كلية الهندسة .. بين الواقع والمأمول

[اسامـــه]

حكمة ارددها كثير مشي حالك حالك يمشي

[اسامـــه]

1- قبل الدخول .

الحمد لله بعد تخرجي من الثانوية كل الابواب كانت مفتوحة من بعثة لجامعة الملك الفهد لكن اخترت عزوز رغبةً مني
2- اثناء الدراسة بها .
الحمد لله الى الان ماواجهت دكاترة سيئين غير الفيزيا ١١٠ محمد الزين اللي ماكنت احضر عنده خلقه فما فرقت والحمد الله كل شي ماشي تمام والله يستر من اللي جاي والمناهج صراحة الى الان ماواجهت مادة صعبة كلها من سهلة الى متوسطة الآ مادتين ie 201 مادة سهله لكنها كرف و ماث 202 واللي معقدها الدكتور اللي ماسكها ولا هي سهالة
3- بعد التخرج ( للأخوان المتخرجين )
ان شاء الله بعد ثلاث سنوات ونصف اقلك رأي

[خالد9921]

وعليكم السلام ورحمة الله وبركاته
هلا هلا ماجستيك وهلا بموضوعك اللي مررره مفيييد (:
انا بجاوب من واقع اللي اشوفه وان شاءالله اجاباتي تكون مفيده للموضوع الكويس دا

1- قبل الدخول .

للاسف كنت انظر للكليه بنظرة إستهزاء وانها ضعيفه بالمجال الهندسي اساسا مقارنه بكليات وجامعات ثانيه برا السعوديه او حتى داخلها
رغم انو اخويه خريج من نفس الكلية قبل 15 سنه والحين ماشاءالله مهندس ايش كبره ومدير عمليات بمصنع ما ,,
لكن يمكن بسبب اني درست قبلها هندسه برضو بأمريكا وما شاء ربي اني اكمل هناك
فـ كانت نظرتي فيها استخفاف شويه بالكليه حقنا :/
بس عموما واحد من اصحابي يقولي شوف اعتماد ايبت وبديت اقتنع وتتحسن نظرتي

2- اثناء الدراسة بها .

كلامي في دي النقطه راح يكون سابق لاوانه لانو لسه مالي شهر بالكليه
بس بشكل عام اشوف الدراسه فيها طبيعيه وواضحه الوضع مش ضبابي وهذا اهم شي

رأيكم كإيجابيات وأنتقاداتكم كسلبيات .. عن الكلية بشكل عام ، والتخصصات بشكل خاص .. بما فيها من : 1- مناهج . 2- دكاترة ( أرجو عدم التعرض لأي إسم .. فقط كلمحة عامة أو إجمالية ) . 3- معامل . 4- نظام ومنهج تدريس وخطط دراسية .

1- المناهج مافيها شي بالمره بالعكس ممتازه
وعلى فكره انا لما كنت ادرس بأمريكا درست نفس المناهج اللي دحين ادرسها بنفس المعلومات
يعني المناهج مواكبه وجديده فعلا ما تقدر تقول عليها شي (:

2- لحد الآن اشوف الكل كويس عاد مدري انا حديث عهد بالكلية لسه ما شفنا الخير
بس فيه دكاتره درسو اخويه زمااان بالكليه ولما جيت الحين لقيتهم موجودين ويدرسو ض1
بس ممكن يكون شي ايجابي برضو الخبره شي مطلوب (:
3- معامل هاذي اكبر اكبر اكبر نقطه انا ضد الكليه فيها وضد حتى وضع المبنى حق الكليه بهذا الشكل
المعامل للاسف مش معامل مرره متعوب عليها تحتاج لتطوير وتخصص اكتر من كذا
حتى مبنى الكليه مدري أ او ب فيلو صيانه وكذا شكلوو مو حلو بصراحه مشوه منظر الكليه والوضع صاير سيئ بالمبنى لخبطه وتشوف عدة بناء مفروض يكون فيه تخليص لاعمال الصيانه سريع سريع وانشاء مباني جودتها عاليه للغايه لانو دي كلية هندسه فخر للجامعه تجي بعد الطب ع طوول اتمنى من كل قلبي يكون مبناها جبار وصرح علمي متطور نفخر فيه شكليا
حتى الصراف اللي بالكليه مو كويس يسحب البطايق ويسوي حركات بشعه
كمان مفروض معامل فيزيكس ما نروح لما كلية العلوم حبذا لو تصير بعض معاملها عندنا لانو احنا بحاجتها كمان والماده من موادنا
كمان عندي نقطة بخصوص انو فيه ماده لازم تدرسها عشان تتخصص
ما اشوف انو شرط له داعي مفروض التخصيص عالمعدلات ويتم التغاضي عن الشرط هذا
4-كمان يا ليت تكون فيه مواد حره ممتعه فعلا بس للاسف دي سياسة تعليم كامله صعب نفرض مواد فيها اشباع للهوايات بكليتنا وهوا اساسا مافي تخطيط لدا الشي بكل التعليم العالي عندنا :/

مشكور حبيبي يعطيك العافية والمعذرة عالإطالة (:

[خالد9921]

بعد اذن صاحب الموضوع
محمد دا صديقي الصدوووق لازم اخدمه في استفساره

ليش؟؟ والله من كلام بعض الشباب اللي سألتهم في الهندسة حسسوني ان الكلية مو قد كدا يعني مو زي ما كنت اتصورها انها تنافس الطب و و و .... هل هو بسبب الدكاترة ولا المواد ولا نفس التخصص؟ لأني انا طالب في التحضيري ومتردد بين الصيدلة والهندسة الصيدلة احس طلابها نفسهم مو مقتنعين فيها , والهندسة بعض طلابها نفس الشي + تصدقو انو شباب من كلامهم حسسوني ان اغلب تخصصات الهندسة مالها مستقبل؟؟! انا حايس حوسة ما يعلمها الا ربكم

شوف محمد اول شي لازم تعرفه انو الهندسه ليومك مازال فيها عجز ع مستوى السعوديه من ناحية توطين الوظائف
ودا الشي بصالح كل طالب بكلية الهندسه لانو فرصة التوظيف حتكون كبيره
طبعا ما اخفيك بعض الاقسام للاسف ميته بالكليه مع احترامي منها الطيران بسبب صعوبة التوظيف ما عندك جهات كثيره توظفه على حسب ما اعرف ,, !
لكن فيه تخصصات مافي مصنع في الدنيا او جهة انتاج الا تطلبها منها تخصص الميكانيك انتاج
طبعا اول شي طالب الهندسه لازم يكون ذكي وملم ببعض الامور اللي يحتاجها
زي اللغه مثلا لازم لازم يكون مستواك فيها متطور عشان تتسهل بالتوظيف وبالمقابلات الشخصيه
انا عندي واحد من اصحابي اتخرج من الهندسه المدنيه
مسكين عشانو متعقد من هرجة اللغه ومستواه ضعيف جاتو فرصة عمل بسابك ورفضها ,,
اخر شي اشتغل في بلديه بمدينه جنوب المملكه براتب مش قد كدااا وبعيد عن اهلو
هوا اللي حط نفسو بدا المكان اماكن كثيره ممتازه كان ممكن تقبله بس عندو مشكله باللغه ,, !
كمان اعداد خريجين كليات الهندسه في زياده سنه بعد سنه وهذا شي لازم تحطه بالحسبان وانك تكون متميز عن غيرك بالدورات او بالماستر او باللغه او او او شي ,,
عندي اخويه مهندس بارامكو وخريج امريكا يقولي قبل فتره هههههه هندسه بعزوز يارب بس تتوظف
المهم دحين لما اتسكنت بالكليه صار يقولي لا لا معليك ترى فيه احتياج كبيرر للمهندسين بالسعوديه بس شد حيلك وجمع مهارات كثيره وحتشوف كيف
وبرضو اخويه الثاني خريج هندسه عزوز من قبل 15 سنه
واتذكر كمان اصحابو وقتها بعضهم ما لقى وظيفه بنفس الوقت صبرو شهر شهرين تلاته
لانو التخصص يحكمك وقدراتك كمان تحكمك لما تجي تسوي مقابله شخصيه عند شركه ما
الزبده محمد تعال الهندسه بس وخليك من الصيدله اعرفلك ناس فيها عااااطلين ليومك

بالتوفيق حبيبي شد حيلك (:

[batchat]

صراحة موضوع حلو

[Majest!C]

بسم الله الرحمن الرحيمْ ..
أحببت أن يكون هذا الرد بعد ردودكم جميعاً .. لعدة أسباب .. من أهمها :
- التفاعل يبدأ منكم أولاً .. وبعيداً عن النمطية المُعتادة في طرح المواضيع .. من الاستفسارات والإيضاحات المُكررة .

،،

ما نظرتي تجاه الهندسة .. :

- قبل الدخول وبعد الدخول /
في الواقع .. لم أحلم بجامعة الملك عبدالعزيز لأن سمعتها كما يشُاع كانت سيئة ، كان الحُلم هو البترول أو الابتعاث .. فأما البترول لم يفصلني عن القبول فيها إلا فواصل .. والابتعاث .. الوالد هداهُ الله .. وعُموماً .. كانت السنة التحضيرية .. سنة فاشلة بكل المقاييس مع إحترامي لكم جميعاً وللمسؤولين من مدنيين وعسكريين < شطح .. السبب !
والله الذي لا إله إلا هُو .. لم ننجح إلا بتوفيق الله ثم مؤسسة أشرف بركات وأخوانه وجماعته ( حسن وحيد .. الخ ) .. فقط فقط فقط فقط .
بعد إنتهاء التحضيري .. كان قبولي في الهندسة .. كحلم غائر ( اتحداكم تعرفون معنى غائر ) .. لم أتوقع بأنني أقبل في الهندسة .. أو هندسة جدة بشكل خاص ، مررت بأيام عصيبة أيام الاختبارات .. كُنت أخرج وأنا كلي ثقة بحلولي .. لكن لا أعلم مالسرْ ؟ .. ودخلنا إختبارات لم نذاكر شيئاً وخرجنا منها بدرجاتٍ عالية ..! وعموما .. أعيش الان في خضم الهندسة وأحسبني أريد الخلاص والتخصص بعد 2f في الفصل الأول بكل أسف < قصة حياته

..

1- مناهج :
طريقة تدريسها مُعقدة .. وليست هي ! .

2- دكاترة
منهم من يعطيك المختصر المفيد .. ومنهم الغث السمين .. خصوصاً عرب101 ، عرب2

3- معامل
بااااااااااااااااائسة وتقنيات قديمة خصوصا فيزيكس202 .. وتوقيت المعاااامل باااااااااااااااااااااائس .. وكل الطلاب يريدون شخصٌ واحد يدرسهم .. السبب يعلمه الدكتور المرزوقي .

4- نظام ومنهج تدريس وخطط دراسية .
الخطة الدراسية تماماً مثل خططنا المدروسة .. أو خطط ناصر الجوهر
خصوصاً فيما يتعلق بتعليق مستقبلك .. من لابد من إنهاء 50 ساعة قبل أن تتخصص !

..

كلي آمل في الدكتور الجنيدي ينفض الكلية عن بكرة أبيها

[batchat]

المشاركة الأصلية كتبت بواسطة majest!c كلي آمل في الدكتور الجنيدي ينفض الكلية عن بكرة أبيها

انا معاك في هاذي النقطة خصوصا التيفوتي ان شاء الله يشيلوه ناشب في حلق الطلاب

[اسامـــه]

المشاركة الأصلية كتبت بواسطة batchat انا معاك في هاذي النقطة خصوصا التيفوتي ان شاء الله يشيلوه ناشب في حلق الطلاب

ايش بكم على التيفوتي من تعاملي معاه ماشاءالله ادمي قمة في الاحترام لكن مشكتله مايعرف شي اسمه كيرف اب وطبعا نحن ماشاءالله جامعة الكيرف اب

[فهد الجدعاني]

^^

التيفوتي من واقع خبرة أحسه عنده إنفصام في الشخصية ما تعرف له مره يكون محترم مره .... مره مفلسع بس صراحة محترم ما شفتها إلا مرتين بداية السنة قبل التسجيل و نهاية السنه بعد النتايج

[خطة أ]

1- قبل الدخول .
ما كنت افكر ادخلها
كنت مفكر في بعثة لكن ما انقبلت
انقبلت في البترول لكن ما رحت
مدري مين ضحك علي وقال ما تفرق البترول عن عبدالعزيز
2- اثناء الدراسة بها .
شيء يجيب المرض بصراحة
الى الان ما في غير ابو جبل اللي فهمت معاه وتحس انه دكتور
دكاترة ما ادري كيف اخذوا الدكتوراة
ما يعرفون يوصلون المعلومة
معمل تقريبا ما استفدت منه اي شيء
هذا غير عبدالسلام
الترم الماضي درسنا بيسك
والله انه من جنبها في المادة , حتى هو قال لنا انه اول مرة يدرس المادة
طيب انت اذا منت متمكن من المادة لا تدرسها وتخلينا نجيب العيد
يعني المفروض اهم مادة في القسم يدرسها واحد فاهم

3- بعد التخرج ( للأخوان المتخرجين )
لسى بدري على التخرج