الله يسعدكم جاوبني وان شاء الله ربي ما يحطكم في الكرب الي انا فيه

[فرحة]

السلام عليكم
لو سمحتو يا ارجوكم جاوبوني على سؤالي
انا اليوم شيكت على الاودوس وكانت صدمة بالنسبه ليا
والله العظيم انا راح احكيكم حكايتي من غير زياده ولا نقصان
راح ابدئلكم من البدايه ابغاكم تعذروني اذا كان اسلوبي ضعيف في الكتابه
لاني بكتبلكم وانا دموعي على خدي واعصابي مره تعبانه
بكتبلكم وانا مصدومه وزعلانه ومقهوره فاهمين احساس القهر احد فيكم انظلم قبل كدا
الي مر بظلم او قهر بس هو الي حيحس بيا
والله انا بكتبلكم ويدي بترجف
ابغاكم تصدقوني في الي راح اكتبو انا يا ناس دخلت الجامعه وعندي طموح اني اغير نفسي اتطور ادرس اثقل شخصيتي واطورها بالدراسه اثقف نفسي كان حلمي ادخل علم نفس او علم اجتماع او صحافه
اشتريت الكتب واول ما مسكت كتاب الثقافه الاسلاميه وكتاب العربي حطيت في بالي انو دول المادتين راح اخد فيهم بأذن الله في التسعينات يعني تسعين وشي
وما راح اقبل اخد فيهم اقل من كدا بالذات انهم مواد سهله عيا بأختلاف الرياضيات والانجليزي الي كنت دايما في دراستي ايام الثانويا انجح بصعوبه فيهم
ذاكرت اجتهدت دراستي ما كانت سهلة لاني كنت منقطعه عن الدراسه عشر سنوات ولكم انكم تتخيلو ايش معني عشر سنوات ما تدرس وفجأه ترجع للدراسه
مخي مره كان واقف كنت احفظ الثقافه واراجع الي حفظتو تاني يوم والاقيني ناسيتو ومع ذلك عمرو دا الشي ما هزني كنت اقول الي اتنسا ارجع احفظو وربي ان شاء الله يثبتو وكنت بعد ما احفظ اقول " الللهم اني استودعتك حفظي وفهمي " يارب انصرني يارب
والله العظيم انا اكتبلكم وانا حاسه بالظيم وبالقهر وبالظلم
اكتب كل كلمة وتخرج من قلبي يارب مالي احد افضفضلو غيركم الله يسعدكم اسمعوني للنهايه واقرئو كلامي كلو حتي لو كان طويل عليكم والله حبايبي انتو الي محسسني بالقهر والمراره زوجي لو اشتكيتلو ما راح يفهمني مستحيل ينزلني جده عشان اراجع الجامعه
بعد ما تعبت جدا في حفظ الثقافه من الكتاب وصميتها صم
خرجت من الاختبار وانا اقول يارب الحمدلله اكرمتني حليت كويس ماعدا اربعه او خمسه فقرات ما عرفت حلهم يعني حسبتها اني راح اخد اقل شي في التسعينات وكنت سعيده بأحساسي اني انتصرت على نفسي وعلى الماده
جيت للعربي ابدئلكم من البدايه لما درستو مره كان ثقيل وكلو دش حفظتو زي اسمي اخد مني دراسه في البدايه اسبوع وطبعا كلو اتنسا من جد احفظ من ملخص روز واراجع تاني يوم الاي نفسي نسيت اتحديت نفسي ورجعت حفظت المادة في ثلاثه اسابيع من ملخص روز وملخص دودي ومن الكتاب يعني دراسه من قلبي مو اي كلام دراسه وكل حرف ادرسو انا حاطه هدفي قدامي واقول يارب اوصل لهدفي
اليوم فتحت الاودوس انصدمت انهم في الثقافه حاطين ليا 62 والعربي 73
مو ظلموالله مو شي يحق ليا اني ابكي عشانو لا تفكرو اني شخصيه مهزوزه او ضعيفه واني ابكي على اي شي لالالالالالالالالالالالالالالالالالالالالالالالالا لالا
انا مو اي شي يبكيني بس ابكي لانو من حقي اخد شي وتسعين في كلا المادتين وانو انامره تعبت وفي النهايه الاقي انو ناس ما تخاف من الله حاطين درجه وهما اكيد ما صححو الي بيخليني ابكي هو انو عارفه مليون في الميه اني لو كلمت زوجي ما راح يستجيب ليا حيقولي احمدي ربك اني بنزلك وقت الاختبارات وبأخد اجازه من عملي وهو صادق ما قصر معايا
بس الله يسعدكم يا حبايبي قولولي كيف اتصرف دحين مافي طريقه اوصل بيها للمشاط مافي طريقه ارفع بيها هادا الظلم عني والله الذي لا اله الا هو كل حرف كتبتو كان صدق انا من جد تعبت في الدراسه تعبت مره اجتهدت مره كيف ارضا انهم يحطو علامات من مخهم مو من حقهم طيب
اخر شي سامحوني طولت عليكم بس كيف راح اقدر اعدل علامتي الله يسعد الي حيجاوبني وما ابغا احد يدخل بدون ما يسجل دعوه ليا دعواتكم ليا حترفع من معنوياتي الله لا يجعل اي احد فيكم يدوق المراره الي انا دقتها
اختكم فرحه