تجمع المتقدمين لماجستير ادارة اعمال (البرنامج العام الاكاديمي ) لعام 1434 - 1435

[عاقل]

الزملاء والزميلات ... الكرام

السلام عليكم ورحمة الله وبركاته .. وكل عام وأنتم جميعاً بخير.

أتقدم إليكم جميعاً بخالص التهنئة بمناسبة القبول في برنامج الماجستير لإدارة الأعمال ، وأسأل الله تعالى أن يرزقنا إتمام هذه الرسالة بكل إحسان وإتقان.

يقول الله تعالى : ۞ إِنَّا لا نُضِيعُ أَجْرَ مَنْ [أَحْسَنَ] عَمَلاً ۞


واسمحوا لي أن أتقدم بإسمكم جميعاً حاملاً أصدق معاني الشكر والتقدير للأخت الفاضلة الزميلة/

رحلة احساس

على ما قدمته لنا في هذه الصفحة من مشاركات هامة وموجزة ، فلها منا جزيل الشكر ومن الله عظيم [الأجر].
وقد أوردتُ جميع مشاراكاتها وردودها فيما يلي :

المشاركة الأصلية كتبت بواسطة رحلة احساس السلام عليكم ورحمة الله وبركاته أنا حتخرج هذا العام بإذن الله ماجستير إدارة أعمال خلصت المواد وباقي لي مناقشة الرسالة الحمدلله كثيرا على تمام النعمة حعطيكم نبذة مختصرة عن ماجستير إدارة الأعمال ---------------------------------------------------- الماجستير سنتين (4 أترام): الترم الأول 4 مواد الترم الثاني 3 مواد الترم الثالث 4 مواد الترم الرابع 3 مواد ( واحد منها هو المشروع البحثي ) طبعا هذا حسب الخطة .. وفيه ناس يمددوا الماجستير على 3 سنين ملاحظة: أغلب الطالبات المتفرغات عندنا يمشوا على خطة السنتين، أما الموظفات والمتزوجات ياخذوا تقريبا 3 مواد بالفصل الدراسي، وبالتالي يخلصوا الماجستير في 3 سنين نظام الماجستير في أغلب المواد عبارة عن: اختبار نصفي + اختبار نهائي + مشروع أو بحث + واجبات إضافية ( ممكن تكون عرض بوربوينت لأحد الفصول بالكتاب، أو كتابة تقرير ... الخ) والمذاكرة تكون من الكتاب أو الشرايح، على حسب دكتورة المادة يمكن مادتين فقط في الماجستير كله اللي ما كانت فيها اختبارات لغة الدراسة في بعض المواد عربية وفي البعض الآخر إنجليزي، على حسب الدكتورة برضو وإن كانوا الآن بعد الاعتماد الأكاديمي بيطالبوهم يتحولوا للغة الإنجليزية، لكن لازالت فيه مواد كثير بناخذها بالعربي هذا رابط المواد: http://business-administration.kau.e...g=ar&cid=36259 كل فصل دراسي بينزل تقريبا مادتين اختياري، وأحيانا مادة أما المواد الأساسية فتنزل مرة وحدة كل سنة، يعني الترم الأول من كل سنة أو الترم الثاني من كل سنة، وهنا أحب أنبه على نقطة مهمة: إذا المادة الأساسية بتنزل مثلا الترم الأول من كل سنة، وما أخذتيها الترم الأول، فراح تضطري تنتظري الين الترم الأول من السنة الجديدة حتى تاخذيها، فانتبهوا لهذي النقطة لأنه بعضهم ما ياخذوا المادة على أمل تنزل الفصل الجاي مع دكتورة ثانية، وهي نزلت هذا الفصل فماراح تنزل الفصل اللي بعده، وبالتالي تتورط الطالبة إذا بتتخرج خلاص عالفصل الثاني، وتزيد المشكلة تعقيدا إذا كانت المادة متطلب لمادة بعدها، عاد شوفوا وقتها متى حتتخرج : ) غالبا مواعيد المواد بتكون: من 9 إلى 12 أو 12 إلى 3 أو 10 إلى 1 أو 1 إلى 4 فإذا أخذت الطالبة أقصى حد اللي هو 4 مواد، حيكون عندها يوم إجازة وأحيانا يحطوا مادتين في نفس اليوم، مثلا وحدة من 9 إلى 12 والثانية من 12 إلى 3، وبالتالي تداوم الطالبة 3 أيام بالأسبوع بعض الدكاترة ياخذوا الثلاث ساعات كاملة للمحاضرة والبعض الآخر يعطينا بعد نص الوقت عشرة دقايق استراحة ويرجع يكمل بعدها والبعض ياخذ أول ساعتين وربع تقريبا من المحاضرة وبعدين يخرّجنا رئيسة قسم ماجستير إدارة الأعمال: د.وفاء اليافي رئيس قسم ماجستير إدراة الأعمال: د.عبدالله با سهل مشرفة الحذف والإضافة: د.أمل تركستاني ما أدري إذا حيكون فيه أي تغيير عالعام الجديد 1434 - 1435 ، فأحسن اتأكدوا من الأسماء بنفسكم أوقات الحذف والإضافة تكون معلنة في موقع الجامعة، بعمادة الدراسات العليا نقدر نحذف ونضيف من الأودس بلس (باستثناء اللي عندهم مواد تكميلية على ما أظن)، أو نروح عند د.أمل تركستاني نعبي عندها ورقة الحذف والإضافة وهي توقعها، وبعدين ناخذ الورقة ونروح لدكتورة أنيسة تركستاني أو لعمادة الدراسات العليا بمبنى 3 الدور الأول، وهم يضيفوا لنا المواد عالأودس بالنسبة للمشروع البحثي فالطالب يتواصل مع المشرف اللي يبغاه بشرط يكون تخصص المشرف هو نفس تخصص موضوع الرسالة وفي بداية فصل التخرج يطلبوا منا نعبي ورقة عند مشرفة الحذف والإضافة، كل وحدة تكتب موضوع بحثها، واسم المشرف اللي اتفقت معاه وغالبا يشرف الدكتور على رسالة واحدة خلال الفصل، يعني ما ينفع اثنين يطلبوا نفس المشرف في بداية الفصل الدراسي لكن ممكن مثلا واحد ياخذ المشرف هذا الفصل، والثاني ياخذه الفصل اللي بعده، حتى لو الطالب الأول ما خلص الرسالة في الفصل الأول وأخذها على فصلين ملاحظة: كثير بنات ياخذوا الرسالة على فصلين دراسيين، يعني ينزلّوا المشروع البحثي في الترم الثالث، ويبدؤوا يشتغلوا عليه، وما يناقشوا إلا نهاية الترم الرابع. والبعض ينزّلوا الرسالة في الترم الرابع، لكن يجوا نهاية الترم وهم لسا ما خلصوها، فيكملوا ويناقشوا عالفصل الصيفي أو بداية الترم اللي بعده كل هذي الأمور تعتمد على جدية الطالب، تفرغه، وتعاون المشرف. لذلك استخيروا في اختيار المشرف ولا تعتمدوا على كلام الطلاب أو الطالبات، اتوكلوا على الله واسألوه يختار لكم اللي فيه الخير أقللكم هذا الكلام من واقع شفته الفصل هذا والفصل الماضي، أحيانا الطالبة تعتمد على كلام صحبتها إنه هذي المشرفة كويسة، بس سبحان الله في الفصل الدراسي هذا بالذات تكون مشغولة وعندها أعباء تدريسية وما تفضى تتابع بحث الطالبة، فترسللها البنت الفصل الأول من الرسالة وهي ماعندها وقت تراجعه، وتكون الفصول الباقية من الرسالة معتمدة عالفصل الأول مثلا، ولازم المشرفة توافق عليه، فتتأخر جدا الطالبة ويتعطل مشروع بحثها بسبب المشرفة ! وأحيانا يكون المشرف جدا متساهل وما يتابع الطالب وكل شي يقلله عليه كويس، ويجي الطالب يتورط في المناقشة ! وطبعا فيه مشرفين رائعين وما عليهم كلام فما شفت مثل الاستخارة والاعتماد على الله، سبحان الله أنا مشرف رسالتي ما كان عالبال ولا عالخاطر، يعني كنت حاطة في بالي أسماء مشرفين معينين، وما كنت أعرف هذا الدكتور، بس جلست أستخير وأدعي ثم شاء الله بعد أحداث يطول ذكرها إنه يكون هو مشرفي، والحمدلله كانت شخصيته متوافقة مع ظروفي تماما، ومشيت أموري على خير، الحمدلله كثيرا نسأل الله أن يرزقنا كمال التوكل عليه وحسن الظن به هذي معلومات إجمالية إن شاء الله تنفعكم .. الله يوفقكم يارب جميعا ونفرح بتخرجكم قريب : )

المشاركة الأصلية كتبت بواسطة رحلة احساس آمين وإياك الله يسلمك زمان كان تقدري تختاري إما رسالة أو مشروع بحثي بس الآن بعد الاعتماد الأكاديمي صار نظام الدراسة واحد فقط: مشروع بحثي، يعني المواد كثير على قولتك بالنسبة للمواد الاختيارية فما عندك خيارات كثيرة فيها لأنه في الفصل الواحد يفتحوا مادة أو اثنين حعطيك نبذة مختصرة عن (بعض) الدكاترة اللي درسوني المواد الأساسية وأسلوبهم في التدريس وراح أحاول أكون حيادية في الطرح، يعني أذكر حقائق فقط بدون ذم أو مدح مناهج البحث والتحليل الكمي هذي المادة مهمة مهمة جدا في الماجستير كله، تفهمك كيف تسوي أي بحث، وبالذات المشروع البحثي كانت كل مرة تنزل مع أحد، بس أنا أخذتها مع د.خالد الشعيبي بصراحة علمنا صح كيف نسوي بحث كامل، وايش الأخطاء الشائعة في البحوث، وكيف نكتب الفرضيات والاستبيان والأهداف والأهمية وايش الفرق بينهم حتى إنه كثير مننا لما جينا لآخر ترم نطبق المشروع البحثي، رجعنا لأوراقه والكتاب اللي كان يشرح منه بالنسبة لأسلوب الدكتور فهو يحب التفاعل في المحاضرة، يعني يضرب مثال بعنوان بحث ويجلس يسأل: ايش الفرضيات؟ أما توزيع الدرجات فمني حافظة لأنه أخذت المادة بأول ترم، بس أتذكر كان مطلوب من كل مجموعة تختار موضوع وتسوي عليه خطة بحث، وكان فيه اختبار نهائي وبالاختبار النهائي جاب لنا مثال لبحث واحنا نكتب عليه الأهمية والأهداف والفرضيات ووو ...الخ بالإضافة لكم سؤال ثاني استغرقنا تقريبا الوقت كامل ( ساعتين ) لأنه لازم تعصري مخك في ساعتين فقط وتكتبي خطة بحث إدارة العمليات الإستراتيجية تعطيها أ.د.أسماء باهرمز معروفة المادة بكثرة شغلها، لكن كلمة حق تنقال: تستفيدي من الكرف : ) يعني رحنا لما يقارب 3 مصانع مع الدكتورة، بعضها بس كدا زيارة نستفيد منها ونتناقش فيها، وبعضها نكتب عنها تقرير من صفحة أو اثنين، غير المصنع اللي تختاريه لمشروعك انت ومجموعتك وتروحوه وتكتبوا تقرير كامل عنه وورد وبعدين تعملوا عليه عرض بالإضافة إلى إنه كل مجموعة تختار فصل من الكتاب وتشرحه بالنسبة لاختباراتها ففيه بنهاية كل فصل بالكتاب أسئلة يكون عنوانها critical questions كانت تجيب منها، مع اختيار من متعدد الإدارة الإستراتيجية المتقدمة أعطتنا هي د.وفاء اليافي بالنسبة لأسلوب د.وفاء فهو ثابت في كل المواد: تحضري مؤتمر أو لقاء علمي أو دورة وتكتبي عنه تقرير في صفحتين + مشروع يعتمد على طبيعة المادة، مثلا في ادارة استراتيجية كانت تعطي كل مجموعة حالة دراسية وهي تكتب خطتها الاستراتيجية، يعني الرؤية والأهداف وتحليل سوات ... الخ + زيارة لمكتبة مثلا أو مكان وتكتبي تقرير عن هذه الزيارة برضو في صفحتين + اختبار دوري ونهائي والأسئلة مقالية، يمكن 5 فقرات فقط صح وخطأ، وبعدين سؤال من 10 فقرات تقريبا عددي تعددي اثنين من كل شيء مع شرح بسيط مثلا: عددي مزايا التوجه الاستراتيجي؟ مطلوب فقط تحفظي اثنين وتكتبيهم، وتشرحيهم شرح مبسط فلما كنا نذاكر كانت التعدادات كثيرة، بس احنا نحفظ اثنين فقط من كل تعداد وآخر سؤال يتكون من عدة فقرات: مقارنة، ورسم، وتعليق على خبر منشور في جريدة مثلا الريادة في مجال الأعمال نزلت مرة مع د.عبلة بخاري، ومرة مع د.سيدة مختار أنا أخذتها مع د.سيدة مختار، بريطانية، ما تتكلم عربي أسلوبها في التدريس مختلف عن النمط اللي متعودين عليه، يعني ما عندها كتاب وشرايح تشرح منها كل محاضرة كنا ناخذ نماذج مشاريع قادة ورياديين وكيف بدؤوا وكيف انتهوا، المحاضرة كلها عبارة عن حالات دراسية، نقرا حالة دراسية سوا ونجلس نعلق عليها ونقول آراءنا كمجموعات طبعا فيه بنات يناسبهم هذا الأسلوب، وفيه بنات يحبوا يلتزموا بكتاب ومنهج معين حتى المشروع عبارة عن حالة دراسية نقراها ونجاوب على أسئلتها والاختبار النهائي حالة دراسية برضو، يعني ما تذاكري شي بالنهائي بس بالدوري أعطتنا كم ورقة نذاكر منها وكانت الأسئلة كلها مقالية اقتصاد إداري د. فاروق الخطيب دايما يعطيها، وأحيانا يفتحوا معاها شعبة ثانية لدكتور ثاني لأنه مو بس إدارة أعمال ياخذوها، كمان طالبات محاسبة واقتصاد أظن توزيع الدرجات مع الدكتور فاروق: دوري ونهائي ومشروع وواجبات الواجبات عبارة عن مسائل تحليها في البيت، والمشروع تروحي مصنع (كل وحدة لحالها) وتكتبي عن الوظائف الخمسة له: موارد بشرية وانتاج ...الخ الدكتور قبل الاختبارات يراجع ويعطيك أوراق أسئلة منها 100 صح وخطأ، يجيب نفس الصح والخطأ بس يغير فيها، ولازم تنتبهي للتغييرات لأنه بعضها دقيقة وتقريبا 3 مسائل في كل اختبار، كل مسألة تحليها في صفحة وأفكار المسائل شبيهة جدا باللي يشرحها في المحاضرات نظم المعلومات الإدارية د.اقبال الصالح المادة فيها عرض لأحد فصول الكتاب (مجموعات)، ومشروع، ودوري، ونهائي، ومشاركة بالنسبة للعروض فالدكتورة يهمها الرسومات في عرض البوربوينت، يعني مو دش كلام فقط، ووقفتك ولبسك ونظرات عينك تكون موزعة عالطالبات وانك تعرّفي بنفسك في البداية،، وغيرها طبعا أما المشاريع فناخذ نظام معلومات لأي شركة أو جهة عمل ونشرح عمليتين أو 3 في النظام وأسئلتها بالاختبارات صح وخطأ، واختياري، وفراغات، وعددي، ورسومات وتجيبلك سؤال كامل مصطلحات بالانجليزي وتسألك هذي اختصار لايش، لما حتدرسي المادة حتفهمي أكثر ايش أقصد : )

المشاركة الأصلية كتبت بواسطة رحلة احساس الخطة موجودة عند د.أمل تركستاني مشرفة الحذف والاضافة، ومكتوب فيها بكل ترم ايش تاخذي لكن ححاول أتذكر تقريبا كيف الترتيب (وأفضل تتأكدوا بنفسكم): الترم الأول (4 مواد): مناهج البحث والتحليل الكمي القيادة والسلوك التنظيمي إدارة العمليات الإستراتيجية المحاسبة الإدارية والتكاليف الترم الثاني (3 مواد): نظم المعلومات الإدارية التسويق الإستراتيجي تمويل الشركات الترم الثالث (4 مواد): الاقتصاد الإداري الإدارة الإستراتيجية المتقدمة مادة اختيارية مادة اختيارية الترم الرابع (3 مواد): الريادة في مجال الأعمال المشروع البحثي مادة اختيارية ملاحظة: مرات يبدّلوا بين (محاسبة إدارية وتكاليف) و (اقتصاد إداري)، يعني تصير كل وحدة مكان الثانية

المشاركة الأصلية كتبت بواسطة رحلة احساس واياك إما الشرح بالانجليزي والكتاب أيضا بالانجليزي. وهذا نادر، يكاد يكون مادة أو مادتين في الماجستير كله. أو الشرح بالعربي، والكتاب إما إنجليزي أو عربي وهذا الغالب. يعتمد على الدكتور أو الدكتورة اللي تعطي المادة .

المشاركة الأصلية كتبت بواسطة رحلة احساس أبشري يا غالية أولا ماثقلتِ علي أبدا، أنا حاسة بمشاعركم لأني كنت مكانكم بيوم وأتمنى ألاقي أحد يجاوب على أسئلتي فخذي راحتك واسألي كل اللي ببالك بالنسبة للي طلبتيه فياليت ترسليلي بريدك عالخاص إذا يسمحوا بإرسال البريد أما حكاية الانجليزي فلا تشيلي هم، حتى أنا مستواي متوسط مو محترف وعندنا كم بنت كان مستواهم بالانجليزي جدددا ضعيييف، بس لأنه الشرح بالعربي فتفهمي بسهولة ولو احتجتِ تترجمي كم كلمة في العروض فالموضوع يسير بفضل الله لكن عشان أكون صريحة معاكِ، وحدة مادة فقط هي اللي كانوا البنات الضعيفات بالانجليزي يواجهوا فيها صعوبة شديدة وهي المادة اللي مع الدكتورة البريطانية، لأنه الشرح كله بالانجليزي والآكسنت تبعها بريطاني وسريع حبتين فما كانوا البنات يفهموا، وبنفس الوقت ما تعرف تتكلم عربي فما تقدر تترجم لك لو ما فهمتِ فقط هذي المادة الوحيدة، أما غير كدا فالانجليزي مهو عائق أبدا الحمدلله لأنه الشرح عربي مثل ما ذكرت .

[&R&]

رسلت لك رحلة احساس تسلمي

راتانيا
ماعندي فكرة كم عددنا بالزبط بس اللي اعرفة مايتعدى 20
متى ناويه تروحي الجامعة ؟؟ابغى اقابل احد
احس التخصص هذا تفاعله قليل مااشوف طلاب وطالبات كثير من خلال ماابحث في النت وكذا

[راتانيا]

المشاركة الأصلية كتبت بواسطة &r& رسلت لك رحلة احساس تسلمي راتانيا ماعندي فكرة كم عددنا بالزبط بس اللي اعرفة مايتعدى 20 متى ناويه تروحي الجامعة ؟؟ابغى اقابل احد احس التخصص هذا تفاعله قليل مااشوف طلاب وطالبات كثير من خلال ماابحث في النت وكذا

ما ادري حاليا ممكن السبت :/

ايوا مره انا احس مافي غيرنا راح يدرس يا اما كدا يا اما هما دوافير وعارفين كل حاجه

[هدوٍء~]

الف مبروك للجميع ياليت تردو على استفساري
صديقتي تخرجت هذا الترم من البكالريوس قسم ادارة اعمال ادارة موارد بشريه ومعدلها 4.10 وجابت بقدرات الجامعيين 68 وستيب لسا ماطلعت نتيجتو

ابغا اسألكم كلكم عندكم خبره ؟ وكيف تحسب صديقتي معدلها التركمي والا النسبه والا ايش اللي يتم على اساسها القبول وكم جبتو في اختبار ستيب ؟؟

[&R&]

الله يوفقنا يارب ونتقابل ع خير ان شاء الله
هدوء بخصوص القدرات انا انصحها تعيده وتجيب اعلى درجه ممكن تجيبها والافضل فوق %80
اما الاستيب شرط لازم تجتازة مايدخل في النسبه الموزنة للقبول لازم تجيب اقل شئ 52
يحسبو النسبه الموزونة 50% من المعدل 40% قدرات و10% حسب قرب التخصص وهذا من اختصاص الجامعه تحطه لها

[راتانيا]

المشاركة الأصلية كتبت بواسطة هدوٍء~ الف مبروك للجميع ياليت تردو على استفساري صديقتي تخرجت هذا الترم من البكالريوس قسم ادارة اعمال ادارة موارد بشريه ومعدلها 4.10 وجابت بقدرات الجامعيين 68 وستيب لسا ماطلعت نتيجتو ابغا اسألكم كلكم عندكم خبره ؟ وكيف تحسب صديقتي معدلها التركمي والا النسبه والا ايش اللي يتم على اساسها القبول وكم جبتو في اختبار ستيب ؟؟

الله يبارك فيكي ^^

ما حزيد شي على كلام &r&

الا عن موضوع الخبره

الخبرة كانت شرط لكن اتنازلوا عنه هادي السنه وارسلوا ايميلات بدا الشي

يعني السنه الجايه ممكن يرجعوا يشترطوا او يتجاوزوا عنه اظن بحسب عدد اللي يقدموا
للامانه ما اعرف بالضبط ليش كان التجاوز عن الشرط لكن دا مجرد تخمين
الله يوفقها ويكتبلها الخير ^__^

[الفراشه2008]

صباح الخير
حابه استفسر من طلاب وطالبات ماجستير إدارة أعمال إذا لديهم أي مراجع وأوراق امتحانات وتكاليف ممكن تفيدنا في دراستنا أنا طالبه مستجدة ولا أعلم شيئا عن التخض والدكاتره فياليت أي أحد عنده معلومه تفيدنا يرسلها ولا يبخل علينا بعلمه وجزاه الله ألف خير
وطلب خاص لرحله إحساس ارجوا ان تفيدينا من سنين دراستك وتنزلين جميع تكاليفك على الموقع وجزاك الله خيرا ووفقك في ما تبقى من مشوراك.

[najmah]

الله يوفقكم يارب وإن شاء الله ربي يحقق لنا اللي أتمناه ويسهل أمورنا .. يااااااااااارب أكون معاكم هالترم بإذن الله بس باقي درجة الكفايات .

رحلة إحساس إستفدنا منك كثير الله يوفقك ويسعدك عقبال تتخرجي بنسبة عالية إن شاء الله

عندي سؤال حذف وإضافة المواد في إعلان يقول بدء التسجيل المبكر في الحذف والإضافة طيب واللي لسى ماطلعت نتيجة الكفايات متى آخر موعد ..؟

[راتانيا]

بنات رحت الجامعه عشان نموذج طالب مستجد وادوني نموذج ومالقيت اي احد في القسم يعبيه

حبيت اقولكم عشان ما تضربوا مشوار زيي

قالولي ارسليه على ايميل الدكتوره امل لانها مسافره برا
اذا تبغوا النموذج ممكن ارفعه لكم وترسلوه للدكتوره

[mnoola]

المشاركة الأصلية كتبت بواسطة راتانيا بنات رحت الجامعه عشان نموذج طالب مستجد وادوني نموذج ومالقيت اي احد في القسم يعبيه حبيت اقولكم عشان ما تضربوا مشوار زيي قالولي ارسليه على ايميل الدكتوره امل لانها مسافره برا اذا تبغوا النموذج ممكن ارفعه لكم وترسلوه للدكتوره

الله يسعدك كويس اديتنا خبر
طيب استلمتي البطاقة؟
واذا ماعليكي امر نزلي النموذج وايميل استاذة امل