والله ما اسامحك ليوم القيامه يا.......

[O-DODY-O]

السلام عليكم ورحمة الله وبركاته

انا بصراحه في شي مضايقني مرررره ونفسي اقولكم عنو من اول بس كنت متردده احط الموضوع ولالا!!!....


بس قررت احطو

انا انسانه احب للناس زي ما احب لنفسي

ففي كم حاجه لازم اقولها لكم

احنا دايماً نسمع عبارة ((اللي ما يسامح الناس ربي ما يسامحو)) <من يوم ما كنا صغار حافظينها زي اسمنا

واذكر مره حضرت محاضره كانت تتكلم عن ذا الموضوع

((الانسان اللي ما يسامح الناس ربي ما يسامحو - اذا انتا ما غفرت اخطاء الناس ربي ما راح يغفر ذنوبك <مين فينا ما عندو ذنوب ؟؟؟؟؟ ))

ما اتوقع انسان ما عمرو غلط

طيب اوكي انا لما اغلط على شخص مو معناها اكرهو < بالعكس يمكن من غير قصد غلطت عليه <ليش ما يسامحني؟؟؟؟

ترا الدنيا ذي رايحه ليش نقاطع بعض على شي ما يسوى <بجد الدنيا ما تستاهل زعلنا ولا تستاهل كرهنا ولا شي

انا بصراحه مره سارلي موقف مع واحد في منتدى من المنتديات حقت الجامعه

((كنا نتكلم عادي في موضوع وفجأه قال بمزح اطلعي برا الموضوع

قلتلو كأن المنتدى منتدى ابوه))

وبعد ما قلت ذي العباره ارسلي عالخاص

لو سمحتي ابويا ميت والمفروض ما تقولي ذا الكلام لأي شخص

رديتلو طيب خلاص انا اسفه حقك عليا وانا ما كنت ادري انو ابوك ميت ((الله يرحمو ويدخلو الجنه))

وبعدين قلي انا عارف انو مو قصدك ومسامحك انا

وبعدها بشويه قلي ((انا والله مو مسامحك ليوم القيامه))

قلتلو عادي عساك ما سامحتني

^ ^ ^
طبعاً الكلام كان مرررررره طويل وقال كلام مره جامد عشان كذا قلتلو عادي عساك ما سامحتني

-------

وبقولكم عن حاجه حصلتلي

بس ما اقول غير(( الله لا يوفقو لا في دنيا ولا في اخره )) بصراحه اللي عملو شي ما ينسكت عنو

بس انا مسامحتو ليوم الدين

وبيني وبينو الله (ياخذ حقي منو)

انا بصراحه اتعرفت على وحده من منتدى

واستمرت صداقتنا لمدة 5 سنين

وبعد ذي السنين طلبت رقمي واديتها وكنا على اساس نتقابل

وسرت اكلمها دايماً بالجوال

وطلبت مني اوريها صورتي ووريتها <اكبر غلطه

المهم بعد ذي المعرفه الطويله

ابويا ناداني وانا دوبي راجعه من المدرسه اول ما دخلت البيت قلي تعالي

ورحت (انا مو عارفه الموضوع) قلي انتي متعرفه على وحده من منتدى؟؟

قلتلو ايوا قلي تكلميها جوال؟؟؟ قلتلو ايوا

قلي انتي عارفه امس جاني واحد يقولي انتبه لبنتك (تراها تكلم شباب) يقول انا اكلمها بالجوال وشوف المكالمات وشوف الرسايل وهاذي صورها

انا مررررره انصدمت بصراحه

ابويا قلي انا عارف انك ما تكلمي شباب

(وكمل يقولي انو قلو يكلمني على اساس انو بنت وحاط برنامج يغير الصوت <الله لا يوفقو)

فمن بعدها تبت اني اتعرف على بنات من النت وحتى اذا اتعرفت ما توصل للجوال ابداً

------------

يعني نفسي اسألكم سؤال؟؟؟

مين فيكم ما يبغا ربي يغفر ذنوبو؟؟؟

اكيد الكل يبغا ربي يغفر ذنوبو

طيب اول شي انتا سامح الناس واغفر ذنوبهم عشان ربي يسامحك ويغفر ذنوبك

(( اللي يسامح الناس ربي يسامحو

واللي ما يسامح الناس ربي ما بيسامحو))