليدي وين ما وجهت , اهم شي حط الله بين عيونك ..

والله وانا اخذ الملخصات والكتب واروح له يوم انه شاف الكتب والملخصات تغير وجه المصري

قلت هاه يا استاز وش رايك ؟ قال لاااا دي مواضيع بتختلف عن اللي احنا درسناها خاااااالص

قلت اكيد بتختلف انتم منهجكم مصري وحنا سعودي فيه فرق بس اعتقد التخصص واحد كله انجليزي

قال لا بووص حكاية الأدب دي حاقه بتاعت الدكتور اللي بيدي المادة يعني انتا لازم تعرف هوا عايز ايه

قلت طيب انت ما تقدر تفيدني بشي ؟ قال واللهي انا ممكن اترجم لك المواد .. قلت لا كثر الله خيرك

اذا على الترجمة سهله , لكن غيره ما تقدر تسوي شي ؟ قال لو عايز قرامر انا حاضر .

قلت لاااا قرامر سهله ان شألله . وانا اللي يضيق صدري ويتكدر خاطري ولا ادري وين اروح

ام حمدان ونور العمر ما يقصرن والله لو طلبناهن شي بس تستحي يا الواحد انك تطلبهن شي وانت

شواربك طول وعرض وش تقول ماني فاهم شي اكيد بيبتلشون فيك وعندهم زملاء غيرك .

الموووووهم رجعت للبيت وانا القى أمي بالحوش جالسه قالت بشر وشلون فرغلي عساه نفعك

قلت ابشرك نفعني يمه وان شأالله عملية الشد اللي انا واعدك فيها اذا تخرجت اسويها لك بفرنسا

اخلي ابوي اذا شافك يتعب نفسيا تطمني يمه ان شألله بتخرج بس انتي ادعي لي ..

بديت اجمع ملخصات مناك ومناك واتصل على حمد خويي بالجوف وشوي شوي جمعنا معلومات

عن المواد وذاكرناها وجاء وقت الأختبارات , طلبت من البنك إجازة رفض البنك وعلل الرفض

بوجود زحمة بالفرع والبنك ينظر لإنجاز العمل أهم من اي شي آخر , اضطريت اروح وارجع بالطيارة

من حائل الى جدة 12 مرة حسبي الله ونعم الوكيل فيهم . اول يوم كان عندي اختبار الشعر يوم الخميس

الساعة 8 صباحا وصلت من المطار للشقة الساعة 1 بعد منتصف الليل قلت خلاص يا ولد ذاكر لك كم

كلمة تنفعك قبل الاختبار يوم اني صليت الفجر رجعت اذاكر وانا متمدد على السرير ماصحيت الا لما

حسيت بشي دخل اذني واقوم مفزوع الا الساعة عشر ونص والشي اللي دخل اذني سعبولتي

على طول دق جوالي إلا هذي أمي تقول هاه بشر وشلون اختبارك ؟ قلت ابشرك يمه 100%

اكيد إنتي داعيه لي اليوم صح ؟ قالت مادعيت لك اكثر من اليوم .. قلت ياحبي لك يا يمه عسى الله مايحرمني

منك ولا من دعائك يا رب .. شوفي يمه مع عملية الشد نفسي اضبط اشياء كثيره فيك مثلا فيه عمليات

تحديد خصر خل ابوي يتعب من قلب وش رايك انتي بس ؟

بس الحمدلله الدكتور باقبص ماقصر والله اعاد الأختبار لي وساعدني الله يشفيه ..

واخيرا ضهرت النتائج والحمدالله من اصل 6 مواد أدبية حملت مادة وحدة وربك ييسرها لنا الترم القادم

ونتخرج على خير ..



محبكم في الله / الفتى