الى الان لم تضاف عشره بالميه ماستر اداه عامه

[نورة الحربي]

أستنوووووووني لا تخلوني

أحسبو واحد (6 ) مكثر الشطة

ع حد علمي أنها 10% اللي باقيه مو 6 >> ترا أنا بكالوريوس ادارة عامة


.
.
. شالسالفة ؟؟؟
وش قصة الستة

أقولكم العلم فيه إن

أخونا طارق بالله فك شفرة دافنشي ذي بالجامعه

[T@RIQ]

طيب بالنسبة لعمادة الدراسات العليا ،، قالوا ال 10٪ موضوعه لمعيار قرب التخصص ،، لكن زي ما احنا متوقعين قالوا مالنا اي علاقه فيها راجع الكليه.

وبالنسبه للكليه الموضوع عند رئيس القسم ،،، يقولون انه هو الي إن شاء الله يقدر يجاوب على هذي الاسئلة.

لكن هو غير متواجد الآن ، وممكن يجي الساعه 11 إن شاء الله.
المهم انا بتابعهم إن شاء الله الين نلاقي جواب لأسئلتنا.

مراسلكم من قلب الحدث اخوكم طارق الحربي ههههه ،، الله يصبرنا بس.

[Hunno]

وانا بعد 6
يلا هانت شويات ومراسلنا الكريم يخبرنا بسر التطقيم 😁

[لمعة الألماسة]

اصلا ياطارق شي متوقع ماراح تلقى منهم جواب كل مسؤول يرمي على الثاني

على فكرة رحت المعهد ورجعت وانت في قلب الحدث

[T@RIQ]

اعتذر عن الإجابه عن ما حصل لي في كليتنا الموقره في الوقت الحاضر.
منعا عن قول كلمات لا تليق بهذا المنتدى. لكن لي عوده بإذن الله لإخبركم بما حدث.

من الأعصاب نسيت موقف السياره ، وجالس ادورها بكل مكان. والحمد لله إن النتائج لسه ماطلعت، وبسبب إنها ما طلعت مسكت اعصابي عليهم.

المهم اخواتي إن شاء الله يكون قسمكم النسائي افضل من قسمنا، اما اخواني الشباب الله يعوضنا خير إن شاء الله.

وتذكروا جميعا قوله تعالى (إِنْ يَنْصُرْكُمُ اللَّهُ فَلَا غَالِبَ لَكُمْ )
بس نصيحه لحد يسأل عن سبب نقص العشره.

إن شاء الله بعد الصلاة إذا هديت اعصابي حكيتكم.

[الفـرس]

انا سألت وكل قسم الطالبات مع عندهم جواب ويقولوا شوفي قسم الطلاب الي وصلته ان المسؤل هو قسم الادارة العامة يعني السبب عند رئيس القسم وطبعا لا حياة لمن تنادي
ارجوا من الدكتور عماد الحسن والدكتورة شواطئ البحر بالتوضيح على اسئلتنا التي هي سبب لانشاء هاذا المنتدى

[T@RIQ]

المشاركة الأصلية كتبت بواسطة لمعة الألماسة اصلا ياطارق شي متوقع ماراح تلقى منهم جواب كل مسؤول يرمي على الثاني على فكرة رحت المعهد ورجعت وانت في قلب الحدث

لا صدقيني اذا الواحد اصر ووصل للشخص المطلوب سهل يلقى جواب. وهذا الي حصل معايه.
لكن المشكلة اش هو الجواب الي الواحد يسمعه.

الحمد لله على سلامتكِ،، والله يعين إن شاء الله.

المشاركة الأصلية كتبت بواسطة الفـرس انا سألت وكل قسم الطالبات مع عندهم جواب ويقولوا شوفي قسم الطلاب الي وصلته ان المسؤل هو قسم الادارة العامة يعني السبب عند رئيس القسم وطبعا لا حياة لمن تنادي ارجوا من الدكتور عماد الحسن والدكتورة شواطئ البحر بالتوضيح على اسئلتنا التي هي سبب لانشاء هاذا المنتدى

نعم الجواب عند رئيس القسم ،، بس الله لا يوريك رئيس القسم قولي آمين ،، اقسم بالله يحمد ربه اني ما حشرته بركن وطلعت حرتي فيه، وزي ماقلتلكم كويس إن النتائج ما طلعت والواحد مسك اعصابه على امل إنه إن شاء الله يجيه قبول.

وعماد الحسن وشواطئ البحر والنعم فيهم ما يقصرون معانا بس بعض الاسئلة ما يقدرون يجاوبون عليها.

بعد الصلاة إن شاء الله اعطيكم التفاصيل.

[Hunno]

خلصت الصلاه
يلا ناطرين،،، روق وهات السالفه😌

[مجهووله]

نستناك وش صار

[T@RIQ]

بسم الله الرحمن الرحيم

طيب انا حقولكم على الي صار معايه وكل واحد يحكم عقله، وماراح ادخل بالنوايا لإن العالم فيها الله وحده.

طيب جيته الصباح قالولي ما يداوم ذحين يداوم 11 ، قلت حاضر ننتظره الين مايجي إن شاء الله.

المهم جاء انتظرته الين ما يخلص الي بيده ، قلتله يادكتور اش معيار العشره الي انتوا حاطينها ، قلي مو مهم ترى كلهم 5 الي بناخذهم ، انصدمت قلتله 5 بس قال خمسه ، انا الي فهمته كأنه يقولي لا تتعب نفسك والله أعلم.

قلتله طيب المهم المعيار هذا مبني على ايش الـ 10 اش اساسها ، جمدني وقام يمشي وانا امشي وراه بألاسياب وانا جالس أسأله، المهم دخل مكتب دكتور ولطعني بره وقفل الباب حول نص ساعه.

انتظرته الين ما خرج قلتله يادكتور اش معيار العشره ،، قلي انا مشغول ، قلتله جاوبني سؤال واحد وجلست امشي معاه مكان ما يروح،، قال العشره هذي عليها كل شي عليها اشياء كثيره ، قلتله طيب زي ايه مثلا يعني ، قلي خبره دورات شهادات تخصص، قلتله ترى يادكتور احنا برنامج عام وهذا الكلام مو من ضمن الشروط مكتوب معيار تخصص فقط، عصب ونط بوجهي وقال لا كيف المتقدمين كثر لازم نفاضل بينهم ودخل دورة المياه اكرمكم الله وانا واقفله على الباب، قلتله طيب اعطيتوني 6 ليه ناقص اربعه ، قلي طيب كويس 6 اش تبغى احسن من كذا ما يدري اني اعرف انهم معطينا كلنا 6 ، قلتله طيب ماشاء الله تبارك الله الخبره الإداريه 7 سنوات وكل الطلبات الي قلت عليها موجوده عندي وزياده بفضل الله ليه 6 ، قلي كللللللللللها عندك سبحاااااااان الله بتريقه، هنا انا تنرفزت خلاص وقلت امشي ياولد قبل ماتسوي شي تندم عليه.

هذا الي حصل معي ونقلته لكم يمكن أكون ناسي بعض الكلمات بسبب المطاردة وتناقض كلامه لكن بالمجمل نقلتلكم كل شي زي ما سمعته وفهمته، وكل واحد يحكم عقله وأكيد راح يفهم.

انا اقول إن شاء الله انه يكون ملخبط بين انواع الماجستير عام وتنفيذي وخدمات صحيه لإنها كلها عنده، وإن شاء الله يكون قسم البنات افضل من قسمنا.

لكن بالمجمل العام نصيحه من أخوكم توفيق الله فوق كل شيء ، وإذا الله أراد لكم إنكم تنقبلون محد يقدر يمنعكم، بس نصيحه الي ما ينقبل لعاد يقدم على إدارة عامه الين ما تختفي الأشكال هذي، او ما يكون لهم ايه نسبه يتحكمون فيها.

والسلام عليكم ورحمة الله وبركاته